Tika Turkey, «قازاقپارات» اق جانە «مەديا دامىتۋ قورىنىڭ» ۇيىمداستىرۋىمەن وتكەن «جاڭا باق» مودۋلدىك وقىتۋ كۋرسى 2-6 ناۋرىز ارالىعىندا ءوتتى. وقۋ بارىسىندا قاتىسۋشىلار الەۋمەتتىك جەلىلەر ستاتيستيكاسىن پايدالانۋ, جەلىدەگى قوعامدىق باسقارۋ جانە SEO, پودكاست ارقىلى جاڭالىق باعدارلاماسىن جاساۋ سىندى ءتۇرلى تاقىرىپتا دارىستەر تىڭداپ, الەۋمەتتىك جەلىلەردە كرەاتيۆتى جاڭالىقتار بەرۋدى ۇيرەندى. وقىتۋ كۋرسىن TRT Istanbul Radiosu تسيفرلىق مەديادا كونتەنتتى باسقارۋ مامانى حالە ايدومۋش جۇرگىزدى.
بۇگىن 5 كۇندىك كۋرستىڭ ناتيجەسى شىعارىلىپ, قاتىسۋشىلارعا ارنايى سەرتيفيكات تابىستالدى. سالتاناتتى شاراعا قاتىسقان تۇركيانىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي وسىنداي سەمينارلار ەكى ەل اراسىنداعى قارىم-قاتىناستى ودان ءارى دامىتاتىنىنا سەنىم ءبىلدىردى.
«وسى پايدالى سەميناردى ۇيىمداستىرعان Tika ۇيىمى مەن «قازاقپارات» اگەنتتىگىنە العىس بىلدىرەمىن. مودۋلدىك وقىتۋ كۋرسىنا قاتىسقاندار العان بىلىمدەرىن تاجىريبە جۇزىندە پايدالانادى دەپ سەنەمىن. جالپى, مەديا سالاسىندا ءتالىم الۋعا قاتىستى جاس تىلشىلەر تاراپىنان ۇلكەن قىزىعۋشىلىقتى بايقاپ وتىرمىز. الداعى ۋاقىتتا تۇركياداعى ءتيىستى ۇيىمدارمەن بىرلەسىپ, جىلدىق جوسپاردى حابارلايتىن بولامىز. ەكى ەل اراسىندا وسى سالادا بايلانىستى نىعايتۋ, ءبىر-ءبىرىمىزدىڭ تاجىريبەلەرىمىزدى يگەرۋ وتە ماڭىزدى دەپ بىلەمىن. سوندىقتان قازاقستاندا قىزىق جوبالاردى جوسپارلايتىن بولامىز», دەدى ۋفۋك ەكيدجي.
سونداي-اق «قازاقپارات» حاا» اق باسقارما توراعاسى اسقار ۋماروۆ بىلىكتى مامانداردىڭ قاتىسۋىمەن وتكەن تاجىريبە الماسۋ كۋرسىنىڭ ماڭىزدىلىعىن اتاپ ءوتتى.
«وسى اپتانىڭ ىشىندە ءدارىس بەرگەن ۇستازدار ەلەۋلى ەڭبەك ەتتى. مەنىڭ ويىمشا, بىلىكتى مامانداردىڭ قاتىسۋىمەن وتكەن بۇل تاجىريبە الماسۋ وتە ماڭىزدى بولدى. تۇركيادا مەديا سالاسى وتە دامىعان. ءبىز تۇركيادان ۇيرەنسەك, سونداي-اق تۇركيالىق ماماندار ءبىزدىڭ تاجىريبەمىزدى ۇيرەنسە – بۇل وتە جەمىستى ىنتىماقتاستىق بولادى. «قازاقپارات» حاا» اق وسى تەكتەس شارالارعا قولداۋ جاساۋعا دايىن», دەدى اسقار ۋماروۆ.
ءوز كەزەگىندە ءسوز العان قازاقستانداعى Tika وكىلى ەۆرەن رۋتبيل سەمينارلار مەن ترەنينگتەر تۇركيادا جالعاسىن تاباتىنىن ايتتى.
«بيىل وقىتۋ شارالارى قازاقستاندا باستالدى, ەندى ونىڭ جالعاسى تۇركيادا وتەدى. «Qazaqstan» جانە «حابار» تەلەارنالارى, «قازاقپارات» اگەنتتىگى سەكىلدى ماڭىزدى بۇقارالىق اقپارات قۇرالدارىمەن بىرلەسكەن جوبالار ماڭىزدى. وسى ورايدا «قازاقپارات» ءبىزدىڭ باستى سەرىكتەستەرىمىزدىڭ ءبىرى ەكەنىن اتاپ وتكەن ءجون. 2020 جىلى جانە الداعى جىلدارى دا وسى سياقتى جوبالار جالعاساتىن بولادى», دەدى ەۆرەن رۋتبيل.
