مەديتسينا • 13 ناۋرىز، 2020

كەسەلدىڭ ۇلكەنى – كۇيزەلىس

357 رەتكورسەتىلدى

اقىلماندار، ادام مىنەزى-قۇلقىنىڭ ۇڭعىل-شۇڭعىلىن زەرتتەيتىن پسيحولوگتار، ءتۇرلى قيىنشىلىقتى جەڭۋگە كومەكتەسەتىن ترە­نينگتەر قاپتاعان زاماندا كىسى وزىنە نەگە قول سالادى؟ قۇدايىم-اۋ، عالامتوردى اشىپ قالساڭ دا ءومىرىڭدى عاجاپ ەتەتىن كەڭەس اتاۋ­لىنىڭ قانشاما ءتۇرى الدىڭنان شىعادى.

نە دەسەك تە، دامۋدىڭ داڭعىل جولىنا ءتۇسىپ، ۋاقىتتى ۇرلاپ كەلگەن تۇرمىس تاۋقى­مەتى­نىڭ كوپشىلىگىن تەحنيكاعا تاپسىرىپ، وركە­نيەتكە ىلەسكەن ءومىر راحاتىن كورۋدىڭ ورنىنا ءولۋدى ويلاپ تۇراتىن وندىردەي بۋىن پايدا بولدى.

ال بۇل دەرتتىڭ اتىن دەپرەسسيا دەيدى. جۇرت الىستان شىعىپ جاتقان ۆيرۋستاردىڭ اتىنان-اق قورقىپ وتىرعاندا، سۋيتسيد دەگەن كەسەل جىلىنا الەمدە 800 مىڭ ادامدى جالمايتىن بولسا، ەلىمىزدەگى جالپى سۋيتسيدتەر ستاتيستيكاسى دا كوڭىل كونشىتە قويمايدى. ويتكەنى ءومىرىن ءوزى تارك ەتكەندەر سانى 2019 جىلى 3805 ادامعا جەتىپ، 7،4 پايىزعا كوبەيدى. اسىرەسە جاسوسپىرىمدەر اراسىندا ءومىرىن تارك ەتكەندەر جەتەرلىك.

جانازاسىز ءولىم سىرىن زەرتتەپ جۇرگەن ماماندار سۋيتسيدكە بارۋدىڭ بيولوگيالىق، الەۋمەتتىك جانە سوماتيكالىق 800 ءتۇرلى سەبەبىن العا تارتسا، سونىڭ باسىم بولىگىن ايتۋدىڭ ءوزى ءتىپتى تۇككە تۇرعىسىز.

ماسەلەن، وتكەن اپتادا عانا زيالى ءبىر وتبا­سىنىڭ زياتكەرلىك مەكتەپتى بىتىرەيىن دەپ وتىرعان بالاسى ءوزىن ءوزى مەرت قىلدى. ەكى­نىڭ بىرىنە بۇيىرا بەرمەيتىن بەدەلدى مەكتەپ­تە وقىپ جاتقان، بىرەۋدىڭ كوزىنىڭ اعى مەن قارا­سىنداي جالعىز ۇلدى اجالعا نە يتەرمەلەدى؟..

سول سياقتى اقپان ايىندا ۇلىبريتانيا­داعى تانىمال «Love Island» رەاليتي-شوۋى­نىڭ جۇرگىزۋشىسى، داڭقتى دا داۋلەتتى كارولاين فلاك بار بولعانى 40 جاسىندا وزىنە ءوزى ولىمگە قيدى. ونىڭ قيسىنسىز اجالىنا كۇللى ەۋروپا تاڭعالىپ، سىرىن تاپپاي دال بولعانى بەلگىلى. ايتقانداي، وتكەن جىلى كارولاين ءوزىنىڭ جىگىتىمەن (ول دا اتاقتى تەننيسشى) كەرىسىپ قالىپ، اشۋمەن ونى ۇستەل شامىمەن قويىپ قالادى. قان شىققان جەرگە پوليتسيا ءاپ-ساتتە جەتىپ كەلىپ، جىگىتىنىڭ كارولايندى ەشقانداي كىنالامايتىنىنا، كەشىردىم دەگەنىنە قاراماستان، قىلمىستىق ءىس قوزعادى. زاڭنىڭ اتى – زاڭ. ۇلىبريتانيادا تۇرمىستىق زورلىققا كەشىرىم جوق، ەكى جاقتىڭ ءوزارا مامىلەسى قاراستىرىلماعان.

ناتيجەسىندە كەشەگى گارري بەكزادانىڭ دا سۇيىكتىسى بولعان، جۇلدىزدارمەن مۇزدا سىرعا­ناۋدا جەڭىمپاز اتانعان ايگىلى تەلەجۇر­گىزۋشى جالاقىسى تىم جوعارى جۇمىستان قۋىلادى. قول جۇمساۋشى تاراپىنان قىسىم بولماۋى ءۇشىن جىگىتىمەن ارالاسۋعا تىيىم سالىنادى.

قىسقاسى، بۇرىن دا دەپرەسسيادان ەمدەلگەن كارولاين قايتادان جان كۇيزەلىسىنە ۇشىرادى. سىرت قاراعاندا باقىتتى دا كوڭىلدى، اقشالى دا اتاقتى كارولاين دوستارىمەن ساياحاتتاپ، الەۋمەتتىك جەلىلەردە جاقسى مەيرامحانالار مەن دۇكەندەردەن پوست جازىپ جۇرگەن، ءىسى سوتقا بەرىلگەندە اقىرى جۇيكەسى سىر بەرىپ، اسىلىپ تىندى.

ەگەر ول شىدامدىلىق پەن سابىر تانىت­قاندا، بۇل كۇندەر دە ارتتا قالاتىنى ايان عوي. جازىقتى بولسا دا، ادام كوتەرە المايتىن جازاعا ۇشىرامايتىنى بەلگىلى ەدى. كوپ بولسا شارتتى تۇردە سوتتالار ەدى.

بۇدان شىعاتىن قورىتىندى – بىرەۋ. ادامنىڭ ەڭ ءبىرىنشى جاۋى – ءوزىنىڭ ويى. بىرەۋلەر تاۋداي تاۋقىمەتىن جەڭگەندە، ەندى بىرەۋلەر تۇيمەدەيدى تۇيەدەي قاسىرەتكە اينالدىرىپ، باس-اياعى بىتپەيتىن قايعىنى باسىنا جاماپ جۇرەدى.

شىنداپ كەلگەندە ميداعى ۇرەي مەن قورقىنىشتىڭ 90 پايىزى ورىندالماعان فوبيا كۇيى قالادى.

كۇللى ەۋروپانىڭ كۇيزەلەتىنى دە سول، كارولاين مىقتى بولعاندا ونىڭ داڭقى، اقىل-پاراساتى مەن كوركى وسى كۇندەرىنىڭ شىعىنىن قايتارىپ بەرگەن بولار ەدى. اتاعى دا اقشاسىن قايتارىپ الۋعا جەتەدى. وسى وقيعادان ساباق الىپ، ءوزىن جىگەرلەندىرسە، كەرىسىنشە تۇلەگەن قۇستاي مانساپ جولىنا ورالاتىنى ءسوزسىز بولاتىن. تالايلاردىڭ باسىندا بار كيكىلجىڭ دە ۇمىت بولار ەدى.

وزىنە ءوزى قول سالعان جالعىز كارولاين ەمەس، مۇنداي مىسالدار جەتىپ ارتىلادى.

اتاقتى تەلەجۇرگىزۋشىنى العا تارتىپ وتىرعانىمىز، بۇگىندە سۋيتسيدكە باراتىندار الەۋمەتتىك قيىنشىلىقتارعا تاپ بولعاندار، قارىزعا باتقاندار، جازىلماس دەرتكە دۋشار بولعاندار، قوعامنان وقشاۋلانعاندار... دەپ جاتامىز. شىنداپ كەلگەندە، كارولايندا وسى ماسەلەلەردىڭ ءبىرى دە جوق قوي. اقشا دا، اتاق تا، سۇلۋلىق تا، دوس تا  جەتەدى. ميلليونەرلەرمەن، بەكزادالارمەن كۋرورتتاردا، ياحتالاردا ءجۇزىپ، بيزنەسس-كلاسسپەن ۇشىپ جۇرگەن بيكەش ەدى.

سوندىقتان دا جان كۇيزەلىسى دەگەن ۇلكەن دەرت، ادامدى بىرتىندەپ جالمايتىن كەسەل ەكەنىن ايتۋ كەرەك. قىسقاسى، دەپرەسسيا كوڭىل كۇيدىڭ قۇلاۋى ەمەس – كلينيكالىق دياگنوز. سىرت قاراعاندا ادامدا ءبارى دە جەتكىلىكتى، الەۋمەتتىك جەلىسى ءان مەن سانگە تولى، جەتىسىپ جۇرگەندەي بولىپ كورىنۋى ابدەن مۇمكىن، ال ويعا كىرىپ كەتكەن بۇل اۋرۋ اسقىنا كەلە الماي قويمايدى.

نە دەسەك تە، اينالىپ كەلگەندە ادامدى مەيىرىم مەن سابىر قۇتقارادى.

 

سوڭعى جاڭالىقتار

ۇقساس جاڭالىقتار