حالقىمىز كوكتەمنىڭ العاشقى شۋاقتى كۇنىندە ونەگەسى مول, ءمانى ەرەكشە مەرەكەنى اتاپ وتەدى. 1 ناۋرىز – العىس ايتۋ كۇنىندە ەلىمىزدەگى ءتۇرلى ەتنوس وكىلدەرى قازاق حالقىنا ايرىقشا العىس ايتىپ, قۇرمەتى مەن ىزەتىن ءبىلدىرىپ كەلەدى.
راسىندا, تاعدىر تاۋقىمەتىن تارتىپ, زوبالاڭ زامانداردا قازاق جەرىنە پانا ىزدەپ كەلگەن ءتۇرلى ەتنوس پەن ءدىن وكىلدەرى حالقىمىزدىڭ جاناشىرلىعى مەن قامقورلىعىنا بولەندى. ولار سىندارلى ساتتە قۇشاق جايىپ قارسى الىپ, كەڭپەيىل نيەت تانىتقان قازاق حالقىنا ارقاشان العىسى مەن رياسىز ريزاشىلىعىن بىلدىرۋدە.
قازاق جەرىندە كوپتەگەن ەتنوس پەن ءدىن وكىلدەرىنىڭ ءومىر ءسۇرۋى – اللانىڭ قالاۋى. اللانىڭ قالاۋىنا قاتىستى تاعدىردا تاڭداۋ بولمايدى. ەندىگى ماقسات – ۇلت بولىپ ۇيىسىپ, ءبىر شاڭىراق استىندا تاتۋلىقتى تۋ ەتىپ, ونەگەلى ءومىر ساباقتاستىعىن قالىپتاستىرۋ.
ءبىز ەڭ اۋەلى ادام بالاسىن جوقتان بار ەتىپ جاراتقان جاراتۋشى يەمىزگە شۇكىر ايتامىز. شىنىندا, اللانىڭ ادام بالاسىنا بەرگەن نىعمەتىنىڭ شەگى جوق. ءاربىر اتقان تاڭدى اماندىقپەن قارسى الۋدىڭ ءوزى باعا جەتپەس نىعمەت ەمەس پە؟ ءار كۇنىمىزگە شۇكىر دەيمىز.
ەكىنشىدەن, ءبىزدى ومىرگە اكەلۋگە سەبەپشى بولعان, ءسابي ساتىمىزدەن ماپەلەپ, ايالاپ وسىرگەن اتا-انامىزعا العىس ايتامىز. وسىندايدا حالقىمىزدىڭ: «اتا – قورعان, انا – قۇربان» دەگەن جۇرەك تەبىرەنتەرلىك قاناتتى ءسوزى ەسكە تۇسەدى... قورعان بولعان اكەمىزگە, بالاسى اتقا قونسا, تاقىمىن قىساتىن انامىزعا العىس ايتۋ – پەرزەنتتىك پارىزىمىز. تاعدىر جازۋىمەن ومىردەن وتكەن بولسا, دۇعا ەتىپ, تۋىستارى مەن زامانداستارىنا قامقورلىق جاساۋ – مۇسىلماندىق مىندەتىمىز. اللا ەلشىسى وسىنداي امالعا ۇندەگەن.
ۇشىنشىدەن, اينالاداعى كىسىلەرگە العىس ايتۋ – ادامگەرشىلىك بورىشىمىز. مۇسىلمان بالاسى قانداي دا يگىلىك پەن نىعمەتكە بولەنسە, اۋەلى اللاعا شۇكىر ايتىپ, سول جاقسىلىققا سەبەپشى بولعان ادامعا العىسىن بىلدىرەدى. ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) «ادامعا العىس ايتا الماعان, اللاعا شۇكىر ەتە المايدى», دەگەن.
ادامدار اراسىنداعى مەيىرباندىق پەن دوستىق, تاتۋلىق پەن قۇرمەت سىندى قۇندىلىقتاردى ارتتىرا تۇسەتىن ايتۋلى كۇندە اينالامىزعا العىس ايتىپ, تىلەۋلەستىگىمىزدى بىلدىرە جۇرەيىك, اعايىن! سىزدەرگە مىڭ العىس! بارشاڭىزعا اللانىڭ اماندىعى مەن بەرەكەتىن تىلەيمىن! ەلىمىز امان, جۇرتىمىز تىنىش, تاۋەلسىزدىگىمىز باياندى بولعاي! ءامين!
ناۋرىزباي قاجى تاعان ۇلى,
قازاقستان مۇسىلماندارى ءدىني باسقارماسىنىڭ توراعاسى,
باس ءمۇفتي
