مەديتسينا • 05 ناۋرىز، 2020

كوروناۆيرۋس: ساقتىق شارالارى كۇشەيتىلدى

657 رەتكورسەتىلدى

كوروناۆيرۋستىڭ الدىن الۋ شارالارىن ودان ءارى كۇشەيتۋ ماقساتىندا قازاقستاننىڭ باس سانيتارلىق دارىگەرى جانداربەك بەكشين قاۋلى جاريالادى. جاڭا قۇجاتپەن تانىستىرعان دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ ىندەتكە بايلانىستى ەلدەگى جانە الەمدەگى جاعدايعا دا توقتالدى.

قاۋلىعا سايكەس 1-ساناتقا ەنەتىن ەلدەر 1 «ا» جانە 1 «ب» سياقتى ەكى توپقا جىكتەلدى. سوڭعى ەكى اپتا ىشىندە 1 «ا» توبىنداعى ەلدەرگە بارعان ادامدار قازاقستانعا كەلگەن سوڭ ستاتسيوناردا 14 كۇن وقشاۋلانادى. 1 «ا» توبىنداعى ەلدەر – قىتاي مەن يران يسلام رەسپۋبليكاسى. ال 1 «ب» توبىنداعى ەلدەردەن كەلگەندەر 14 كۇن ءۇي كارانتينىندە بولۋى شارت. 1 «ب» توبىنا وڭتۇستىك كورەيا، گونكونگ، ماكاو، تايۆان، جاپونيا جانە  يتاليا جاتادى. بۇل شارا رەسمي جانە ۇكىمەتتىك دەلەگاتسيالارعا، قىزمەتتىك جانە ديپلوماتيالىق پاسپورت يەلەرىنە، اۆياكومپانيانىڭ ۇشقىشتارى مەن ەكيپاج مۇشەلەرىنە، لوكوموتيۆ بريگادالارى مەن تەمىرجول كولىگىمەن بايلانىستى تۇلعالارعا، سونداي-اق حالىقارالىق اۆتوموبيل تاسىمالدارىمەن اينالىساتىن جۇرگىزۋشىلەرگە قاتىستى ەمەس.

فرانتسيا، گەرمانيا، تايلاند، ازەربايجان سياقتى 2-ساناتقا ەنەتىن مەملەكەتتەردەن كەلگەن جولاۋشىلار 14 كۇن مەديتسينالىق قىزمەتكەردىڭ قوڭىراۋ شالۋى ارقىلى باقىلانادى. بۇعان وسى ەلدەردە بولعان رەسمي جانە ۇكىمەتتىك دەلەگاتسيالاردىڭ مۇشەلەرى، قىزمەتتىك جانە ديپلوماتيالىق پاسپورت يەلەرى، اۋەكومپانيالاردىڭ ۇشقىشتارى مەن ەكيپاج مۇشەلەرى، لوكوموتيۆ بريگادالارى، تەمىرجول كولىگىمەن بايلانىستى ادامدار، سونداي-اق 1-ساناتتاعى ەكى توپتاعى ەلدەردەن حالىقارالىق اۆتوموبيلمەن جۇك تاسىمالدايتىن جۇرگىزۋشىلەر ەنەدى.

3-ساناتتاعى مەملەكەتتەردىڭ قاتارىندا بىرىككەن اراب امىرلىكتەرى، يسپانيا، مالايزيا، يراك، شۆەيتساريا، ۇلىبريتانيا، باحرەين، كۋۆەيت، سينگاپۋر، اقش بار. بۇل ەلدەردەن كەلگەندەر تەك ساۋالداما تولتىرىپ، ەسەپكە الىنادى.

وسىدان كەيىن د.احمەتشارىپ كوروناۆيرۋس بويىنشا ەلىمىزدەگى جانە الەمدەگى جالپى جاعدايدى باياندادى. «1 اقپان مەن 1 ناۋرىز ارالىعىندا بارلىق ەلدەردەن 1 606 851 ادام كەلدى. ولاردىڭ 938 309-ى ەۋرازيالىق ەكونوميكالىق وداقتان كەلگەندەر. 6 اقپان مەن 1 ناۋرىز ارالىعىندا قىتايدان 32 456 ادام كەلگەن. 20 اقپان مەن 4 ناۋرىز ارالىعىندا قىتايدان كەلگەن 315 ادامنىڭ 64-ءى – قازاقستان ازاماتى، 251-ءى – شەتەلدىكتەر. سونىڭ ىشىندە 248 قىتاي ازاماتى كارانتيندە جاتىر. ال يراننان  24 ادام كەلدى. 9-ى قازاقستاندىق بولسا،  15-ءى –  يراندىق. ولاردىڭ 63-ءى لابوراتوريالىق تەكسەرۋدەن ءوتتى، ۆيرۋس انىقتالعان جوق. 1 «ب» توبى بويىنشا 512 ادام ءۇي كارانتينىندە. ولاردىڭ 393-ءى  قازاقستان ازاماتى بولسا، 119-ى – شەتەلدىكتەر. اتاپ ايتقاندا، 50-ءى – وڭتۇستىك كورەيا، 65-ءى – يتاليا، 4-ءى – جاپونيا ازاماتى. جرۆي جانە تۇماۋ بەلگىلەرىمەن 12 ادام ستاتسيونارعا جاتقىزىلدى. ولاردىڭ 9-ى وڭتۇستىك كورەيادان كەلسە، بىرەۋى يتاليادان، ال ەكەۋى مالتادان كەلگەن»، دەدى ول.    

رەسمي وكىلدىڭ مالىمەتىنشە، 20 اقپان مەن 3 ناۋرىز ارالىعىندا 2-ساناتقاا جاتاتىن سينگاپۋر، تايلاند، ازەربايجان ەلدەرىنەن جالپى 1965 ادام  مونيتورينگقا الىنعان. ولار العاشقى 14 كۇن بويى دارىگەردىڭ باقىلاۋىندا بولادى. بۇگىندە ولاردىڭ ءبىرى قاشىقتىق باقىلاۋدا. 15 ادام لابوراتوريالىق تەكسەرۋدەن ءوتىپ، 14-ىندە ۆيرۋس انىقتالعان جوق. قالعان ءبىر ازاماتتىڭ قان سىناماسى تەكسەرىلۋدە. «1 اقپاننان باستاپ 2-سانات بويىنشا جرۆي جانە تۇماۋ بەلگىلەرىمەن 23 ادام اۋرۋحاناعا جاتقىزىلدى. ولاردىڭ 11-ءى تايلاندتان، 3-ءى سينگاپۋردان، 1-ءى مالايزيادان، 3-ءى كورەيادان،  3-ءى گونكونگتان، ال 2-ءى ازەربايجاننان كەلگەن. ولاردىڭ 12-ءسى اۋرۋحانادان شىعارىلدى، 11 ادام ءالى ستاتسيوناردا. وسى ارالىقتا تايلاندتان – 689،  وڭتۇستىك كورەيادان  – 527، گونكونگتان – 97، جاپونيادان – 42، يران يسلام رەسپۋبليكاسىنان – 14، مالايزيادان – 1، ازەربايجاننان – 1، سينگاپۋردان 9 ادام كەلدى»، دەيدى د.احمەتشارىپ.

3-ساناتقا باحرەين، ۇلىبريتانيا، گەرمانيا، يسپانيا، كۋۆەيت، مالايزيا، بىرىككەن اراب امىرلىكتەرى، اقش جانە فرانتسيا كىرەدى.  «20 اقپان مەن 4 ناۋرىز ارالىعىندا 4 985 ادام 24 كۇن بويى دارىگەردىڭ باقىلاۋىندا بولدى. لابوراتوريالىق تەكسەرىستەن 2 ادام ءوتتى، بىرەۋىنىڭ ناتيجەسى تەرىس بولىپ، ەكىنشى اناليز تەكسەرىلۋدە. 1 اقپاننان باستاپ 3 كاتەگوريا بويىنشا جرۆي جانە تۇماۋ بەلگىلەرىمەن 15 ادام اۋرۋحاناعا جاتقىزىلدى. ولاردىڭ بىرەۋى فرانتسيادان، 11-ءى دۋبايدان، بىرەۋى مالايزيادان، تاعى ءبىرى گوللانديادان كەلگەن. ال ءبىر ادام بايلانىستا بولعان. بۇلاردىڭ 3-ءى اۋرۋحانادان شىعارىلدى»، دەيدى رەسمي وكىل.

ىندەتتىڭ وشاعى بولعان قىتايدا كوروناۆيرۋستى جۇقتىرعانداردىڭ سانى 80 302-گە جەتىپ، 2946-سى قايتىس بولعان. ال ەمدەلىپ شىققانداردىڭ سانى – 47 260  ادام. 30 096 ناۋقاس ءالى كۇنگە اۋرۋحانادا ەمدەلۋدە.  د.احمەتشارىپتىڭ ايتۋىنشا، كوز جۇمعانداردىڭ ورتاشا جاسى – 75 جاس. ەڭ جاسى 78-دە، ال ەڭ ۇلكەنى 89 جاستاعى قاريا.  «الەم بويىنشا 76 ەلدە  12 575  ناۋقاس تىركەلگەن. ولاردىڭ 221-ءى قايتىس بولدى. يراندا – 77،  يتاليادا  – 79، وڭتۇستىك كورەيادا – 34، كرۋيزدىك لاينەردە – 7 ، جاپونيادا – 6، اقش-تا – 9، فرانتسيادا – 4، فيليپپيندە – 1، تايلاندا – 1، اۋستراليادا – 1، سان-مارينودا 1 ادام قايتىس بولدى. تاۋلىكتىك ءوسىم 24،1 پايىزدى قۇرايدى»، دەيدى دەنساۋلىق ساقتاۋ مينيسترلىگىنىڭ رەسمي وكىلى. 

سوڭعى جاڭالىقتار

ۇقساس جاڭالىقتار