ايماقتار • 13 ناۋرىز، 2020

قوستاناي وبلىسىنداعى 167 اۋىلدا مەكتەپ جوق

84 رەتكورسەتىلدى

وڭىرلىك كوممۋنيكاتسيا قىزمەتىندە باق وكىلدەرىمەن كەزدەسكەن قوستاناي وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتىنىڭ باسشىسى ورال قاپپاسوۆ: -  167 اۋىلدىق ەلدى مەكەندە ءبىلىم بەرۋ ۇيىمدارى جوق. بۇل ەلدى مەكەندەردە مەكتەپ جاسىنداعى 1538 بالا تۇرادى. ولار كورشى اۋىلدارداعى مەكتەپتەرگە ارنايى بولىنگەن اۆتوبۋسپەن قاتىناپ وقيدى. تەحنيكا پاركى جاڭارتۋدى قاجەت ەتەدى. وسى ماقساتتا 2022 جىلعا دەيىن 30 اۆتوبۋس ساتىپ الۋ جوسپاردا بار، - دەدى.

باسقارما باسشىسىنىڭ ايتۋىنشا، وبلىستا 47 مەكتەپ كۇردەلى جوندەۋدى تالاپ ەتەدى. وعان جالپى سوماسى 14 ملرد تەڭگە قارجى كەرەك. بيىل 3 ملرد تەڭگە قارجىعا 15 مەكتەپتى جوندەۋدەن وتكىزۋ جوسپارلانىپ وتىر. وبلىستا 3 مەكتەپ اپاتتى جاعدايدا تۇر. الداعى ۋاقىتتا بۇل عيماراتتاردىڭ ورنىنا ارقايسى 320 ورىندىق 3 جاڭا مەكتەپ سالىنباق. بۇگىندە ءبىرىنشى مەكتەپتىڭ قۇرىلىسى باستالىپ تا كەتتى. بىلتىر اۋليەكول اۋدانىنا قاراستى امانقاراعاي اۋىلىندا اپاتتى جاعدايدا تۇرعان ەسكى مەكتەپتىڭ ورنىنا جاڭا مەكتەپ سالىنا باستاعان. ونىڭ قۇرىلىسى بيىل شىلدە ايىندا اياقتالماق. قالعان ەكى مەكتەپ 2023 جىلعا دەيىن سالىنىپ، پايدالانۋعا بەرىلەدى.  

ورال قاپپاسوۆ الداعى ۋاقىتتا مەكتەپكە دەيىنگى ءبىلىم بەرۋ سالاسىن دامىتۋ باعىتىندا دا قىرۋار شارۋا كۇتىپ تۇرعانىن ايتتى. وبلىستا ءبىلىم مەن عىلىمدى دامىتۋدىڭ مەملەكەتتىك باعدارلاماسى اياسىندا سوڭعى 4 جىل ىشىندە جالپى سانى 2750 ورىندىق  26 بالاباقشا ىسكە قوسىلىپ، 125 شاعىن ورتالىق تولىق جۇمىس كۇنى تارتىبىنە اۋىسقان. سوعان قاراماستان، بۇگىندە وبلىس بويىنشا 17 مىڭ بالا بالاباقشا كەزەگىندە تۇر. وڭىردە 183 بالاباقشا، 408 شاعىن ورتالىق بار. مۇندا جۇمىس ىستەپ جاتقان تاربيەشى-ۇستازداردىڭ كوبى ماماندىعى بويىنشا بەيىندى پەداگوگيكالىق ءبىلىم الماعان.

 

قوستاناي

سوڭعى جاڭالىقتار

ەلدىك نىشاندار تاريحى

قازاقستان • كەشە

ۇقساس جاڭالىقتار