ءوتىنىش بەرۋشىلەر كوپ. كەشە, ءتىپتى, ورتالىق اشىلماي جاتىپ ەسىكتىڭ الدىندا كەزەك كۇتكەندەر قاپتاپ كەتتى. بىراق قىزمەت كورسەتۋشىلەر ءۇش جەردەن قابىلداپ جاتقاندىقتان, كەشكە دەيىن بارلىعى قۇجاتتارىن رەسىمدەپ ۇلگەردى, - دەيدى انىقتاما ءبولىمىنىڭ قىزمەتكەرى ءاليا كوشمۇرزينا.
باعدارلاماعا قاتىسۋ ءۇشىن تۇرعىنداردان 7 ءتۇرلى قۇجات تالاپ ەتىلەدى. ونىڭ ەكەۋىن «ازاماتتارعا ارنالعان ۇكىمەت» ورتالىعى بەرەدى. تۇرعىلىقتى مەكەنجاي تۋرالى انىقتاما 10 كۇنگە دەيىن جارامدى. ال ءوتىنىش بەرۋشىنىڭ قازاقستان رەسپۋبليكاسىندا جىلجىمايتىن مۇلكىنىڭ جوق ەكەنىن راستايتىن انىقتامانىڭ كۇشى 1-اق كۇنگە جارايدى. قۇجاتتىڭ جارامدىلىق مەرزىمىنىڭ قىسقالىعى جۇمىسباستى تۇرعىندارعا قولايسىزدىق تۋعىزۋدا.
ءوزىم مۇعالىم بولىپ جۇمىس ىستەيمىن. 4 بالام بار. مۇندا تالاپ ەتىلەتىن قۇجاتتار كوپ ەمەس, بىراق كەيبىر قۇجاتتار ءبىر-اق كۇنگە جارامدى. مىسالى, كەشە جۇمىستان ەرتەرەك شىعىپ, «ازاماتتارعا ارنالعان ۇكىمەتتەن» ءتيىستى قۇجاتتاردى الدىم. بىراق مۇندا كەزەك كوپ, تىركەلىپ ۇلگەرمەدىم. بۇگىن جۇمىستان سۇرانىپ, ەرتەرەك كەلىپ وتىرمىن, - دەيدى كەزەك كۇتىپ وتىرعان ساۋلە سۇراعانوۆا.
ءوتىنىش جازعان تۇرعىندار اكىمدىك بەرگەن جولدامامەن تۇرعىن ءۇي قۇرىلىس جيناق بانكىنە بارادى. بانك تولەم قابىلەتى بار ازاماتتارعا 20 جىلدىق مەرزىمگە نەسيە بەرەدى. باعدارلاماعا قاتىسۋشى ءۇيدى ءوزى تاڭداپ, پاتەر قۇنىنىڭ 10% -ىنا شاق مولشەردە باستاپقى جارنا تولەيدى. جىلدىق سىياقى مولشەرى - 2%. باعدارلاما بويىنشا ءوتىنىش قابىلداۋ 6 ناۋرىز كۇنى كەشكىلىك اياقتالادى.
قالالىق اكىمدىكتىڭ مالىمەتىنشە, قازىر قوستاناي قالاسىندا 12 620 وتباسى تۇرعىن ءۇي كەزەگىندە تۇر. ونىڭ 230-ى كوپ بالالى, 4 مىڭى تولىق ەمەس وتباسىلار. وتكەن جىلى اتالمىش باعدارلاما اياسىندا 114 وتباسى باسپانالى بولعان.
قوستاناي
