«اتامەكەن» كاسىپكەرلەر پالاتاسىنىڭ وڭىرلىك كەڭەسىنىڭ توراعاسى قايرات مولداسەيىتوۆ باستاماشى بولىپ, پالاتا جانىنان قور اشىلعان. قورعا «Otau Group» حولدينگى اتىنان 20 ملن تەڭگە اۋدارىلدى. ايتا كەتەلىك, قايرات مولداسەيىتوۆ اتالعان حولدينگ پرەزيدەنتى. كاسىپكەرلەردى تۇرمىسى تومەن وتباسىلارعا كومەكتەسۋگە ۇلگى كورسەتە وتىرىپ, شاقىرعان مەتسەنات مولداسەيىتوۆ جينالعان قارجى شىمكەنت قالالىق اكىمدىكتىڭ الەۋمەتتىك سالاعا جاۋاپتى ماماندارىمەن اقىلداسا وتىرىپ, مۇقتاج ازاماتتارعا ۇلەستىرىلەتىنىن مالىمدەدى.
سونداي-اق شىمكەنت قالاسىندا اشىلعان جاڭا «Otau med» كلينيكاسىنىڭ سالىنۋىنا دا كاسىپكەر قايرات مولداسەيىتوۆ سەبەپشى بولىپ وتىر. اقجايىق شاعىن اۋدانىنداعى تۇرعىن ۇيلەردىڭ ماڭىنان ورىن تەپكەن كلينيكا كوپشىلىككە قۋانىش سىيلادى. ەندى شاعىن اۋدان تۇرعىندارى دەنساۋلىعىن تەكسەرۋ نەمەسە تۇزەۋ ءۇشىن الىسقا شابىلماي, وسى ەمحاناعا جۇگىنە الادى. زامان تالابىنا ساي جابدىقتالعان كوپسالالى ەمحانا ديرەكتورى اقىلجان پازيلوۆتىڭ ايتۋىنا قاراعاندا, ناۋقاستار امبۋلاتورلىق-ەمحانالىق كومەكتىڭ بارلىق ءتۇرىن الا الادى. كلينيكادا تسيفرلىق جۇيەدە جۇمىس ىستەۋگە باسا نازار اۋدارىلعان. ناۋقاستار مەديتسينالىق ورتالىققا ونلاين نەگىزدە جازىلا الادى. سونىمەن قاتار, ەلەكتروندى كارتا العان ناۋقاستار دارىگەردىڭ كەستەسىن, تالداۋ جانە زەرتتەۋ ناتيجەلەرىن ونلاين تۇردە بىلەدى. ياعني ناۋقاستار بۇرىنعىداي كابينەت الدىنا سارىلا كەزەك كۇتىپ, جۇيكەلەرىن جۇقارتپايدى.
«بولاشاقتا ەمحانا تمككك شەڭبەرىندە 25 مىڭ ادامدى تىركەپ, ءبىر اۋىسىمدا 300 ادامعا ساپالى قىزمەت كورسەتۋدى جوسپارلاپ وتىر. جانە مىندەتتى الەۋمەتتىك مەديتسينالىق ساقتاندىرۋدى جۇزەگە اسىرماق» دەدى كلينيكا ديرەكتورى اقىلجان پازيلوۆ.
وسىنداي ساپالى قىزمەت كورسەتەتىن كلينيكانىڭ پايدالانۋعا بەرىلۋىنە مۇرىندىق بولعان قايرات قۇسەيىن ۇلى ارقاشان جومارتتىعىمەن, دارحان پەيىلىمەن ەل ىقىلاسىنا بولەنىپ جۇرگەن جان. كەزىندە ارىستا بولعان اپاتتى جاعدايدان كەيىن وڭىردەگى كاسىپكەرلەر اراسىنان العاشقى بولىپ قايرات مولداسەيىتوۆ زارداپ شەككەندەرگە كومەكتەسۋ ماقساتىندا ءوز قالتاسىنان 10 ملن تەڭگە ءبولىپ, وزگەلەرگە ۇلگى كورسەتكەن بولاتىن. كلينيكانىڭ اشىلۋ راسىمىندە قالالىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى تيميرحان ۆارزيلوۆ كاسىپكەرگە العىسىن ءبىلدىردى. «Otau Group» كومپانياسى جەكە ينۆەستور رەتىندە وسى شاعىن اۋداندا كلينيكا سالدى. قازىر جەكە ينۆەستورلار وسىنداي زاماناۋي كلينيكالاردى سالىپ, وزدەرى جابدىقتاپ, دەنساۋلىق ساقتاۋ باسقارماسىنا ناقتى ۇسىنىسپەن شىعا الادى. بۇل ءوز كەزەگىندە مەملەكەت قارجىسىن ۇنەمدەۋگە, ونى ءتيىمدى جۇمساۋعا زور ۇلەسىن قوسادى. الداعى ۋاقىتتا وسىنداي كلينيكالار سانى كوبەيەدى دەپ سەنەمىز» دەدى ت. ۆارزيلوۆ.
كلينيكانىڭ اشىلۋ سالتاناتىندا قالا اكىمىنىڭ ورىنباسارى ەربول سادىر لەنتانى قيىپ, مەديتسينالىق مەكەمەنىڭ جۇمىسىنا ساتتىلىك تىلەدى.
شىمكەنت
