قوستاناي وبلىسى توتەنشە جاعدايلار دەپارتامەنتىنىڭ باستىعى تالعات كاكىموۆتىڭ ايتۋىنشا, بيىل قىزىل سۋدان كەلەتىن قاۋىپتىڭ الدىن الۋ جانە جويۋ جۇمىستارىنا وبلىستىق بيۋدجەتتەن 27 ملن تەڭگە قارجى ءبولىنىپ وتىر. مۇنىڭ سىرتىندا, سۋ تاسقىنىن اۋەدەن باقىلاۋعا 10 ملن تەڭگە قاراستىرىلعان. وڭىردە 52 قۇتقارۋ بەكەتى جاساقتالىپ, قاۋىپ ءتونىپ تۇرعان ەلدى مەكەندەردەگى جاعدايدى قاتاڭ باقىلاۋعا العان. وعان قاجەتتى 150 توننا جانارماي, 10 مىڭ توننا ينەرتتى ماتەريال, 50 مىڭ قاپ قۇم دايىن تۇر. وبلىستا كوكتەمگى سۋ تاسقىنى بولا قالعان جاعدايدا 349 تەحنيكا, 200-گە جۋىق سۋ سورعىش قۇرىلعى جانە 100 شاقتى قايىق جۇمىلدىرىلماق. قازىردىڭ وزىندە بىرقاتار وزەننىڭ سۋ ارناسىن ارشۋ ءۇشىن مۇز جارۋ جۇمىستارىن جۇرگىزۋ جوسپارلانىپ وتىر. بۇل باعىتتاعى الدىن الۋ شارالارى بەيىمبەت مايلين اۋدانىنداعى ايەت وزەنى مەن اۋليەكول اۋدانىنداعى بىرنەشە وزەن-كولدەن باستالدى. بيىل مۇز جارۋ جۇمىستارىنا وبلىستىق بيۋدجەتتەن 9 ملن تەڭگە قاراستىرىلىپ وتىر.
تاياۋدا رەسپۋبليكا كولەمىندە ۇيىمداستىرىلعان «كوكتەم- 2020» شاراسى اياسىندا كەشەندى وقۋ-جاتتىعۋ شارالارى ءوتىپ, قۇتقارۋشىلاردىڭ كوكتەمگى تاسقىنعا دايىندىعى تەكسەرىلدى. ءىس-شاراعا ازاماتتىق قورعانىس جۇيەسىنىڭ ورگاندارى, توتەنشە جاعدايلاردىڭ الدىن الۋ جانە جويۋ جونىندەگى كوميسسيالار مەن اپاتتىق-قۇتقارۋ قۇرىلىمدارى قاتىستى.
جاتتىعۋ بارىسىندا بايلانىس جۇيەلەرى مەن ديسپەتچەرلىك قىزمەتتەردىڭ دايىندىعى, ماتەريالدىق-تەحنيكالىق, ازىق-ت ۇلىك جانە مەديتسينالىق رەزەرۆتەردىڭ قورى تەكسەرىلدى.
جەرگىلىكتى اتقارۋشى ورگاندار وزەن جاعالاۋلارىنداعى جىرىلۋ قاۋپى بار جەرلەردەگى بوگەتتەردى مىقتاپ, ەۆاكۋاتسيا بولا قالعان جاعدايدا تۇرعىنداردى توسەك-ورىنمەن جانە ىستىق تاماقپەن قامتاماسىز ەتۋ جايىن رەتتەدى. جەدەل قيمىل جاساقتارى سۋ باسۋ قاۋپى بار وتكەلدەردەگى كوپىرلەر مەن قۇبىر ارنالارىن تازالاپ, قۇم تولتىرىلعان قاپتار مەن ينەرتتى ماتەريالداردىڭ جەتكىلىكتى مولشەردە ەكەنىنە كوز جەتكىزدى.
وڭىردەگى سۋ تاسقىنىنا دايىندىق جۇمىستارىن وبلىس باسشىسى ا.مۇحامبەتوۆ ءوزىنىڭ تىكەلەي باقىلاۋىنا العان. الداعى اپتادا رەسەيدىڭ قوستاناي وبلىسىمەن شەكارالاس جاتقان ايماقتارىنان ماماندار كەلۋى ءتيىس. كورشىلەس وبلىستاردىڭ قۇتقارۋشىلارى باس قوسىپ, تاجىريبە ءبولىسىپ جانە قولدا بار مالىمەت, بولجامداردى سالىستىرىپ, كوكتەمگى سۋ تاسقىنىنا دايىندىق بارىسىن تاعى ءبىر پىسىقتاپ الۋدى جوسپارلاپ وتىر.
قوستاناي
