الەم • 12 ناۋرىز، 2020

ديماشتىڭ كيەۆتەگى كونتسەرتى قالاي ءوتتى؟

348 رەتكورسەتىلدى

جارقىن جۇزدەر، كوپشىلىك حور، سۇيىكتى انشىلەرىمەن قوسىلا ءان شىرقاۋ، ۇراندار جازىلعان پلاكاتتار مەن ءتۇرلى ەلدەردىڭ جالاۋلارى، ءتىپتى بىرەۋلەرى قۋانىشتان كوز جاسىنا ەرىك بەرگەن. ۋكراينانىڭ استاناسى كيەۆ قالاسىنداعى «Arnau Tour»-دىڭ كەزەكتى كونتسەرتىندە وسىنداي كورىنىس. بۇل تۋرالى dimashnews.com حابارلادى.

ديماشتىڭ مۋزىكالىق كەشى باستالۋدا، ال كورەرمەندەر نازارى تولىق ساحنادا، ولار العاشقى ءاندى اسىعا توسىپ وتىر. سپورت سارايىندا بىردە-ءبىر ورىن جوق، كورەرمەندەر لىق تولى. ولاردىڭ بىرەۋى وسىنداي كەشكە العاش رەت كۋا بولىپ وتىرسا، بىرەۋلەرى سۇيىكتى ءانشىسىنىڭ جاندى داۋىسىن تاعى ءبىر ەستۋگە كەلگەن.

ديماش ساحناعا ۋكراين ۇلتتىق كوستيۋمىن كيىپ شىعىپ، زالداعى كوپشىلىكتىڭ نازارىن وزىنە اۋداردى. الدىمەن ۋكراين تىلىندە قىمباتتى جانكۇيەرلەرىمەن امانداسقان ول كوپ كۇتتىرمەي شوۋدى باستاپ كەتتى.

ءانشى شارا بارىسىندا كوپشىلىككە بۇگىن ەرەكشە جاعدايدى باستان وتكەرگەنىن ايتتى. كيەۆتەگى كونتسەرتتىڭ ول ءۇشىن شىن مانىندە ماڭىزى جوعارى، ويتكەنى ديماشتىڭ تالانتىن وسىنداعى ادىلقازىلار دا، تىڭداۋشىلار دا العاشقىلاردىڭ قاتارىندا مويىنداعان. 2012 جىلى ۋكراينادا وتكەن «شىعىس بازارى» فەستيۆالىندە ديماش ايگىلى ءارى سۇيىكتى «دايديداۋ» ءانىن بارشاعا العاش رەت ۇسىنعان بولاتىن. ءدال وسى تەلەۆيزيالىق كونكۋرستا ول ءوزىنىڭ تۇڭعىش ۇلكەن جۇلدەسىن جەڭىپ العان ەدى.

بۇل كونتسەرت ديماشتىڭ «Golden» اتتى جاڭا انىنە بەينەبايان ءتۇسىرىلىپ جاتقاندىعىمەن ەرەكشەلەنەدى. بۇل مۋزىكالىق شوۋدىڭ ەڭ جارقىن جانە اسەرلى ۇزىندىلەرى مەن كورەرمەندەردىڭ كوڭىل-كۇيلەرىن جينايتىن تىكەلەي ەفيردەگى كليپ بولادى.

اتالعان كارتينا كونتسەپتسياسىنىڭ باستى يدەياسى – ديماشتىڭ  قىمباتتى جانكۇيەرلەرىمەن التىنداي باعالى بايلانىسى. قويىلىم كەزىندە ديماشتىڭ دا، ونىڭ تىڭدارماندارىنىڭ دا عارىشتىق ۇنقاتىسۋى بولاشاقتا كوپشىلىككە جول تارتاتىن «Golden» ءانىنىڭ اتاۋىنا تولىق سايكەس كەلەدى.

ديماشتىڭ ۋكراين تىلىندە ءان شىرقاعانى جانكۇيەرلەر ءۇشىن كەرەمەت توسىنسىي جانە جاعىمدى جاڭالىق بولعانىن دا ايتۋعا ءتيىسپىز. ءانشى ايگىلى ۋكراينالىق مۋزىكانت ۆولوديمير ۆەرمينيچ جازعان وتە اسەرلى، كوپكە تانىمال ء«چورنوبريۆتسى» ءانىن ورىندادى، ال ونىڭ ءسوزىن اتى اڭىزعا اينالعان اقىن نيكولاي سينگاەۆسكي جازعان.

ء«چورنوبريۆتسى» ءانى قاي كەزدە ورىندالسا دا ۋكرايندار اراسىندا ەرەكشە سەزىم تۋدىردى. سوندىقتان دا ديماش وسى تۋىندىنى جوعارى دەڭگەيدە ورىنداپ، كونتسەرتكە قاتىسقان ءار تىڭدارماننىڭ جۇرەگىنە جول تاپتى دەپ بىلەمىز.

ءان اياقتالعان كەزدە كورەرمەندەر دۋ قول شاپالاقتاپ، ىستىق ىقىلاستارىن ءبىلدىردى. ديماشتىڭ بۇل  كومپوزيتسياسى بارلىعىنىڭ كوڭىلىنەن شىققانى سونشالىق، ولار كوز جاستارىنا ەرىك بەردى.

ديماشتىڭ اناسى سۆەتلانا ايتباەۆا بۇل كونتسەرتتىڭ شىنىمەن ەرەكشە بولعانىن ايتادى.

«مەن دە جىلادىم، قۋانىشتان، تولقىعاننان، ارينە! سول ساتتە بۇكىل زال تولى كورەرمەننىڭ جىلاپ تۇرعانىن كوردىم! ء«چورنوبريۆتسى» ءانى بۇگىنگى قوناقتاردىڭ بارلىعىنىڭ جۇرەگى مەن سەزىمىنە اسەر ەتتى. ۋكرايناعا وسىلاي جىلى قابىلداپ، قوشەمەت كورسەتكەنى ءۇشىن انالىق پەيىلىممەن العىسىمدى بىلدىرەمىن»، دەدى ول.

سوڭعى جاڭالىقتار

بەنزين باعاسى ارزاندادى

ەكونوميكا • كەشە

14 وتباسىعا قول ۇشىن سوزدى

قازاقستان • كەشە

ۇقساس جاڭالىقتار