ءبىزدىڭ اتا-بابالارىمىزدىڭ ۇلى دالاعا العاش رەت اياق باسۋى سوناۋ ءحىىى عاسىردا تىركەلگەن ەكەن. ياعني ارال ماڭى ارقىلى سىرداريا مەن ىلە القابىنا تۇياق ىلىكتىرىپ, سودان سوڭ بالقاش كولىنىڭ تۇسىنان وتكەن پولياكتار بۇگىندە تاۋەلسىز ەلىمىزدىڭ اجىراماس ءبىر بولىگىنە اينالدى.
ولار ورتاق وتانىمىز قازاقستاننىڭ دامۋى مەن ءوسىپ-وركەندەۋىنە ءوز ۇلەستەرىن قوسۋدا. 1992 جىلدىڭ 6 ءساۋىر كۇنى قازاقستان مەن پولياك رەسپۋبليكالارى اراسىندا ديپلوماتيالىق قارىم-قاتىناس ورناتىلدى. ءبىز قازاقستاندىق پولياك ەتنوسىنىڭ وكىلدەرى سول كەزەڭنەن بەرى قوس مەملەكەتتىڭ سەنىمدى ارىپتەستەرى رەتىندە تىعىز قارىم-قاتىناستار مەن ءوزارا بايلانىستار جاساپ كەلە جاتقانىنا سۇيسىنەمىز. بۇل جاعىمدى جايت مەرەيىمىزدى ءوسىرىپ, جانىمىزدى جادىراتادى.
سونداي-اق 1994 جىلدىڭ 20 ناۋرىزىندا پولشانىڭ ەلشىلىگى قازاقستاندا اشىلسا, 2000 جىلدىڭ قازانىنان باستاپ پولشادا قازاقستاننىڭ ەلشىلىگى ءوز جۇمىسىن باستادى. قازاق توپىراعىندا پولياكتاردىڭ العاشقى بىرلەستىگى سوناۋ سەكسەنىنشى جىلدارى قۇرىلا باستاسا, اقتوبە وبلىسىندا مۇنداي قوعامدىق ۇيىمنىڭ قاز-قاز باسىپ, قىزمەت جاساي باستاعانىنا بيىل 20 جىل تولىپ وتىر. تاعدىردىڭ قازاق حالقىمەن بىرگە بولۋدى جازعانى ءبىزدىڭ باقىتىمىز جانە الاڭسىز عۇمىرىمىز بەن ەسەلى ەڭبەگىمىز دەپ سەنىممەن ايتا الامىز. ۇزاق جىلداردان بەرى قوس حالىق وكىلدەرىنىڭ اراسىندا تيتتەي بولسا دا جارىقشاق, سىزات تۇسپەگەنى اتاپ ايتۋعا تۇرارلىق ماسەلە دەپ سانايمىز. اسىرەسە, ۇلتارالىق تاتۋلىقتى ساقتاۋعا بۇگىنگى مەرەكەلى ءومىر ءسۇرىپ وتىرعان قوعامدى قالىپتاستىرۋعا ەلباسىنىڭ قوسقان ۇلەسى ولشەۋسىز.
ءبىزدىڭ بىلۋىمىزشە, الەم حالىقتارى اراسىندا قازاق حالقىن ەرەكشەلەندىرىپ تۇراتىن جايت – ولاردىڭ بويىنداعى سوزبەن ايتىپ جەتكىزگىسىز باي ادامگەرشىلىك قاسيەتتەرى. مەملەكەت قۇراۋشى ۇلتتىڭ ەشكىمدى جاتسىنبايتىن ءمارت مىنەزى – ەلىمىزدەگى تاتۋلىق پەن كەلىسىمنىڭ باستى كەپىلى. قازاق حالقىنىڭ بويىنا بۇرىننان ورنىققان قوناقجايلىق پەن قاراپايىمدىلىق تا وزگە وتانداستارعا شۋاعىن شاشىپ كەلەدى.
مىنە, وسىنداي كەك, دىق ساقتامايتىن, مەيىرىمى مەن كەشىرىمى مول, شىنايى, ادال دوستىقتى تۋ ەتىپ كوتەرىپ, ونى باعالاي بىلەتىن حالىققا ايتار العىسىمىز شەكسىز. مەملەكەت قۇراۋشى ۇلتتى وزگەلەردەن دارالاپ تۇراتىن تاعى ءبىر قاسيەتى – جاساعان جاقسىلىعى مەن قايىرىمدىلىعى ءۇشىن ەشكىمنەن ەشقاشان ەشتەڭە سۇرامايتىندىعى, ونى بۇلدامايتىندىعى. سوندىقتان بۇگىنگى العىس ايتۋ كۇنىن ايتۋلى داتا ەتىپ بەلگىلەگەن تۇڭعىش پرەزيدەنت نۇرسۇلتان نازارباەۆقا جانە ساباقتاستىق سالتىن ساقتاي بىلگەن مەملەكەت باسشىسى قاسىم-جومارت توقاەۆقا پولياك ەتنومادەني بىرلەستىگى اتىنان شەكسىز ريزاشىلىعىمىز بەن العىسىمىزدى جەتكىزگىمىز كەلەدى.
ءبىز ءۇشىن العىس كۇنى – تاتۋلىق پەن ءوزارا كەلىسىمدى پاش ەتەتىن ەرەكشە كۇن. ەندەشە, وسىنداي مەرەيلى ساتتە زامانا زاپىرانى قازاق جەرىنە تاپ كەلتىرۋگە ماجبۇرلەگەن مىڭداعان جانداردى جاتسىنباي قارسى الىپ ءارى قولىنداعى ريزىق-نەسىبەسىن ولارمەن بولىسكەن ۇلى دالانىڭ بۇگىنگى مۇراگەرلەرىنە تاعى ءبىر مارتە باسىمىزدى ءيىپ, العىسىمىزدى ايتۋ ارتىقتىق ەتپەيدى.
ەلەنا تسيبۋلسكايا,
اقتوبە وبلىسى پولياكتارىنىڭ «سۆياتلو» ەتنومادەني بىرلەستىگىنىڭ ءتورايىمى
اقتوبە
