ايماقتار • 11 ناۋرىز، 2020

قوستانايدا تەمىر سىنىقتارىن وڭدەۋ زاۋىتى سالىنادى

24 رەتكورسەتىلدى

بۇل تۋرالى وبلىس اكىمدىگىندە وتكەن كەڭەيتىلگەن جيىندا ايماق باسشىسى ارحيمەد مۇحامبەتوۆ ايتتى.

– ءىرى جوبانى «وپەراتور روپ» سەرىكتەستىگىمەن بىرلەسە وتىرىپ جۇزەگە اسىرامىز. بۇل ەسكى اۆتوكولىكتەر مەن اۋىل شارۋاشىلىعى تەحنيكالارىن قابىلداپ، مەتال سىنىقتارىن قايتا وڭدەيتىن زاۋىت بولادى. زاۋىت قاراعاندى ۇلگىسىندە جاسالادى. تاياۋدا عانا قوس تاراپ ءوزارا كەلىسسوز جۇرگىزدىك. الداعى  اپتادا سەرىكتەستىك باسشىلارى قوستانايعا كەلەدى. مەموراندۋمعا قول قويامىز. زاۋىت قوستانايداعى يندۋستريالىق ايماقتا سالىناتىن بولادى. ونىڭ ۇستىنە، بىزدە قازىر اۋىل شارۋاشىلىعى ماشينالارىن جاساۋ جاقسى دامىپ كەلەدى. ەسكى تەحنيكانى قايتا وڭدەۋگە مۇمكىندىك بار. كاسىپورىن ارزان، نەبارى 2-3 ملرد تەڭگە تۇرادى. بۇل ماسەلەنى ءبىز ۇكىمەت دەڭگەيىندە دە تالقىلادىق، - دەدى اكىم.

جالپى، قوستاناي وبلىسىنداعى پوليگونداردا جىل سايىن 250 مىڭ توننا قاتتى تۇرمىستىق قالدىق جينالادى. ولاردى قايتا وڭدەپ، گەوتەكستيل، گەوكومپوزيت، گاز جانە سۋ جىبەرەتىن پوليەتيلەندى قۇبىر، توسەنىش تاس، قۇدىق قاقپالارى، جۇمىرتقا ۇياشىقتارى سياقتى 10 ءتۇرلى ءونىم شىعاراتىن 6 كاسىپورىن بار.

 

قوستاناي

سوڭعى جاڭالىقتار

عاسىر زۇلماتى

قوعام • كەشە

ۇقساس جاڭالىقتار