ماڭىزدى شارانىڭ ماقساتى جايلى تانىستىرعان «وتانداستار قورى» كەاق ۆيتسە-پرەزيدەنتى ماعاۋيا سارباسوۆ, قور قۇرىلعان ساتتەن باستاپ, شەتتەگى قانداستارىمىزدىڭ رۋحاني جانە قۇقىقتىق قاجەتتىلىگىن وتەۋ جولىندا ىرگەلى ىستەر اتقارىپ, ءبىرشاما جەتىستىككە جەتكەنىن جەتكىزدى. ياعني, قوردىڭ مۇرىندىق بولۋىمەن 2500 دانادان استام كوركەم ادەبي, تانىمدىق كىتاپتار شەكارادان تىس جەردە ورنالاسقان قازاق مادەني ورتالىقتارىنا جولدانسا, بۇگىنگى اشىلىپ وتىرعان «وتانداستار» وقۋ زالى سىرتتا جۇرگەن قازاق دياسپوراسىنىڭ شىعارماشىلىق قۋاتىن تانىتاتىن قۇندى تۋىندىلاردىڭ باسىن قوسىپ وتىر ەكەن.
اتالعان زالدىڭ تورىندە تۇركيالىق قالامگەر حاليفا التايدىڭ كىتاپتارىنان باستاپ, شىڭجاڭدىق تانىمال جازۋشىلار جاقسىلىق ءساميت ۇلى, سەرىك قاپشىقباي, نىعمەت مىڭجاني, ءشامىس قۇمار, سونىمەن قاتار موڭعوليالىق ءسوز زەرگەرلەرى شىناي راحمەت ۇلى, كاپ قۇمار ۇلى, ەگەۋحان مۇحاماديقىزى قاتارلى قالام يەلەرىنىڭ قارىمدى دۇنيەلەرى تۇرعانىن اڭعاردىق. ءتىپتى مۇنداي باياندى تىرلىككە تىلەكتەستىك تانىتىپ, تۇركيادا تۇراتىن حاسەن ءورالتاي اعامىزدىڭ بالالارى اكەسىنىڭ ءار تىلدە, ءار جىلدارى جارىق كورگەن تولىق شىعارماسىن جىبەرىپتى. سونداي-اق, بەيجىڭدەگى «ۇلتتار باسپاسىنان» شىققان شىڭجاڭ قازاقتارى جايلى تۇرمىستىق-ەتنوگرافيالىق باسىلىمدار دا سورەدەن ورىن الىپتى.
ۇيىمداستىرۋشىلاردىڭ ايتۋىنا قاراعاندا, بۇل باستاماسى عانا, الداعى كۇندەرى كىتاپ قاتارى كوبەيە تۇسپەك. سول سياقتى وسىندا ورنالاسقان ادەبيەتتەر ۇلتتىق ەلەكتروندى كىتاپحانا جوباسى اياسىندا تەحنيكالىق پلاتفورما بويىنشا تولىق تسيفرلانعانىن ايتا كەتكەن ارتىق بولماس.
ال تۇساۋى كەسىلگەن تىڭ تۋىندى «قازاق الەمى» جايلى ايتار بولساق, بۇل ەلەكتروندى كىتاپقا الەمنىڭ ءار تۇكپىرىندە ءومىر ءسۇرىپ, قىزمەت اتقارىپ جۇرگەن 50 قازاق ازاماتىنا قاتىستى جازبا توپتاستىرىلىپتى. كوبى ولاردىڭ ءىس تاجىريبەسى مەن ويلى پايىمدارىنان قۇرىلعان سۇحبات-ەسسەلەر كورىنەدى. بۇلاردىڭ دەنى عىلىم-ءبىلىم, بيزنەس سالاسىندا, قالعانى ونەر يەلەرى مەن سپورتشىلار ەكەن.
«الەمدىك ەكونوميكا, حالىقارالىق قارجى, جاھاندىق بيزنەس, عىلىم-ءبىلىم, مادەنيەت پەن ونەر سالاسىندا وزىندىك ورنەگىمەن ورتاسىنان وزىپ, ەلگە تانىلىپ, قازاقتىڭ اتىن شىعارىپ جۇرگەن وتانداستارمىزدىڭ تاجىريبەسى كوپكە ونەگە, بولاشاققا ۇلگى بولۋى ءتيىس. سونىمەن قاتار سىرتتاعى قانداستارىمىز اراسىنان شىققان دارىن يەلەرىن ءبىز تاريحي وتانىنا تارتۋ ارقىلى ەل ەڭسەسىن تىكتەۋگە سەپتىگىمىز تيسە, ماقساتىمىزدىڭ ورىندالاعانى» دەدى ماعاۋيا قاناپيا ۇلى.
جيىن بارىسىندا, كەلەلى ىسكە ريزاشىلىق تانىتىپ, پىكىر بىلدىرگەن كورنەكتى مەملەكەت جانە قوعام قايراتكەرى مىرزاتاي جولداسبەكوۆ ءوزىنىڭ تىڭ تۋىندىلارى « ۇلى دالا ادەبيەتى» ءھام «قورقىت اتا كىتابى» باستاتقان ءبىر توپ مۇراسىن «وتانداستار» زالىنا سىيعا تارتسا, تانىمال جازۋشى, مەملەكەتتىك سىيلىقتىڭ لاۋراەتى الىبەك اسقار, ۇلتتىق كىتاپحانا باسشىسى ءۇمىتحان مۇڭالباەۆا قاتارلى زيالى قاۋىم وكىلدەرى ءوز پىكىرلەرىن ورتاعا سالدى.
مارتەبەلى باسقوسۋدىڭ ءسانىن كەلتىرگەن تاعى ءبىر وقيعا – اتاجۇرتىنا ورالعان قىلقالام شەبەرلەرىنىڭ كورمەسى. اتاپ ايتقاندا, امانجول مۋسالينوۆ, سەرىكجان ىسقاقبەك ۇلى, باقىتبەك زەردە, تولقىن تابىسبەك, جالىن باۋىرحان, قايرات جايىربەك ۇلى قاتارلى سۋرەتشىلەردىڭ قولىنان شىققان ءتۇرلى ستيلدەگى جۇمىستار كوز قۋانتىپ, كوڭىل سەرگىتتى.
