جيىن بارىسىندا مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا مەملەكەتتىك اپپاراتقا حالىق تىنىس-تىرشىلىگىنىڭ بارلىق سالاسىنىڭ ۇزدىكسىز جۇمىسىن قامتاماسىز ەتۋ بويىنشا ۇلكەن جاۋاپكەرشىلىك جۇكتەلگەنىن جەتكىزدى.
«قازىرگى ۋاقىتتا قىزمەتتەردى ەلەكتروندى فورماتقا كوشىرۋ بويىنشا مەملەكەتتىك ورگانداردىڭ بەلسەندى قىزمەتىنىڭ ارقاسىندا ازاماتتار ۇيدەن شىقپاي-اق ەلەكتروندى تۇردە 80 پايىزدان استام مەملەكەتتىك قىزمەتتى الۋعا مۇمكىندىگى بار. بۇل رەتتە ازاماتتاردىڭ مەملەكەتتىك قىزمەتتەردى قاشىقتان الۋى, سونىڭ ىشىندە وتىنىشتەردى مەملەكەتتىك ورگانداردىڭ Call-ورتالىقتارى جانە ونلاين ارقىلى قابىلداۋ ءۇشىن اقپاراتتىق جۇيەلەر مەن پورتالداردىڭ ۇزدىكسىز جۇمىس ىستەۋىنە ەرەكشە نازار اۋدارۋ قاجەت», دەدى ا.جايىلعانوۆا.
سونىمەن بىرگە ول اعىمداعى جاعدايعا قاراماستان, ءوز مىندەتتەرىن كۇندەلىكتى جانە ادال ورىنداپ جۇرگەن مەملەكەتتىك قىزمەتشىلەرگە ۇندەۋ جولدادى.
«وسى كەزەڭدە ءبىزدىڭ وتانداستارىمىزدىڭ جايلىلىعى مەملەكەتتىك ورگاندارعا بايلانىستى. الايدا قازىر مەملەكەتتىك مەكەمەلەردىڭ ۇزدىكسىز جۇمىس ىستەۋى ءۇشىن مەملەكەتتىك قىزمەتشىلەردىڭ دەنساۋلىعىن ساقتاۋعا كوڭىل ءبولۋ دە وتە ماڭىزدى. وسىعان بايلانىستى اعىمداعى جاعدايعا قاراماستان, ءوز مىندەتتەرىن كۇندەلىكتى جانە ادال ورىنداپ جۇرگەن مەملەكەتتىك قىزمەتشىلەرگە ۇندەۋ جولداعىم كەلىپ وتىر. سىزدەردى دۇنيەجۇزىلىك دەنساۋلىق ساقتاۋ ۇيىمىنىڭ جاڭا كوروناۆيرۋستىق ينفەكتسياسىنىڭ الدىن الۋ جونىندەگى تالاپتارىن قاتاڭ ۇستاۋعا شاقىرامىن. وسىعان بايلانىستى مەملەكەتتىك ورگان باسشىلارىن مەملەكەتتىك قىزمەتشىلەردىڭ دەنساۋلىعىن جانە كۇندەلىكتى قىزمەتتەردى تولىق ورىنداۋ قابىلەتىن بارىنشا ساقتاۋعا مۇمكىندىك بەرەتىن جاعداي جاساۋعا شاقىرامىز», دەدى ول.
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قاشىقتان جۇمىس ىستەۋگە مۇمكىندىگى جوق نەمەسە جۇمىسشىلارىنا اقىسى تولەنەتىن ەڭبەك دەمالىسىن بەرە الماعان شاعىن كاسىپكەرلەر قىزمەتكەرلەرىن قىسقارتۋى مۇمكىن ەكەنىن اتاپ ءوتتى.
«بۇل جاعدايدا ءبىزدىڭ ەسكەرتەتىنىمىز, ەڭبەك زاڭناماسى بويىنشا ەگەردە جۇمىس بەرۋشى ءوزىنىڭ جۇمىسشىسىن قىسقارتاتىن بولسا, ول تۋرالى جۇمىسشىعا ءبىر اي بۇرىن ەسكەرتۋى كەرەك جانە دە وعان ءبىر ايلىق جالاقى كولەمىندە وتەماقى تولەۋى قاجەت. جالپى, جۇمىس ىستەپ جۇرگەن ازاماتتاردىڭ نازارىنا مىنانى ايتقىم كەلەدى. ەگەر سىزدەر وسىنداي جاعدايدا جۇمىستان شىعىپ كەتۋگە ءماجبۇر بولساڭىز, ەلىمىزدە مەملەكەتتىك ساقتاندىرۋ قورى جۇمىس ىستەيدى. الەۋمەتتىك ساقتاندىرۋ زاڭىنا سايكەس جۇمىس ىستەپ جۇرگەن ازاماتتار جۇمىستان شىعىپ قالسا, ونىڭ شىققان سەبەبىنە قاراماستان, سول قوردان التى اي بويى جۇمىسىن جوعالتقانىنا قاتىستى الەۋمەتتىك تولەم الۋعا مۇمكىندىگى بار. ونىڭ مولشەرى سول جوعالتقان جالاقىنىڭ 40 پايىزىن قۇرايدى. بۇل ءۇشىن جۇمىستان ايىرىلىپ قالعان ازامات جۇمىسپەن قامتۋ ورتالىعىنا بارىپ جۇمىسسىز رەتىندە تىركەلۋى كەرەك», دەدى
مينيستر.
