فورۋمعا قاتىسقان پرەمەر-مينيستر اسقار مامين وتاندىق كاسىپكەرلەردى قولداۋ ماقساتىندا ىسكە اسقان ىلكىمدى جوبالاردىڭ الداعى ۋاقىتتا دا جالعاساتىنىن ايتتى.
– «سامۇرىق-قازىنا» جۇرگىزگەن تاجىريبە تابىستى ەكەنىن كورىپ وتىرمىز. بارلىق مەملەكەتتىك ساتىپ الۋلارعا قاتىسۋشى مەملەكەتتىك ورگاندار, كۆازيمەملەكەتتىك كومپانيالار مەن جەر قويناۋىن پايدالانۋشىلار ءۇشىن ۇلگى بولۋى ءتيىس, − دەدى ا.مامين.
جيىندا ءسوز العان «سامۇرىق-قازىنا» ۇلتتىق ءال-اۋقات قورى» باسقارما توراعاسى احمەتجان ەسىموۆ دامىعان ەلدەردىڭ تاجىريبەسىن نەگىزگە الا وتىرىپ, ساتىپ الۋ جۇيەسى ەل ەكونوميكاسىنىڭ ىشكى الەۋەتىن دامىتۋدىڭ ناقتى جانە ءتيىمدى تەتىگىنە اينالۋى قاجەت ەكەنىن ايتتى.
− باسىمدىق بەرەتىن باعىتتاردىڭ ءبىرى − قوردىڭ ساتىپ الۋ جۇيەسىن جەتىلدىرۋ. 2018 جىلعى قوردىڭ ساتىپ الۋ قۇرىلىمىنا ارنايى تالداۋ جۇرگىزىلدى. بۇل كەزەڭدە ساتىپ الۋدىڭ جالپى كولەمى – 3,3 ترلن تەڭگە بولسا, ونىڭ 90 پايىزى, ياعني 3 ترلن تەڭگەسى ءبىر كوزدەن ساتىپ الىنعان. بۇل ءوز كەزەگىندە باسەكەلەستىك ورتانىڭ جوقتىعىن كورسەتەدى. سوندىقتان وسىنداي ولقىلىقتاردىڭ ورنىن تولتىرۋ ءۇشىن 2 جىلدىڭ ىشىندە 4500 پوزيتسيادان 198 پوزيتسياعا دەيىن قىسقارتتىق. ناتيجەسىندە 650 ملرد تەڭگەدەن استام سوماعا ساتىپ الۋلار باسەكەلەستىك ورتاعا بەرىلىپ, بۇل قاراجاتتى 13 مىڭنان استام شاعىن بيزنەس وكىلدەرى يگەردى. ال قورعا قاراستى كومپانيالار 40 ملرد تەڭگە ۇنەمدەدى, − دەدى ا.ەسىموۆ.
قوردىڭ باسقارما توراعاسى ساتىپ الۋدى قىسقارتۋ جانە تەندەرلىك ساتىپ الۋلاردى ۇلعايتۋ جونىندەگى مەملەكەت باسشىسى قاسىم-جومارت توقاەۆتىڭ تاپسىرماسىن نەگىزگە الىپ, بۇل باعىتتا قور تاراپى جوسپارلى تۇردە شارالار قابىلداعانىن ايتتى.
سونىمەن قاتار وتاندىق كاسىپكەرلەردى قولداۋ ماقساتىندا دا بىرقاتار جۇيەلى جۇمىستار جۇرگىزىلگەن.
− ۇكىمەت «قاراپايىم زاتتار ەكونوميكاسىنىڭ» سالالارىن دامىتۋعا ەرەكشە كوڭىل بولۋدە. قور مەن كومپانيالار توبى اتالعان باعدارلامانى ىسكە اسىرۋعا بەلسەندى قاتىسىپ كەلەدى. وتكەن جىلدىڭ قورىتىندىسى بويىنشا وتاندىق تاۋار وندىرۋشىلەردەن ءونىم ساتىپ الۋ كولەمى ارتتى. بيىل تاعام ونىمدەرىنىڭ ۇلەسىن − 90%-عا, (2019 جىلى – 76%), جەڭىل ونەركاسىپ ونىمدەرى − 85%-عا (2019 – 73%), قۇرىلىس – 92%-عا (2019 – 82%), جيھاز – 85%-عا (2019 – 48%) جەتكىزۋ جوسپارلانىپ وتىر, − دەدى ا.ەسىموۆ. باسقارما توراعاسى ءوز سوزىندە وتاندىق تاۋار وندىرۋشىلەرىمەن وففتەيك-كەلىسىم جاساۋ جوبالارىن ىسكە اسىرۋعا باسىمدىق بەرەتىنىن ايتتى.
− 2018 جىلى ءبىزدىڭ كومپانيالاردا سىرتتان يمپورتتالاتىن تاۋارلارعا تالداۋ جۇرگىزىلدى. سوڭعى ءۇش جىلدا تاۋارلاردىڭ وسىنداي ءتىزىمى بويىنشا يمپورت كولەمى شامامەن 500 ملرد تەڭگەنى قۇرادى. ءبىز بيزنەس-قوعامداستىققا ۇزاق مەرزىمدى كەلىسىمشارت نەگىزىندە كەپىلدىك بەرىپ, قازاقستاندا وسى تاۋارلاردىڭ ءوندىرىسىن جولعا قويۋدى ۇسىندىق. 2018 جىلى وففتەيك-كەلىسىم بويىنشا العاشقى 2 جوبا, بىلتىر 25 جوبا ماقۇلداندى. سونداي-اق يمپورت الماستىرۋ ءۇشىن الەۋەتى بار تاۋارلاردىڭ ءتىزىمى جاريالاندى. جاقىن ارادا وتاندىق كاسىپكەرلەر تاراپىنان وتىنىشتەر تۇسەدى دەگەن سەنىمدەمىز, − دەدى «سامۇرىق-قازىنا» ۇلتتىق ءال-اۋقات قورى» باسقارما توراعاسى ا.ەسىموۆ.
فورۋم بارىسىندا قوردىڭ پورتفەلدىك كومپانيالارى مەن قازاقستاندىق كاسىپورىندار اراسىندا 34,8 ملرد تەڭگە سوما بولاتىن كەلىسىمگە قول قويىلدى.
