- وزدەرىڭىزگە بەلگىلى, مەملەكەت باسشىسى قاسىم-جومارت كەمەل ۇلى توقاەۆتىڭ جارلىعىنا سايكەس, كوپبالالى انالاردى «التىن القا» جانە «كۇمىس القامەن» ماراپاتتاۋ تۋرالى شەشىم قابىلدانعان بولاتىن. وسى جارلىق بويىنشا بيىل قوستاناي وبلىسىندا تۇراتىن 23 اناعا ماراپاتتار تاپسىرىلادى. بۇل مەملەكەت تاراپىنان كوپبالالى وتباسىلاردى قولداۋعا ۇزدىكسىز قولداۋ كورسەتۋدىڭ ءبىر عانا كورىنىسى. بۇگىندە قوستاناي وبلىسىندا 5589 كوپبالالى وتباسى تۇرىپ جاتىر. جىل باسىنان بەرى بۇل وتباسىلارعا ارنايى جاردەماقى تولەنىپ جاتىر. سونىمەن قاتار بالالارعا مەملەكەتتىك الەۋمەتتىك پاكەتتەر بەرىلە باستادى. الداعى ۋاقىتتا بۇل قولداۋ تۇرلەرى جالعاسىن تاباتىن بولادى, - دەگەن ايماق باسشىسى التىن قۇرساق باتىر انالارعا ىزگى تىلەككە تولى قۇتتىقتاۋ ءسوزىن ارنادى.
اۋليەكول اۋدانىنا قاراستى ايسارى اۋىلىندا تۇراتىن ايناگۇل قاپسابىروۆا 6 بالا تاربيەلەپ وتىر. – بۇگىن وسىندا وتىرعان ءاربىر انا ءۇشىن ماڭىزدى كۇن. وسى ءساتتى پايدالانا وتىرىپ كوپ بالالى انالارعا قولداۋ-كومەك كورسەتىپ كەلە جاتقان مەملەكەتىمىزگە مىڭ العىس ايتقىم كەلەدى. سىزدەردىڭ ارقالارىڭىزدا ساليقالى ۇرپاق ءوسىرىپ وتىرعان جايىمىز بار. كەز كەلگەن مەملەكەتتىڭ بولاشاعى – ونىڭ سانالى ۇرپاعى. بۇگىنگى ءسابي ەرتەڭگى ەل ازاماتى. بۇگىن بىزگە كورسەتىپ وتىرعان قۇرمەت, قامقورلىقتارىڭىز ەرتەڭ وسى كوپ بالالى وتباسىلاردا ءوسىپ-ونگەن بالالاردان قايتادى. ولار وتانىنا, تۋعان جەرىنە دەگەن سۇيىسپەنشىلىكپەن تالماي ەڭبەك ەتىپ, ەل ەرتەڭىنىڭ ەڭسەلى بولۋىنا ۇلەس قوسادى دەپ سەنەمىن. وتانىمىزعا تىنىشتىق, ەلىمىزگە بىرلىك پەن بەرەكە تىلەيمىن! – دەدى باتىر انا.
بۇگىندە قوستاناي وبلىسىندا التىن القالى 1588, كۇمىس القالى 3469 انا تۇرادى. 1277 انا «باتىر انا» مەدالى مەن 1 جانە 2 دارەجەلى «انا داڭقى» وردەنىن تاققان.
وڭىردە قازىرگى تاڭدا 6 مىڭعا جۋىق كوپ بالالى وتباسى مەملەكەتتىك جاردەماقى الادى. وبلىستا كوپ بالالى انالاردى باسپانامەن قامتۋ ماسەلەسىدە بىرتە-بىرتە شەشىم تابا باستاعانداي. بۇل يگى ىسكە «باقىتتى وتباسى» مەملەكەتتىك تۇرعىن ءۇي باعدارلاماسى ەرەكشە سەرپىن بەرىپ وتىر. اتالمىش باعدارلاما بويىنشا بىلتىر جالپى قۇنى 1 ملرد تەڭگەدەن اساتىن 157 جەڭىلدەتىلگەن نەسيە بەرىلىپ, 34 وتباسى باسپانا باقىتىنا يە بولىپ وتىر. «باقىتتى وتباسى» باعدارلاماسى كاسىپكەرلەر تاراپىنان دا قولداۋ تاۋىپ وتىر. باعدارلاما باستالعالى ءوڭىردىڭ جومارت جۇرەك ازاماتتارى 60 كوپ بالالى وتباسىنى باسپانامەن قامتىپ وتىر.
قوستاناي
