وسى ۇلت سپورتىنىڭ ىلگەرى جىلجۋىنا ۇلەس قوسۋشىلار قاتارىندا جەتىسۋدىڭ سۋىن ءىشىپ, توپىراعانىنان ءنار العان ءبىر شوعىر توپ بار. بىلتىر وبلىس سپورتشىلارى بارلىق جارىس تۇرلەرىنەن 2537 مەدال جەڭىپ الىپ, جانكۇيەرلەرىن قۋانتىپتى. ساڭلاقتاردىڭ داڭقى مەن جەڭىسى 906 التىن مەدال, 709 كۇمىس كۇمىس جانە 922 قولا مەدالمەن باعالانعان ەكەن. ءبىر جىل ىشىندە سپورتتاعى قارىمى مەن قۋاتىن دالەلدەگەندەردىڭ قاتارى دا ءوسىپتى. ولاردىڭ قاتارىندا 1 ەڭبەك سىڭىرگەن سپورت شەبەرى, 34 حالىقارالىق دارەجەدەگى سپورت شەبەرى, 173 سپورت شەبەرى, 998 سپورت شەبەرىنە كانديدات, 922 ءبىرىنشى رازريادتى سپورتشى اتاعىن قورعاپ شىققان. ماڭداي تەردىڭ وتەۋىنە قاراي, 108 ۇزدىك ناتيجەگە قول جەتكىزگەن سپورتشىعا اي سايىن بەرىلەتىن ارنايى ستيپەنديا تاعى بار. ونىڭ ىشىندە 28 ادام شەكتەۋلى مۇمكىندىگىنە قاراماستان توپ جارىپ جۇرگەن قايسار سپورتشىلار قاتارىنان ەكەن.
الماتى وبلىسى اكىمدىگى تاراپىنان سپورتشىلاردى قولداۋعا بارلىق مۇمكىندىك جاسالىپ وتىر. سونىڭ دالەلى رەتىندە جاقىندا وبلىس اكىمى اماندىق باتالوۆ وڭىردەگى سپورت سالاسىنىڭ ۇزدىكتەرىن ماراپاتتادى. ولاردىڭ اراسىندا XXXII جازعى وليمپيادا ويىندارىنا جولداما العاندار, 2019 جىلى وتكەن الەم جانە ازيا چەمپيوناتتارىنىڭ جۇلدەگەرلەرى, جاتتىقتىرۋشىلار مەن جۋرناليستەر دە بار. سونىڭ ىشىندە, اسىرەسە, بالالار مەن جاسوسپىرىمدەر اراسىندا وتكەن الەم چەمپيوناتتارىندا توپ جارعان الماتى وبلىستىق № 1 بالالار ءۇيى تاربيەلەنۋشىلەرىنىڭ جەڭىستەرىن وبلىس اكىمى ەرەكشە ىقىلاسپەن اتاپ ءوتىپ, جىلى لەبىزىن ءبىلدىردى.بۇل مەكتەپ-ينتەرنات الماتى قالاسىندا ورنالاسقان.
جالپى, وبلىس سپورتىنىڭ اياق الىسىن «جەتىسۋ» فۋتبول كلۋبىنىڭ ويىندارىنان, كىلەڭ قىزداردان قۇرالعان «جەتىسۋ» ۆولەيبول كومانداسىنىڭ جەڭىستى جولىنان, كوگالداعى حوككەي, گاندبول سياقتى باسقا دا سپورت تۇرلەرىندەگى جەتىستىكتەرگە قاراپ وڭ باعالاۋعا بولادى. جيىندا ايماق باسشىسى «جىلدىڭ ەڭ ۇزدىك سپورت مەكەمەسى» اتانعان تالدىقورعان قالاسىنىڭ دەنە شىنىقتىرۋ جانە سپورت بولىمىنە, № 1 مامانداندىرىلعان بالالار مەن جاسوسپىرىمدەر سپورت مەكتەبىنە جانە فەدەراتسيالار اراسىندا ۇزدىك دەپ تانىلعان الماتى وبلىسىنىڭ ۆولەيبول فەدەراتسياسىنا وبلىس اكىمىنىڭ ديپلومى مەن 500 مىڭ تەڭگەنىڭ اقشالاي سەرتيفيكاتىن تابىس ەتتى. سول سياقتى حالىقارالىق جارىستاردا جوعارى ناتيجەلەرگە قول جەتكىزگەنى ءۇشىن ەلۋگەگە جۋىق سپورتشى مەن جيىرمادان استام جاتتىقتىرۋشىعا جانە سپورت تاقىرىبىن ناسيحاتتاۋشى باق وكىلدەرىنە دە 150-300 مىڭ تەڭگە كولەمىندەگى اقشالاي سىيلىق سەرتيفيكاتتارى بەرىلدى.
ايماقتا كاسىبي سپورت تۇرلەرىن دامىتۋ ىسىنەن بولەك بۇقارالىق سپورتتىڭ ءباسىن ارتتىرۋعا باعىتتالعان شارالار ءبىر توبە ەكەن. بۇل جۇمىستار مەملەكەت باسشىسى قاسىم-جومارت توقاەۆتىڭ حالىققا ارناعان جولداۋىندا ايتىلعانداي, دەنى ساۋ ۇلت قالىپتاستىرۋ تالاپتارىن ورىنداۋعا ورايلاستىرىپ ىسكە اسىرىلىپ وتىر.
- بۇقارالىق سپورتتى دامىتۋعا جاعداي جاساۋ ءۇشىن اۋداندار مەن اۋالداردان سپورت كەشەندەرىن كوپتەپ اشۋىمىز كەرەك. ول ءۇشىن بۇرىننان بارىن كۇردەرلى جوندەپ, سپورت نىساندارى جوق ەلدى مەكەندەردە جاڭادان سالۋدى قول الۋدامىز. بىلتىر قاراساي اۋدانىنىڭ شامالعان اۋىلىندا تۇڭعىش پرەزيدەنتىمىز - ەلباسى نۇرسۇلتان نازارباەۆتىڭ قولداۋىمەن «ۇشقوڭىر» بالالار مەن جاسوسپىرىمدەر سپورت مەكتەبى اشىلدى. كەگەن اۋدانىنىڭ ورتالىعىندا دا «نۇر-امان» دەنە شىنىقتىرۋ-ساۋىقتىرۋ كەشەنى جاڭادان ىسكە قوسىلدى. رايىمبەك اۋدانىنىڭ ورتالىعى نارىنقول اۋىلىنان دا سپورت كەشەنىن سالىپ جاتىرمىز, - دەيدى وبلىس اكىمى اماندىق باتالوۆ.
سونداي-اق, وبلىستا «اۋىل ەل - بەسىگى» باعدارلاماسىمەن ەسكەلدى, بالقاش, كوكسۋ, ۇيعىر اۋداندارىندا 4 دەنە شىنىقتىرۋ-ساۋىقتىرۋ كەشەندەرىنىڭ قۇرىلىس جۇمىستارى باستالعان. ناتيجەسىندە, الماتى وبلىسىندا 2021 جىلعا دەيىن وسىنداي 20 سپورتتىق كەشەن پايدالانۋعا بەرىلەدى دەگەن جوبا بار. ال تالدىقورعان قالاسىندا تمد اۋماعىندا تەڭدەسى جوق جابىق ءجۇزۋ باسسەينىنىڭ قۇرىلىسى ءجۇرىپ جاتىر. كۇنىنە 750 ادامعا بىردەن وىزمەت كورسەتەتىن باسسەين قالانىڭ كورىكتى دە كورنەكتى نىساندارىنىڭ ءبىرى بولماق. قازىر بۇل نىساندا قۇرىلىس جۇمىستارىنىڭ 70 پايىزى اياقتالعان.
بيىل جەتىسۋ سپورتشىلارى ءۇشىن جەڭىس جولىن جالعاستىرۋعا مۇمكىندىك مول. بۇيىرسا, توكيودا وتەتىن ءحححىى جازعى وليمپيا ويىندارىنا قاتىسۋشىلار قاتارىندا وبلىس وكىلدەرى دە بار. ءدۇبىرلى دوداعا الماتى وبلىسىنىڭ ساڭلاقتارى 6 جولداما جەڭىپ العان. ماسەلەن, ساداقشىلار سانجار مۋساەۆ دەنيس گانكين مەن يلفات ابدۋللين قازاقستاننىڭ نامىسىن توكيودا قورعاۋى ءتيىس. سپورتتىڭ ساداق اتۋ ءتۇرى بويىنشا دا ءبىر كوماندالىق جولداما وبلىس قورجىنىندا. جەڭىل اتلەت ايمان راتوۆا مەن گرەك-ريم كۇرەسىنەن سىنعا اسحات دىلمۇحامەدوۆكە جەتىسۋلىق جەرلەستەرىا سەنىم ارتادى.
ايتپاقشى, ايماقتىڭ ماڭدايعا باسقان فۋتبول كومانداسى وتكەن جىلدى ەل چەمپيوناتىنداعى ويىنداردا بەسىنشى ورىندى قاناعات تۇتقان ەدى. الايدا «جەتىسۋ» سپورت كلۋبىنىڭ بۇل كورسەتكىشىن جانكۇيەرلەر مەن سپورت جۋرناليستەرى مىسە تۇتقان جوق. ولار كوماندانىڭ چەمپيون بولۋى ءۇشىن بارلىق جاعداي جاسالسا دا, فۋتبولشىلارعا شەبەرلىك پەن پاتريوتيزم جەتىسپەيدى دەگەن پىكىردە. ماسەلەن, «جەتىسۋ» كلۋبىنداعى ويىنشىلاردىڭ دەنى لەگيونەرلەردەن قۇرالعان ەكەن.
- سوڭعى ۋاقىتتا پرەمەر-ليگا قاتارىنان جەتىسۋلىق جەرلەستەردى بايقاي الماي ءجۇرمىز. «جەتىسۋ» كومانداسىنىڭ وزىندە تالدىقورعاندىق فۋتبولشىلار ساۋساقپەن سانارلىق. ولاردىڭ ورنىن وزگە وڭىردەن, بولماسا سىرتتان كەلگەن ويىنشىلار الماستىرعان. قازىر كوماندا ساپىندا بار بولعانى «جەتىسۋلىق» ەكى ويىنشا ءجۇر. ايبار جاقسىلىقوۆ پەن راۋان ورىنباسار. قالعاندارعا ورىن جوق. ماسەلەن, ايبار وتكەن ماۋسىمدا 24 ويىن وتكىزىپ, 6 گول سوققان. 33 تۋردا 678 مينۋت ويناعان. ەگەر ايباردىڭ ستاتيستيكاسىنا ۇڭىلەتىن بولساق, الاڭداعى ەڭ كوپ كورسەتكىشى 90 مينۋت. قالعانى كەزدەسۋدىڭ ورتاسىندا الماسقان. مۇنى فۋتبولدىڭ زاڭدىلىعى دەپ اتايىق. دەگەنمەن دە, جەتىسۋلىق جالعىز ويىنشى كىمنىڭ كوڭىلىن جامايدى؟ تاعى ءبىر فۋتبولشى راۋان ورىنباسار الاڭعا مۇلدە شىقپاعان. كوماندا باسشىلىعى تاراپىنان تەك جەرگىلىكتى ويىنشى بولۋ كەرەك دەگەن اڭگىمەنىڭ ورنىن تولتىرۋ ءۇشىن كوماندا ساپىنا ەنگىزىپ, ماۋسىم بويى الاڭعا شىعارماعانى بايقالادى, - دەيدى سپورت ءجۋرناليسى ريشاد تۇرعانباەۆ.
جالپى, ۇلكەن سپورتقا بولىنگەن مول قارجىنى سىرتتان ويىنشىلار جالداۋعا باعىتتاۋدى توقتاتۋ قاجەتتىگى جاقىندا پارلامەنت قابىرعاسىندا دا كوتەرىلگەن بولاتىن. وسى جاعداي الماتى وبلىسىندا دا ورىن العان سىڭايلى. سپورت ءجۋرناليسى وتكەن ماۋسىمداعى ويىن كەزىندە ءبىرىنشى جانە ەكىنشى ليگادا ويناعان فۋتبوليستەردىڭ جارتىسىنان كوبى باسقا كوماندالاردان كەلىسىم-شارتپەن كەلگەن ويىنشىلار بولعانىن ايتادى. ول جانە بۇل ويىنشىلاردى جاتىن ورىنمەن قامتۋ ءۇشىن قىمبات قوناق ۇيدەن ورىن دايىندالاتىنىن دا الاڭداۋلى. ياعني, «جەتىسۋ» فۋتبول كلۋبىنىڭ باسشىلىعى سىرتتان الدىرعان سپورتشىلار ءۇشىن اقىلعا سىيمايتىنداي جومارتتىق كورسەتىپ وتىرعان كورىنەدى. ال كلۋبتىڭ قارجىلىق بيۋدجەتى 3 ميلليارد تەڭگەگە جەتىپ وتىر.
- مەيلى, كوماندانىڭ اقشاسىن ساناۋ ءبىزدىڭ قۇزىرىمىزعا جاتپايدى. بىراق, بۇعان پاتريوتيزم تۇرعىسىنان قاراۋعا ءماجبۇرمىز. جىگىتتەرگە وبال. كەيدە «جەتىسۋدان شىققان فۋتبولشى جوق پا؟» دەگەن ويعا قالاسىڭ. ولار بار, ولار وزگە وڭىرلەردە دوپ تەۋىپ ءجۇر. ماسەلەن, جەتىسۋ فۋتبول مەكتەبىنەن قاناتتانعان سەرىكجان مۋجيكوۆ, بەرىك شايحوۆ, رافحات اسلان سەكىلدى ۇزدىكتەرىمىز وزگە كلۋبتاردا. باسقالار دا ءوز وبلىسىنىڭ نەگىزگى قۇرامىنان ورىن تاپپاعانسىن باسقا كلۋبتارعا اۋىسۋعا نەمەسە فۋتبولدان كەتۋگە ءماجبۇر بولدى. مىسالى, 2018 جىلى ەلامان بەيسەمباەۆ, نۇرجان جەڭىسبەكوۆ, ديدار مارلەنوۆ, شىڭعىسحان كەنجەبەكوۆ, اسىلبەك قاپانوۆتار ناعىز شيىرشىق اتقان شاعىندا كومانداعا شاقىرتۋ الماعاسىن فۋتبولدى مۇلدەم تاستاپ كەتۋگە ءماجبۇر بولدى. بىلتىر الىبەك باتىربەكوۆ, سارقىت يمانعازى دا الدىڭعى ارىپتەستەرىنىڭ كەبىن كيدى. بيىل ەركەبۇلان مۇسابەكوۆ, راحات وتىزباەۆ سياقتى ويىنشىلار باسقا كومانداعا اۋىسپاقشى, - دەيدى سپورت ءجۋرناليسى ريشاد تۇرعانباەۆ.
الماتى وبلىسى
