اۋدان, قالا اكىمدەرى مەن وبلىستىق باسقارما باسشىلارى تۇگەل باس قوسقان سەلەكتورلىق جيىندا كوروناۆيرۋسقا قارسى توسقاۋىل شارالارى جان-جاقتى تالقىلانىپ, جۇقپالى دەرتتىڭ وبلىس كولەمىندە تارالۋىنا جول بەرمەۋ جولدارى پىسىقتالدى. جيىن بارىسىندا وبلىس اكىمى ا. مۇحامبەتوۆ باسقارما باسشىلارىنا جاعدايدى قاتاڭ باقىلاۋدا ۇستاۋدى قاداپ تاپسىردى. وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى و.بەكماعامبەتوۆتىڭ ايتۋىنشا, وبلىستا دەرتتىڭ الدىن الۋ ماقساتىندا بىرقاتار ساقتىق شارالارى جۇزەگە اسىرىلعان. بۇگىندە وبلىستىڭ ەمدەۋ مەكەمەلەرىندە 622 ەمتوسەك دايىن تۇر. وڭىردەگى اۋەجاي مەن تەمىرجول ۆوكزالىن قوسقاندا, وبلىستىڭ بارلىق ايماقتارىندا 168-دەن استام وقۋ-جاتتىعۋ شارالارى وتكەن. كوروناۆيرۋس تىركەلگەن ەلدەرگە ساپار شەگۋشىلەر سانىن شەكتەۋ ماقساتىندا 20 شاقتى تۋريستىك فيرماعا ءتۇسىندىرۋ, ساقتاندىرۋ سەمينارلارى وتكىزىلگەن.
جيىن بارىسىندا وبلىستىق دەنساۋلىق ساقتاۋ باسقارماسىنىڭ باسشىسى ۆ.دۋدنيك وتكەن جىلدىڭ جەلتوقسان ايىنان باستاپ قىتايدان 159 ادام ورالعانىن, ولاردىڭ 153-ءى وبلىس تۇرعىندارى, ال التاۋى شەت ەل ازاماتتارى ەكەنىن ايتتى. ءتاج ۆيرۋسى تىركەلگەن ەلدەرگە تيەسىلى شەكارا بەكەتتەرىنەن وتكەن 5217 ادامنىڭ ءبارى دارىگەرلەر باقىلاۋىنا الىنعان. وڭىردە ناۋقاستاردى وقشاۋلاۋعا ارنالعان 15 بوكس, ءتاج ۆيرۋسىن جۇقتىرعانداردى ەمدەيتىن 1 وقشاۋلاۋ كاپسۋلاسى بار. قوسىمشا 65 كولىك بولىنگەن.
ءتاج ۆيرۋسى ينفەكتسياسىنىڭ پايدا بولۋى مەن تارالۋىنا جول بەرمەۋ ماقساتىندا وڭىرگە قازاقستان رەسپۋبليكاسى ۇكىمەتىنىڭ رەزەرۆىنەن قوسىمشا قاراجات ءبولىنىپ وتىر. تاياۋدا وبلىستىق دەنساۋلىق ساقتاۋ باسقارماسى بىرىڭعاي تاسىمالداۋشىمەن 18,6 ملن تەڭگەگە 20 ءتۇرلى ءدارى-دارمەك جانە مەديتسينالىق بۇيىمداردى جەتكىزۋ جونىندە شارت جاساسقان. ساتىپ الۋ, جەتكىزۋ شارتتارىن رەسىمدەۋ ءالى دە جالعاسۋدا.
- قوستاناي وبلىسىنا ءدارى-دارمەكتىڭ 30 ءتۇرى مەن باسقا دا مەديتسينالىق ماقساتتاعى بۇيىمداردى ساتىپ الۋعا 35,7 ملن تەڭگە ءبولىنىپ وتىر. بىراق ءدارى-دارمەكتىڭ جارتىسى عانا جەتكىزىلگەن. قالعانىن ساتىپ الۋعا ءالى ءبىر اي ۋاقىت كەرەك. ءتىپتى, «جول كارتاسىن» دا دايىنداماعانسىزدار. بۇلاي ارقانى كەڭگە سالۋدى قويىڭىزدار. ەرتەڭ تۇسكە دەيىن ماعان «جول كارتاسىن» تاپسىرىڭىزدار. قانشا جانە قانداي ءدارى تۇرلەرى جەتكىزىلدى, قالعانى قاشان جەتكىزىلەدى؟ ناقتى جاۋابىن بەرىڭىزدەر, — دەدى وبلىس اكىمى ا.مۇحامبەتوۆ.
جيىن سوڭىندا ايماق باسشىسى اۋدان, قالا اكىمدەرىنە, باسقارما باسشىلارى مەن سالا ماماندارىنا ءتيىستى شارالار مەن باقىلاۋدى كۇشەيتىپ, وڭىرلەردە دە ارنايى شتاب قۇرۋدى مىندەتتەدى.
قوستاناي
