دوڭگەلەك ۇستەلدى كىرىسپە سوزبەن اشقان «قاينار» اكادەمياسىنىڭ رەكتورى, قازاقستان ۇلتتىق جاراتىلىستانۋ عىلىمدارى اكادەمياسىنىڭ اكادەميگى, پروفەسسور ەرەنعايىپ وماروۆ ەلىمىزدىڭ عىلىمى مەن بىلىمىنە ولشەۋسىز ۇلەس قوسىپ, وتاندىق ءتىل عىلىمىنىڭ حالىقارالىق دەڭگەيدە تانىلۋىنا, تۇركى دۇنيەسىندە وزىندىك ورىن الۋىنا ەلەۋلى ەڭبەك سىڭىرگەن ش.سارىباەۆتىڭ تاعىلىمدىق-تانىمدىق ەڭبەكتەرى مەن عيبراتتى عۇمىرىن بولاشاق ۇرپاققا ۇلگى-ونەگە ەتۋ مەن ناسيحاتتاۋدىڭ ماڭىزدىلىعىنا توقتالىپ, تۇلعالىق كەلبەتىن جان-جاقتى قاراستىرۋ ءۇشىن ەڭبەكتەرىنىڭ ءمانىن تەرەڭ ءتۇسىنۋ قاجەت ەكەنىن اتاپ ءوتتى.
دوڭگەلەك ۇستەل وتىرىسىنىڭ مودەراتورى ۇعا كوررەسپوندەنت-مۇشەسى, پروفەسسور كارىمبەك قۇرماناليەۆ العاشقى ءسوزدى حالىقارالىق تۇركى اكادەمياسىنىڭ پرەزيدەنتى, ۇعا كوررەسپوندەنت-مۇشەسى, پروفەسسور دارحان قىدىرالىگە بەردى. اكادەميك ش.سارىباەۆتىڭ قازاق ءتىلىنىڭ حالىقارالىق دەڭگەيگە كوتەرىلىپ, الەمدىك تۇركولوگيادا ءتىلىمىزدىڭ وزىندىك ورنىن الۋعا ولشەۋسىز ۇلەس قوسقان ەڭبەكتەرىنە ەرەكشە توقتالىپ وتكەن د.قىدىرالى حالىقارالىق تۇركى اكادەمياسى تاراپىنان اتقارىلىپ جاتقان عىلىمي جوبالاردى تىلگە تيەك ەتتى. سونىمەن قاتار وتاندىق عىلىمدى الەمدىك ءبىلىم-عىلىم كەڭىستىگىنە كىرىكتىرۋ ۇدەرىسىندە تۇركولوگ-عالىمداردىڭ اتقارار قىزمەتى قوماقتى ەكەنىن, وسى ورايدا ەلىمىزدىڭ جوعارى وقۋ ورىندارى مەن عىلىمي-زەرتتەۋ ينستيتۋتتارىنىڭ عالىمدارىمەن بىرلەسىپ, سەرىكتەستىك قارىم-قاتىناستار ورناتۋدىڭ ماڭىزدىلىعىن جەتكىزدى.
قازاق ءتىلى تاريحى, ديالەكتولوگيا, لەكسيكولوگيا, لەكسيكوگرافيا, گرامماتيكا, ت.ب. كوكەيكەستى ماسەلەلەرىنە قاتىستى عالىمنىڭ قالامىنان 300-دەن استام عىلىمي ماقالالار, ونىڭ ىشىندە 20 شاقتى مونوگرافيا, وقۋلىقتار, سوزدىكتەر جارىق كوردى دەي كەلە ش.سارىباەۆتىڭ لەكسيكوگرافيا عىلىمىن دامىتۋداعى قاجىرلى ەڭبەگىنە توقتالعان ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى, ۇعا كوررەسپوندەنت-مۇشەسى, پروفەسسور ەردەن قاجىبەك عالىمنىڭ قازاق ءتىلىنىڭ وزەكتى سالالارىنا ارناعان ەڭبەكتەرى جايىندا كەڭىنەن ماعلۇمات بەرىپ, بۇگىنگى ءتىل ءبىلىمىن دامىتۋدىڭ وزەكتى ماسەلەلەرىن قوزعادى.
شورا سارىباەۆتىڭ بار كۇشىن سارپ ەتىپ زەرتتەگەن سالاسى – ديالەكتولوگيا مەن ءتىل ءبىلىمىنىڭ تاريحى. كارىمبەك قۇرماناليەۆ عالىمنىڭ وسىناۋ ەڭبەكتەرى تۇرعىسىندا وي قوزعاپ, شالعايدا جاتقان تۇرعىندار ءتىلىنىڭ جانە رەسپۋبليكادان تىس جەردى مەكەندەيتىن قازاقتار ءتىلىنىڭ بايلىعىن جيناۋدا جۇيەلى تۇردە ديالەكتولوگيالىق ەكسپەديتسيا ۇيىمداستىرىپ, ارىپتەس عالىمدارمەن بىرلەسە ءجۇرىپ, ەل اۋزىنان ءسوز بايلىعىن جيناۋعا باسشىلىق ەتكەنىن اڭگىمەسىنە ارقاۋ ەتتى. عالىمنىڭ 80 باسپا تاباق كولەمدى «قازاق ءتىلىنىڭ ايماقتىق سوزدىگىنىڭ» جارىق كورۋى ءتىل بىلىمىنە قوسىلعان سۇبەلى ۇلەس دەسەك, اكادەميك سارىباەۆتىڭ قازاق ءتىلى جايىندا وتكەن عاسىر مەن قازىرگى كەزگە دەيىن جارىق كورگەن ەڭبەكتەرىنىڭ 6 تومدىقپەن جارىق كورۋى – قازاق ءتىل ءبىلىمى تاريحىنا قوسىلعان قوماقتى ەڭبەك, دەدى ول.
تەرميندەردى رەتتەۋدىڭ تەوريالىق جانە ادىستەمەلىك قاعيداتتارىن «اكادەميك ش.سارىباەۆ جانە تەرمينولوگيانىڭ وزەكتى ماسەلەلەرى» بايانداماسىنا ارقاۋ ەتكەن ۇعا-نىڭ كوررەسپوندەنت-مۇشەسى, پروفەسسور شەرۋباي قۇرمانباي ۇلى قازاق ءتىلىن مەملەكەتتىك ءتىل رەتىندە دامىتۋدىڭ ەڭ باستى جولدارىنىڭ ءبىرى – ونى عىلىم مەن تەحنيكا ءتىلى رەتىندە ودان ءارى دامىتا ءتۇسۋ جانە سالالىق تەرمينولوگيالىق سوزدىكتەردى جاساۋدى ءبىر جۇيەگە ءتۇسىرۋ, رەتكە كەلتىرۋ مەن جەتىلدىرۋ كەرەگىن ايتا كەلە, سالالىق تەرميندەردى رەتتەۋدىڭ تەوريالىق جانە ادىستەمەلىك نەگىزدەرىنە, سونداي-اق عالىمنىڭ سپورت تەرميندەرىن زەرتتەۋدەگى رولىنە ايرىقشا توقتالدى.
دوڭگەلەك ۇستەل بارىسىندا اكادەميك ش.سارىباەۆتىڭ عىلىمي شىعارماشىلىعى, ۇستازدىق ۇلاعاتى, ءتىل تاعدىرىنا ارالاسۋى, كىسىلىك كەلبەتى, قوعامدىق قايراتكەرلىگى جانە ۇلت مۇددەسىنە قىزمەتى جونىندە ۇعا اكادەميكتەرى مەن كوررەسپوندەنت-مۇشەلەرى باقتيار سمانوۆ, فاۋزيا ورازباەۆا, زەينەپ بازارباەۆا جانە جوعارى وقۋ ورىندارىنىڭ پروفەسسورلارى, فيلولوگيا عىلىمدارىنىڭ دوكتورلارى دانداي ىسقاق ۇلى, جاڭالىق بالتاباەۆا, عاريفوللا انەس, قالبيكە ەسەنوۆا, التىناي تىمبولوۆا, مايرا سارىباي, التىنشاش قۇرمانالى, گۇلنار مۇحاممەدقاليەۆا, ءانيپا مۇحتاروۆا بايانداما جاسادى. سونداي-اق «قاينار» اكادەمياسىنىڭ پروفەسسور-وقىتۋشىلارى, ستۋدەنتتەرى مەن ماگيسترانتتارى دا قاتىسىپ, وي-پىكىرلەرىمەن ءبولىستى.
الماتى
