كەيىن «جادىرا» بولىپ وزگەرگەن ۇجىمعا سوڭعى 15 جىلدان بەرى مۋزىكانت ءارى سازگەر ۆلاديمير لۋشش جەتەكشىلىك ەتىپ كەلەدى. بيىل 29 جىلدىعىن اتاپ وتكەن تاۋەلسىزدىكپەن ءتول قۇرداس ءانسامبلدىڭ قۇرامىندا ەڭ جاسى 55-ءتى ەڭسەرگەن, ۇلكەنى 85-كە اياق باسقان جيىرما شاقتى اجەي ونەر كورسەتەدى. انشىلەردىڭ دەنى زەينەت جاسىندا. ونەر ۇجىمى 2016 جىلى حالىقتىق انسامبل اتاعىن الدى.
دوستىق ۇيىندەگى كونتسەرتتىك باعدارلاما اباي قۇنانباي ۇلىنىڭ 175 جىلدىق مەرەيتويى مەن جەڭىستىڭ 75 جىلدىعىنا, قازاقستان حالقى اسسامبلەياسىنىڭ 25 جىلدىعىنا ارنالعان. كونتسەرتتە «كوزىمنىڭ قاراسى», «جەلسىز تۇندە جارىق اي», «قازاعىم», ء«وز ەلىم» ءتارىزدى كوپشىلىككە بەلگىلى اندەر, سونداي-اق «استانا», «بەيبىتشىلىك ساقتالادى», «جاس قالا – رۋدنىي», «بايتاق جەرىم, قوستاناي» سياقتى وتان, تۋعان جەر, جەڭىس, بەيبىتشىلىك, دوستىق جانە ەل استاناسى تۋرالى جەرگىلىكتى اقىن-سازگەرلەردىڭ شىعارمالارى ورىندالدى.
– انسامبل قۇرامىنداعى انشىلەردىڭ كوبى بۇرىنعى مۇعالىم, ساتۋشى, مەحانيزاتور, تاربيەشى, اگرونوم, مەملەكەتتىك قىزمەتشىلەر. بۇگىندە بارلىعى ءبىر ۇجىم بولىپ حالىقتىق اندەردى ناسيحاتتاپ ءجۇر. ۇجىمدا ورىنباسار بايتوقوۆا, ءمۇسليما بايمۇرزينوۆا سىندى ەكى باتىر انا بار. ايا-سوفيا ءبىرمانوۆا مەن بايان زيناليەۆالار – وسى ءانسامبلدىڭ نەگىزىن قالاعان ارداگەر انشىلەر. – بۇگىنگى كەشتە مەن دە جەكە داۋىستا ونەر كورسەتپەكپىن. «تۋعان جەر. تورعايىم» مەن احمەت بايتۇرسىن ۇلىنىڭ «قارعاشىن», رامازان ەلەباەۆتىڭ «جاس قازاق», ودان كەيىن ەرمەك سەركەباەۆ ورىندايتىن «نادو منوي نەبو سينەە» ءانىن ايتامىن. جالپى, ءانسامبلدىڭ رەپەرتۋارىندا 100-دەن استام ءان بار. بۇگىن ورىس, ۋكارين, تاتار, پولياك تىلدەرىندە دە ءان شىرقالادى, – دەيدى ونەر ۇجىمىنىڭ جاناشىرى جاقسىلىق كاكەنوۆ.
ءان كەشىنە جينالعان حالىق دوستىق ۇيىندەگى اياداي عانا زالعا سىيماي قالدى. ءبىراز جۇرت قوسىمشا قويىلعان ورىندىقتارعا جايعاسسا, قالعانى كونتسەرتتى تۇرىپ تاماشالادى. حالىقتىق ءانسامبلدىڭ جانكۇيەر تىڭداۋشىلارى دا كوپ ۇلتتى زەينەت جاسىنداعى ەگدە كىسىلەر. «جادىرانىڭ» اندەرىن تىڭداعان سايىن جانىمىز جادىراي تۇسەدى. ءبىر تىڭداعان سوڭ ۇمىتىلىپ قالاتىن بۇگىنگىنىڭ ءبازبىر اندەرىندەي ەمەس, شىنايى سەزىمنەن تۋعان وتانشىل رۋحتاعى شىعارمالار بويىمىزعا قۋات قۇيىپ, ومىرگە دەگەن قۇشتارلىعىمىزدى ارتتىرا تۇسەدى, – دەيدى قوستانايلىق ەڭبەك ارداگەرى يبراھيم اعىتاي.
قوستاناي
