1 قاڭتاردان باستاپ ەلىمىزدە مىندەتتى الەۋمەتتىك مەديتسينالىق ساقتاندىرۋ جۇيەسى ىسكە قوسىلدى. بۇگىندە قازاقستان حالقىنىڭ 90%-دان استامى, ياعني 17 ملن ادام ساقتاندىرىلعان. ونىڭ 11 ملن-عا جۋىعى جەڭىلدىگى بار 15 ساناتقا جاتادى. ولاردىڭ جارناسىن مەملەكەت ءوزى تولەيدى.
قاڭتار ايىندا ءمامس ءۇشىن اۋدارىلعان جارنانىڭ كولەمى 34,2 ملرد تەڭگەنى قۇراعان. ونىڭ 24 ملرد تەڭگەسى – مەملەكەت ەسەبىنەن جەڭىلدىگى بار ساناتتار ءۇشىن تولەگەن جارنا. وسىنى ايتقان ايباتىر جۇماعۇلوۆ قاڭتار ايىنىڭ قورىتىندىسى بويىنشا كورسەتىلگەن كونسۋلتاتسيالىق-دياگنوستيكالىق قىزمەتتەر 2019 جىلدىڭ قاڭتارىمەن سالىستىرعاندا 27%-عا ارتقانىن جەتكىزدى. «ونىڭ ىشىندە كت جانە مرت قىزمەتتەرىن تۇتىنۋ 54%-عا, ۋدز 21%-عا ارتتى. قالپىنا كەلتىرۋ ەمى جانە مەديتسينالىق وڭالتۋ قىزمەتتەرىنىڭ بارلىق تۇرلەرى 48%-عا ءوستى, ونىڭ ىشىندە نەۆرولوگيا (ينسۋلت) بەيىندەرى بويىنشا كورسەتىلگەن قىزمەتتەر كولەمى 3,2 ەسەگە كوبەيدى», دەدى ول.
قور باسشىسىنىڭ ايتۋىنشا, الەۋمەتتىك مەديتسينالىق ساقتاندىرۋ قورى 2020 جىلعا 1 258 مەديتسينالىق ۇيىممەن كەلىسىمشارت جاساسقان. ونىڭ 657-ءسى مەملەكەتتىك بولسا, 601-ءى – جەكەمەنشىك. «بىراق كولەم جاعىنان ەسەپتەيتىن بولساق, 20%-عا جۋىق مەديتسينالىق مەكەمەلەرگە كەلىسىمشارت بويىنشا اقشا تاراتىلدى, كەلىسىم جاساستىق. ارينە ءبىز ءمامس اياسىندا جەكە كاسىپورىنداردى ىنتالاندىرۋعا مۇددەلىمىز. ءبىز كەلىسىمشارت جاساسقان كەزدە مەملەكەتتىك نەمەسە جەكە كاسىپورىن دەپ بولمەيمىز. بارىنە قويىلاتىن تالاپ ءبىر. مەديتسينالىق قىزمەتتەردى ساتىپ الۋدا ەلەكتروندى جۇيەگە كوشتىك. سول سەبەپتى ولاردىڭ قاتىسۋ مۇمكىندىگى دە ارتتى. ءبىز وسى ايدان باستاپ مەديتسينالىق ۇيىمدارعا ستيكەرلەر ءىلىپ جاتىرمىز. ونداعى ماقساتىمىز – ءبىرىنشى رەتتە تۇرعىندارعا وسى مەديتسينالىق ۇيىمدا تەگىن مەديتسينالىق كومەك الۋعا مۇمكىندىك بار ەكەنىن كورسەتۋ. ياعني ءمامس-كە قاتىسى بار ەكەنىن ءتۇسىندىرۋ. سوندىقتان دا ازاماتتاردىڭ ءوزىنىڭ قۇقىقتارىن سول جەردە تالاپ ەتۋگە مۇمكىندىگى بار. ازاماتتاردىڭ كلينيكانى تاڭداۋىنا بولادى. بەيىندى ماماندارعا كوڭىلى تولماي, باسقا كلينيكاعا بارعىسى كەلسە وعان دا مۇمكىندىك قاراستىرىلعان. تەك ۋچاسكەلىك دارىگەردەن جولداما الۋى شارت», دەدى باسقارما توراعاسى.
1 ساۋىرگە دەيىن ەلدىڭ بارلىق تۇرعىندارى شارتتى تۇردە ساقتاندىرىلعان بولىپ سانالادى جانە ولار تەگىن مەديتسينالىق كومەكتىڭ كەپىلدەندىرىلگەن كولەمى (تمككك) جانە ءمامس پاكەتتەرى اياسىندا مەديتسينالىق قىزمەتتەردى تەگىن الا الادى. وسى كەزەڭدە ازاماتتار وزدەرىنىڭ ساقتاندىرۋ مارتەبەسىن انىقتاپ, مىندەتتى مەديتسينالىق ساقتاندىرۋ جۇيەسىنە تىركەلۋى كەرەك. جەڭىلدىك كەزەڭى اياقتالعاننان كەيىن, ساقتاندىرىلماعان پاتسيەنتتەر مەديتسينالىق كومەك الۋدى جالعاستىرا بەرەدى, ول تەك تمككك اياسىندا عانا, ال قالعان قىزمەتتەر اقىلى بولادى. سوندىقتان 31 ناۋرىزعا دەيىن ءمامس جۇيەسىندە ساقتانۋشىنىڭ مارتەبەسىن الۋ ماڭىزدى.
وتكەن جىلدىڭ قىركۇيەگىنەن باستاپ ءمامس بويىنشا 1406 بىرىڭعاي بايلانىس ورتالىعى جۇمىس ىستەي باستادى. قازىرگە دەيىن call center-گە حالىقتان 37 مىڭنان استام ءوتىنىش كەلىپ تۇسكەن. «ونىڭ 97%-ى كەڭەس الۋ بولسا, 3%-ى – شاعىمدار مەن ارىزدار. Call center 1 قاڭتاردان باستاپ 24/7/365 ءتارتىبى بويىنشا جۇمىس ىستەيدى», دەدى ايباتىر جۇماعۇلوۆ.
