ەۋرازيالىق ينتەگراتسيا ينستيتۋتى مەن تۇركىستان وبلىسىنىڭ اكىمدىگى ۇيىمداستىرعان ءىس-شاراعا جەرگىلىكتى مەملەكەتتىك ورگاندار, ۇەۇ وكىلدەرى, ۇلتتىق قوعامدىق سەنىم كەڭەسىنىڭ مۇشەلەرى, عالىمدار, جۋرناليستەر مەن بلوگەرلەر قاتىستى. ءىس-شارا مودەراتورى ۇلتتىق كەڭەس مۇشەسى, ەۋرازيالىق ينتەگراتسيا ينستيتۋتىنىڭ ديرەكتورى ەرلان سايروۆ ەلىمىزدىڭ ساياسي, الەۋمەتتىك جانە ەكونوميكالىق اسپەكتىلەرىن ودان ءارى جاڭعىرتۋ مەن ترانسفورماتسيالاۋ ءۇشىن مەملەكەتتىك ورگاندار مەن ازاماتتىق قوعام اراسىندا تابىستى ديالوگ قاجەت ەكەنىن اتاپ ءوتتى. «وڭىرلەردە ساراپتامالىق تالقىلاۋلار وتكىزۋ ماڭىزدى, ويتكەنى بارلىق قازاقستاندىق قوعامنىڭ رەفورمالاردى تالقىلاۋعا قاتىسۋىنسىز, جەرگىلىكتى حالىقتىڭ پىكىرىن جانە وڭىرلەردىڭ ەرەكشەلىگىن ەسكەرمەي, «حالىق ۇنىنە قۇلاق اساتىن مەملەكەت» اتتى تۇجىرىمدامانى ساپالى جۇزەگە اسىرۋ مۇمكىن ەمەس», دەپ ەسەپتەيدى تۇركىستان وبلىستىق قوعامدىق دامۋ باسقارماسى باسشىسىنىڭ ورىنباسارى داۋرەن ساريەۆ.
«وڭىردە بارلىق اۋدان, قالا اكىمدەرىنىڭ ەسەپ بەرۋ ناۋقانى اياقتالدى. وتكەن جىلدىڭ قورىتىندىسىمەن تۇرعىندار تاراپىنان وبلىس اكىمدىگىنە جەر, الەۋمەتتىك, تۇرعىن ءۇي-كوممۋنالدىق شارۋاشىلىق جانە باسقا سالالارعا قاتىستى 4134 ءوتىنىش كەلىپ تۇسكەن. اتالعان ماسەلەلەردى شەشۋ ءۇشىن ءتيىستى باسقارما باسشىلارى مەن اۋدان, قالا اكىمدەرىنە تاپسىرما بەرىلىپ, جۇمىستار جۇيەلەندى. وبلىس اكىمى ومىرزاق ەستاي ۇلى مەن ورىنباسارلارى 809 ازاماتتى جەكە قابىلدادى. ولاردىڭ سۇراقتارىنا دەر كەزىندە جاۋاپ بەرىپ, قالعان ازاماتتارعا زاڭ تالاپتارىنا سايكەس تۇسىندىرمە بەرىلدى. ال باسقارما تاراپىنان ءاربىر وزەكتى اقپارات پەن سىني ماقالاعا قاتىستى جىلدام ارەكەت ەتۋ الگوريتمى بار. الەۋمەتتىك جەلى, باق بەتىندەگى ءاربىر سىني ماقالالار ساراپتالىپ, ەل مۇددەسىنە ساي جۇمىس اتقارىلادى. رەسمي اقپارات بەرىلەدى», دەدى باسقارما باسشىسىنىڭ ورىنباسارى. سونداي-اق د.ساريەۆ مەملەكەت تاراپىنان ءوڭىردىڭ دامۋىنا ۇلكەن قولداۋ كورسەتىلىپ جاتقانىن, وسى رەتتە باسقارما ازاماتتىق قوعام وكىلدەرىمەن, ەركىن ويلى ازاماتتارمەن بىرلەسىپ جۇمىس ىستەۋگە دايىن ەكەنىن جەتكىزدى.
جيىندا سونداي-اق بەيبىت ميتينگىلەر وتكىزۋ تۋرالى زاڭ جوباسى, قوعامدىق ينستيتۋتتاردى ودان ءارى دامىتۋ, قازاقستاندىق ءوزىن-ءوزى سەزىنۋ جانە وڭىرلىك كونتەكستە ەلدى الەۋمەتتىك جاڭعىرتۋدىڭ وزەكتى ماسەلەلەرى جان-جاقتى تالقىلاندى. «سەرپىن» ۇلتتىق ءبىلىم جانە يننوۆاتسيالار پالاتاسىنىڭ پرەزيدەنتى, ۇقسك مۇشەسى مۇرات ابەنوۆ ساياسي جۇيەنى جاڭعىرتۋعا عانا ەمەس, الەۋمەتتىك ماسەلەلەردى شەشۋگە دە نازار اۋدارۋ قاجەتتىگىن, رەفورمالار جۇيەلى تۇردە ىسكە اسىرىلۋى تيىستىگىن اتاپ ءوتتى. ال ۇلتتىق كەڭەس مۇشەسى ايگۇل ورىنبەك قوعامدى ودان ءارى دەموكراتيالاندىرۋ جانە ازاماتتاردىڭ قۇقىقتارىن قورعاۋ ءۇشىن «حالىق ۇنىنە قۇلاق اساتىن مەملەكەت» اتتى تۇجىرىمدامانى ىلگەرىلەتۋ قاجەت دەپ ەسەپتەيدى. «ميتينگىگە شىعۋشىلار دا ناقتى تالاپ, ۇستانىم بولۋى ءتيىس. قازىرگى تاڭدا ولاي بولماي تۇر. جاستاردى قۇقىقتىق ساۋاتتىلىققا ۇيرەتۋ كەرەك», دەدى ايگۇل ورىنبەك.
ۇلتتىق كەڭەستىڭ اشىق جانە جاريالى جۇمىس ىستەيتىنىن ايتىپ وتكەن ەرلان سايروۆ ۇسىنىس, تالاپ-تىلەكتەردى الەۋمەتتىك جەلى ارقىلى دا جىبەرۋگە بولاتىنىن ەسكەرتتى. ء«بىزدى حالىق تا, بيلىك تە سىنايدى. بۇل قوعامدىق جۇمىس. بىزگە دارەجە كەرەك ەمەس. تەك وزەكتى ماسەلەلەردىڭ شەشىمىن تابۋىنا سەپتىگىمىزدى تيگىزسەك دەيمىز. سوندا عانا يگى ءىس جاسادىق دەپ ايتا الامىز», دەدى ەۋرازيالىق ينتەگراتسيا ينستيتۋتىنىڭ ديرەكتورى. بۇل ورايدا تۇركىستان وبلىستىق ارداگەرلەر كەڭەسى توراعاسىنىڭ ورىنباسارى كەنجەحان تولەباەۆ تۇركىستاندا باستاۋ العان اكەلەر مەكتەبىن رەسپۋبليكادا قۇرۋ, باستاۋىش سىنىپتا ۇلتتىق ساباقتاردى وقىتۋ قاجەتتىگى جونىندە ۇسىنىسىن جەتكىزدى. «سەرپىن» ۇلتتىق ءبىلىم جانە يننوۆاتسيالار پالاتاسىنىڭ پرەزيدەنتى م.ابەنوۆ جيىندا ايتىلعان بارلىق ۇسىنىستى ەسكەرۋسىز قالدىرماۋعا ۋادە ەتتى.
تۇركىستان وبلىسى
