– قازىرگى قازاق قىزدارى بۇرىنعىدان دا سۇلۋ. بىراق ولار ءوز قادىرى مەن باعاسىن بىلمەي ءجۇر دەپ ويلايمىن. مەن «قازاق قىزى» دەگەن كىتاپتى باستادىم. بۇل قادامىما ءبىر وقيعا تۇرتكى بولدى. بىردە نۇر-سۇلتانداعى جيىندا ارىپتەستەرىمىزبەن وتىرعانبىز. ەسىك جاقتان ساقالى قاۋعاداي وزگە ۇلت ازاماتى قازاق قىزىن جەتەكتەپ الىپ كىردى. ونىڭ ارتىنشا كىرگەن, قارىندارى قامپيعان, ساقال-مۇرتتارى ءوسىپ كەتكەن الگى ازاماتتىڭ جەرلەستەرىنىڭ جانىندا دا ءبىر-ءبىر قاراكوز سىڭلىلەرىم. ءىشىم ورتەنىپ, كوزىمە جاس كەلدى. ماسەلەنىڭ ءمانجايىن زەرتتەدىم. ءساتى ءتۇسىپ, ءتىپتى الگى ەركەكتەن دە سۇرادىم. جاسى كەلگەن مەن جيىركەنەتىن سول ازاماتقا قازاق قىزىنىڭ ساتىلعانىن ءبىلىپ, جۇرەگىم قان جىلادى. ءبىز قالايشا مۇنداي كۇيگە تۇستىك؟ – دەيدى كۇليا سمايىلحانقىزى.
ارىپتەسىمىزدىڭ ايەل زاتىنىڭ جۇمىسباستى بولۋىنا قاتىستى دا كوزقاراسى بولەكتەۋ. قىزمەتتىك ءداۋىر – ۋاقىتشا, بۇگىن قاجەت بولعانىمەن, ەرتەڭ جاسىڭ كەلگەندە كەرەك ەمەس بولىپ قالاسىڭ, دەيدى ول. «ايەلدىڭ عۇمىرىندا بارلىعى شەكتەۋلى. قىز داۋرەنىنىڭ ءوز ۋاقىتى بار, انا بولۋ باقىتى 40 جاسقا دەيىن دەگەن سەكىلدى. ايەل زاتىنىڭ نەگىزگى ميسسياسى – انا بولۋ. بارلىعىنا ۇلگەرۋ كەرەك. قىزمەت پەن وتباسى تاڭداۋعا تۇسەتىن دۇنيە ەمەس. «مەن قىزمەت ىستەپ ءجۇرىپ, كۇيەۋگە تيمەي قالدىم. بالالى بولا المادىم», دەۋ دۇرىس ەمەس. ول سەنىڭ ماسەلەڭ. سەبەبى سەن ءبىر دۇنيەنى ەكىنشى نارسەمەن شاتاستىرىپ الماستىردىڭ. ەرتەڭ قارتايعاندا اۋزىڭا سۋ تامىزىپ, اقتىق ساپارعا شىعارىپ سالاتىن, تابىتىڭدى كوتەرەتىن – پەرزەنتتەرىڭ. ۇجىمداس, ارىپتەستەرىڭ سەنى جۇمىس ورنىڭنان شىعارىپ سالمايدى عوي. وسىنى ەستە ۇستاۋ كەرەك. ايەل بولۋعا, انا بولۋعا ۋاقىت تاپپاساڭ, ەشكىمگە وكپەلەۋدىڭ قاجەتى جوق», دەيدى كۇليا سمايىلحانقىزى. جيىرما جىلدان استام ۋاقىت مەملەكەتتىك قىزمەتتە بولعان, بۇگىندە كاسىپوداق سالاسىندا جۇرگەن ول بارلىق ۋاقىتتا مۇمكىندىگىنشە قاراپايىم بولۋعا تىرىسقانىن ايتادى. ەگەر اتقارعان قىزمەتىڭنىڭ حالىققا پايداسى تيمەسە, ناتيجە شىقپاسا ورىندى بوساتۋ قاجەت دەپ ەسەپتەيدى. كوپ بالالى انالارىمىزدىڭ اكىمشىلىكتەرگە بارىپ, الاڭدارعا شىعىپ, ميتينگىلەر ۇيىمداستىرىپ جۇرگەنى قازاق ايەلىنە جاراسپايتىن قىلىق ەكەنىن ايتادى. «بالاسىن دالاعا, دارەتحاناعا تاستاعان بەزبۇيرەك انانى كورسەتتىك. ەندى كوشەگە شىعارىپ, ۇرانداتىپ جاتىرمىز. بالا – اللانىڭ مەملەكەتكە ەمەس, ساعان بەرگەن سىيى! قازىرگى انالارىمىزدىڭ كوشەگە شىعىپ, كەۋدەسىن ۇرعىلاپ «مەن كوپ بالالى انامىن», دەگەنى دۇرىس ەمەس. قازاق كەسىر مەن ەلدىڭ كوزى تيمەسىن دەپ بالانىڭ سانىن ەش ۋاقىتتا ايتپاعان. قۇداي پەرزەنتتەن ايىرىلىپ قالۋدان ساقتاسىن. انا دەگەن بالانىڭ تىلەۋىن تىلەپ, شۇكىرشىلىك ەتىپ, تىنىش قانا جۇرەتىن جان. ەڭبەك ەتسەڭ, مىندەتتى تۇردە بەرەكەتى بولادى. كەزىندە ءبىزدىڭ انالارىمىز 5 سوممەن-اق كۇن كورگەن. وكىنىشكە قاراي, قازىرگى انالاردىڭ كوبىندە تاۋبە جوق. ءوزى ءۇشىن تۋعان بالالارىن مەملەكەتكە مىندەت قىلعان انالاردان قورقامىن», دەيدى كۇليا سمايىلحانقىزى.
تۇركىستان وبلىسى
