دەپۋتاتتار مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىن جانە سايلاۋالدى باعدارلاماسىن, سونداي-اق جالپىۇلتتىق «بىرگە» ناۋقانى كەزىندە الىنعان ۇسىنىستاردى ەسكەرە وتىرىپ, زاڭ كومەگىن دامىتۋدىڭ ماڭىزدى باعىتتارىن تالقىلاۋدى ماقسات ەتىپ قويدى.
پارلامەنتتىك تىڭداۋعا قاتىسۋشىلار ازاماتتاردىڭ قۇقىقتارىن قورعاۋدىڭ كەپىلدىكتەرىن ارتتىرۋ, مەملەكەت كەپىلدىك بەرگەن زاڭ كومەگىن كورسەتۋ جۇيەسى جانە سوت پروتسەسىنە قاتىسۋشىلاردىڭ باسەكەگە قابىلەتتىلىگى مەن تەڭدىگىن قامتاماسىز ەتۋ, سونداي-اق جان-جاقتى الەۋمەتتىك-قۇقىقتىق كومەك كورسەتۋ جۇيەسىن جانە زاڭ كومەگىنىڭ ساپاسىن قامتاماسىز ەتۋ سالاسىنداعى زاڭنامانى جانە قۇقىق قولدانۋ تاجىريبەسىن جەتىلدىرۋگە ەرەكشە نازار اۋدارۋدى جوسپارلايدى.
سونىمەن قاتار وتىرىستا حالىقتى زاڭ قىزمەتتەرىمەن قامتۋ, زاڭ كومەگىن كورسەتۋ سالاسىنداعى تسيفرلاندىرۋ, ادۆوكاتتار, نوتاريۋستار, زاڭ كەڭەسشىلەرى جانە جەكە سوت ورىنداۋشىلارىنىڭ قىزمەتىن جەتىلدىرۋ ماسەلەلەرىن تالقىلاۋ قاراستىرىلعان.
ءىس-شاراعا دەپۋتاتتارمەن قاتار كونستيتۋتسيالىق كەڭەستىڭ, جوعارعى سوتتىڭ, باس پروكۋراتۋرانىڭ, ۇلتتىق قاۋىپسىزدىك كوميتەتىنىڭ, سىبايلاس جەمقورلىققا قارسى ءىس-قيمىل اگەنتتىگىنىڭ, ادىلەت, ىشكى ىستەر مينيسترلىكتەرىنىڭ وكىلدەرى شاقىرىلدى.
سونداي-اق تىڭداۋعا رەسپۋبليكالىق زاڭگەرلەر كوللەگياسىنىڭ, جەكە سوت ورىنداۋشىلارىنىڭ رەسپۋبليكالىق پالاتاسىنىڭ, رەسپۋبليكالىق نوتارياتتىق پالاتانىڭ, ۇكىمەتتىك ەمەس ۇيىمداردىڭ, عىلىمي قوعامداستىقتىڭ وكىلدەرى جانە حالىقارالىق ساراپشىلار قاتىسادى دەپ كۇتىلۋدە.
پارلامەنتىك تىڭداۋدىڭ قورىتىندىسى بويىنشا ۇسىنىمدار قابىلدانادى.
