وعان دەيىن ازەربايجان استاناسى باكۋدە ءتۇبى ءبىر تۇركى ەلدەرىنىڭ باسقوسۋىنا قاتىسىپ, سارالى ويىن ءبىلدىردى. مۇنىڭ بارلىعى ەل يگىلىگى ءۇشىن اتقارىلعان جۇمىستار. Nur Otan پارتياسىنىڭ جيىنىن ەكى رەت وتكىزدى, قازاقستان حالقى اسسامبلەياسىنىڭ توراعاسى رەتىندە دە كوپ جۇمىستار اتقارىپ كەلەدى. مۇنىڭ بارلىعى – ۇلكەن قىزمەت. پرەزيدەنتتىكتەن كەتسە دە, حالىقپەن بايلانىسىن ۇزگەن جوق. حالىقارالىق قاتىناستا دا, ەكونوميكادا دا ءوز تاجىريبەسىمەن ءبولىسىپ, كەڭەسىن, اقىلىن اياپ قالمادى. حالىقارالىق ارەناداعى بەدەلى ەسەلەنە ءتۇستى.
ەستۋىمشە, حالىق تا ەلباسىنى ساعىنعانداي. البەتتە, 30 جىلعا جۋىق ەل باسقاردى, حالىقتىڭ ساعىنۋى ورىندى. جەلتوقساندا كەزدەسكەنىمىزدە دە جۇمىستىڭ كوپ ەكەنىن ايتقان ەدى. ەلباسىنىڭ قازىرگى جۇمىسىنا ريزامىز.
بۇيىرسا, الداعى ۋاقىتتا تاۋەلسىزدىگىمىزگە 30 جىل تولادى. سالىستىرىپ ايتار بولساق, مەن مينيستر بولىپ قىزمەت ەتكەندەگى قازاقستان مەن بۇگىنگى قازاقستاننىڭ اراسى اسپان مەن جەردەي سەكىلدى. 30 جىلدا كوپ تابىسقا قول جەتكىزدىك. ەكونوميكامىز دا, ىشكى, سىرتقى ساياساتىمىز دا, اۋىل شارۋاشىلىعى دا جۇيەلەندى. شەكارامىز بەكي ءتۇستى, يادرولىق قارۋدان باس تارتقانىمىز دا ۇلكەن جەتىستىك. بۇل رەتتە ەلباسىنىڭ ەڭبەگى ەرەن. حالقىنا بەرگەن ۋادەسىن ورىنداۋ ءۇشىن ۋاقىتىن دا, دەنساۋلىعىن دا جۇمىسىنا ارنادى. «قازاقپىن, ەلىمنىڭ پاتريوتىمىن» دەپ كۇش-جىگەرىن ەل دامۋىنا جۇمسادى. بۇگىندە ەكونوميكاسى دامىعان, بەيبىت ەلدە ءومىر ءسۇرىپ جاتىرمىز. ەلوردامىزدىڭ دا كوركى كوز تارتادى. قازىر قايدا بارساڭ دا, الەم حالقى قازاقستاندى تانيتىن بولدى, ەلباسى تۋرالى ويلارى دا وڭ. سوندىقتان وسىنداي ۇلى بار قازاق حالقى, ءبىر-بىرىنە قامقور حالقى بار ەلباسى دا باقىتتى.
مەن نۇرسۇلتان نازارباەۆتى ستۋدەنت كەزىمنەن تانيمىن. ەڭبەك جولىنىڭ ەڭ العاشقى كەزەڭدەرىنە دە كۋامىن. حالقىمىزدىڭ يگىلىگى ءۇشىن قىزمەت ەتكەن ازامات رەتىندە سىيلايمىن.
تولەۋتاي سۇلەيمەنوۆ,
مەملەكەت قايراتكەرى, قازاقستان رەسپۋبليكاسىنىڭ تۇڭعىش سىرتقى ىستەر ءمينيسترى
