وبلىس ورتالىعىندا جۇرەتىن №18 اۆتوبۋستىڭ ەكىنشى قاباتىنا «جەڭىسكە جول» تاقىرىبىن قامتيتىن ەكسپوناتتار قويىلىپ, مۋزەي قىزمەتكەرلەرى جولاۋشىلارعا ءار جادىگەردىڭ تاريحىن, قاھارمان قوستانايلىقتاردىڭ مايدانداعى ەرلىگىن بايان ەتەدى. تاريحي-تانىمدىق ءمانى زور ەكسپوزيتسيا قالا كوشەلەرىن ايىنا ءبىر رەت مامىردىڭ سوڭىنا دەيىن ارالايدى.
وسىمەن ەكىنشى رەت جولعا شىققان كولىك-مۋزەي جولاۋشىلارعا قوستانايلىق مايدانگەرلەردىڭ تۋىس-تۋعاندارىنا جازعان ساعىنىشقا تولى حاتتارىنىڭ كوشىرمەلەرىن ۇلەستىرىپ, تاريحىن اڭگىمەلەدى. بۇگىندە سارعايىپ, جازۋى كومەسكى تارتا باستاعان مايدان حاتتارى وتانعا, تۋعان جەر مەن اتا-اناعا, باۋىر-قارىنداسقا دەگەن ىستىق سۇيىسپەنشىلىككە تولى. ۇشكىل حاتتاردا «مەن ءتىرىمىن» نەمەسە «ۇرىسقا كىرگەلى تۇرمىز» دەگەن تىركەستەر ءجيى كەزدەسەدى. اسىرەسە قاھارمان ۇشقىش يۆان پاۆلوۆتىڭ شىعىس پرۋسسيادان جازعان حاتى ەرەكشە اسەر قالدىرادى. مايدانگەر 2 بەت قاعازدى اتا-اناسى مەن باۋىرىنىڭ, ەلدىڭ جاعدايىن سۇراۋمەن تولتىرعان. حات سوڭىندا «مەن كەڭەس وداعىنىڭ باتىرى اتاعىن 2-ءشى مارتە الدىم», دەپ قىسقا عانا قايىرادى.
1942 جىلى سوعىسقا مەڭدىعارا اۋدانىنان اتتانعان يۋري گۆوزدەۆتىڭ حاتى دا ەرەكشە.
– ول ءوزىنىڭ ءبىر حاتىندا سوعىس اياقتالعان سوڭ تەڭىز ۋچيليششەسىنە وقۋعا تۇسكىسى كەلەتىنىن بايانداعان. بىراق, وكىنىشكە قاراي, سوعىستا قازا تاۋىپ, ارمانى ورىندالماي قالدى. مۋزەي قورىندا يۋري گۆوزدەۆتىڭ قارۋلاس دوستارىنىڭ مايدانگەردىڭ ىنىسىنە جازعان قارالى حات بار, – دەيدى مۇراجايدىڭ ءبولىم مەڭگەرۋشىسى باقىتگۇل مۇراتبەكوۆا.
ولكەتانۋ مۋزەيىنىڭ قورىندا مايداننان كەلگەن 100-گە جۋىق حات ساقتالعان. ولەڭمەن جازىلعان حاتتار دا كەزدەسەدى. ولاردى تولقىماي وقۋ مۇمكىن ەمەس. وت پەن وقتىڭ ورتاسىندا قازا تاپقان جاۋىنگەرلەردىڭ جۇرەك تۇسىنداعى قويىن قالتاسىنان شىققان حاتتار بۇگىندە مۇراجاي قورىنىڭ قۇندى جادىگەرىنە اينالعان.
قوستاناي
