ساپار بارىسىندا ەلباسى نۇرسۇلتان نازارباەۆ رەسەي پرەزيدەنتى ۆلاديمير پۋتينمەن كەزدەستى. تاراپتار ەاەو اياسىنداعى ارىپتەستىك ماسەلەلەرىن تالقىلادى.
ەلباسى رەسەي قازاقستاننىڭ بارلىق سالاداعى سەنىمدى سەرىكتەسى بولىپ قالا بەرەتىنىن اتاپ ءوتتى.
– ينتەگراتسيالىق بىرلەستىك جۇمىس ىستەپ تۇر جانە بولاشاعى زور دەپ سانايمىن. قۇرمەتتى توراعا رەتىندە مەن ونىڭ ودان ءارى دامۋىنا كۇش سالامىن, – دەدى نۇرسۇلتان نازارباەۆ.
ەلباسى ەكى ەلدىڭ ءوزارا قارىم-قاتىناسى تاتۋ كورشىلىك پەن وداقتاستىق قاعيداتتارىنا تولىق سايكەس دامىپ كەلە جاتقانىن ءسوز ەتتى.
سونىمەن قاتار نۇرسۇلتان نازارباەۆ پەن ۆلاديمير پۋتين عىلىم-ءبىلىم سالاسىنداعى ىنتىماقتاستىق ماسەلەلەرىنە ەرەكشە ءمان بەردى.
ءوز كەزەگىندە ۆلاديمير پۋتين قازاقستاننىڭ تۇڭعىش پرەزيدەنتى ينتەگراتسيالىق ۇدەرىستەردى دامىتۋعا جانە ەكى ەل اراسىنداعى ستراتەگيالىق ارىپتەستىكتى نىعايتۋعا سۇبەلى ۇلەس قوسقانىن اتاپ ءوتتى.
– بىزدە ساياسي ديالوگ جالعاسىپ جاتىر. ءبىز پرەزيدەنت قاسىم-جومارت توقاەۆپەن ۇدايى كەزدەسىپ تۇرامىز. ەلدەرىمىزدىڭ ۇكىمەتتەرى ۇيلەسىمدى جۇمىس ىستەۋدە. وتكەن جىلى تاۋار اينالىمى 19,7 پايىزعا ءوسىپ, 20 ملرد دوللارعا جەتتى. بۇل – جاقسى كورسەتكىش, – دەدى رەسەي پرەزيدەنتى.
سونداي-اق تاراپتار حالىقارالىق كۇن تارتىبىندەگى وزەكتى ماسەلەلەردى تالقىلادى جانە الەمدىك كومىرسۋتەك نارىعىندا قالىپتاسقان جاعداي بويىنشا پىكىر الماستى.
وسى جۇمىس ساپارىنىڭ بارىسىندا ەلباسى نۇرسۇلتان نازارباەۆتىڭ م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنە بارۋى جوسپارلانىپ وتىر.
ورىنبەك وتەمۇرات,
«Egemen Qazaqstan» – ماسكەۋدەن (رەسەي)
