جاقىندا سەمەي قالاسىندا اياگوز اۋدانىنىڭ وسى شاھاردا ءبىلىم الىپ جۇرگەن جاستارىمەن كەزدەسۋ ءوتتى. بۇگىندە قالاداعى 4 جوعارى وقۋ ورنى مەن 9 كوللەدجدە اياگوزدىك ستۋدەنتتەر ءبىلىم الۋدا. كەزدەسۋگە اياگوزدەن ارنايى كەلگەن اۋدان اكىمى دىلدابەك ورازباەۆ وڭىردەگى 9 ءبولىمنىڭ جەتەكشىلەرىمەن بىرگە تۋعان جەرىن تۇلەتۋگە نيەتتى جاستارمەن ەمەن-جارقىن اڭگىمەلەسىپ, ولاردى كىندىك كەسكەن مەكەنىندە ەڭبەك ەتۋگە شاقىردى.
«بيىل «ديپلوممەن - اۋىلعا» باعدارلاماسى بويىنشا 30 مامانعا ءۇي الۋعا جەڭىلدەتىلگەن نەسيە جانە كوتەرمە اقى بەرۋگە رەسپۋبليكالىق بيۋدجەتتەن 100 ميلليون تەڭگەگە جۋىق قاراجات ءبولىندى. تۋعان جەرىن وركەندەتەمىن, كوركەيتەمىن دەگەن جاستارعا وسىنداي مۇمكىندىك بار. قازىر ءبىزدىڭ اۋدانعا 3 دارىگەر, 43 مۇعالىم, 9 ۆەتەرينار ماماندارى قاجەت. اسىرەسە ورىس ءتىلى جانە ورىس ادەبيەتى, اعىلشىن ءتىلى, ماتەماتيكا پاندەرىنىڭ مۇعالىمدەرىنە سۇرانىس جوعارى. سوندىقتان اياگوزدىك جاستار تۋىپ-وسكەن مەكەندەرىنە ورالسا دەيمىز. باسقا اۋداننىڭ جاستارىنا دا ەسىگىمىز اشىق» دەيدى اۋدان اكىمى.
ستۋدەنتتەرمەن كەزدەسۋدە ءسوز العان اياگوز اۋداندىق مادەنيەت ءبولىمىنىڭ باسشىسى جاندوس امانوۆ جاستاردى مادەنيەت سالاسىنا قىزمەتكە شاقىرىپ, اۋداندا وسى سالادا جاستاردىڭ ۇلەسى باسىم ەكەندىگىن ايتتى. «مەنىڭ تۋعان جەرىم - اياگوز قالاسى. تۋعان قالاما بارىپ, اۋدانعا ءوز ەڭبەگىمدى سىڭىرگىم كەلەدى. قازىر اۋداندا جالپى تاجىريبەلىك دارىگەرلەر, حيرۋرگ ماماندارى جەتكىلىكسىز. وسى ولقىلىقتىڭ ورنىن تولتىرۋعا ۇلەس قوسسام دەيمىن» دەيدى اياگوزدىك ستۋدەنت ءمادينا قۇنانباي.
كەزدەسۋگە بۇرىن اياگوز اۋدانىندا تۇرىپ, قىزمەت ەتكەن اعا بۋىن وكىلدەرى دە شاقىرىلىپتى. شارا سوڭىندا اۋدان اكىمى الەۋمەتتىك تۇرعىدان از قامتىلعان, ۇزدىك وقيتىن ون ستۋدەنتكە نوۋتبۋك پەن العىس حات تابىس ەتتى.
شىعىس قازاقستان وبلىسى,
اياگوز اۋدانى
