مەرەكەلىك شارا بارىسىندا ۇلتتىق كيىم كيگەن ەتنومادەني بىرلەستىك توراعالارى مەن ارداگەرلەرى جەرگىلىكتى جۇرتشىلىقپەن امانداسىپ, دوستىق راۋىشتەرىن ءبىلدىردى. سونىمەن قاتار, كەلۋشىلەرگە 12 ءتۇرلى ۇلتتىق تاعامنان ازىرلەنگەن العىس داستارحانى جايىلدى. كونە شاھار تۇرعىندارى مەرەكەلىك داستارحاننان ءدام تاتسا, تۇرىك, ورىس, كۇردى, ءازىربايجان, دۇنگەن ۇلتىنىڭ وكىلدەرى قازاق حالقىنا العىستارىن جەتكىزدى. كوپشىلىك ءبىر-بىرىمەن قۇشاقتاسىپ, قول الىسىپ, وزدەرىنىڭ اق نيەتىن تانىتتى.
سالتاناتتى شارانى جامبىل وبلىسىنىڭ اكىمى بەردىبەك ساپارباەۆ ءسوز سويلەپ اشىپ, ءوڭىر تۇرعىندارىن مەرەكەلەرىمەن قۇتتىقتادى. «العىس ايتۋ كۇنى – تاريحتىڭ ءتۇرلى كەزەڭدەرىندە قازاق حالقىنىڭ باۋىرمالدىعىنا بولەنگەن ءتۇرلى ەتنوس وكىلدەرىنىڭ كيەلى قازاق جەرى مەن قوناقجاي قازاق حالقىنا دەگەن تەرەڭ تاعزىمىنىڭ اشىق بەلگىسى. راسىندا, وتكەن تاريحتا تاعدىر تاۋقىمەتىمەن ۇلى دالا توسىنە ءار جىلداردا بۇتىندەي ءبىر حالىقتار – 800 مىڭعا جۋىق نەمىس, 102 مىڭ پولياك, 550 مىڭ سولتۇستىك كاۆكاز حالىقتارىنىڭ وكىلدەرى, 18 مىڭنان استام قيىر شىعىستاعى كورەي وتباسىلارى قونىس اۋداردى. بۇگىندە ءبىزدىڭ قاسيەتتى جامبىل جەرىندە 87 ەتنوس, 21 ەتنومادەني بىرلەستىك وكىلدەرى اسسامبلەيا قۇرامىندا بىرلىك پەن تاتۋلىقتا ءومىر سۇرۋدە. وبلىسىمىزدا كۇردى, تۇرىك, دۇنگەن جانە وزگە دە ۇلتتار تىعىز شوعىرلانعان 5 اۋدان بار. كوپۇلتتىلىق – ءبىزدىڭ باسىمدىعىمىز, بىرلىك – سارقىلماس بايلىعىمىز», دەدى اكىم. سونىمەن قاتار, قازاقستاننىڭ حالىق ءارتيسى, مەملەكەتتىك سىيلىقتىڭ لاۋرەاتى تۇڭعىشباي جامانقۇلوۆ ءوزىنىڭ لەبىزىن جەتكىزدى. ء«بىز قازاق دەگەن قۇشاعىمىز كەڭ, اقكوڭىل, ادال, اڭعال حالىقپىز. ءبىزدىڭ باۋىرىمىزعا قانشاما حالىقتار, ۇلتتار, سىيىپ كەتىپ جاتىر. بءىزدىڭ ەڭ كەرەمەت قاسيەتتەرىمىزدىڭ ءبىرى بۇل», دەدى ول. سونداي-اق, «پولونەز» پولياك ەتنومادەني بىرلەستىگىنىڭ جەتەكشىسى لاريسا كالكوۆا, «باربانگ» كۇردىلەر اسسوتسياتسياسى وبلىستىق اقساقالدار كەڭەسىنىڭ مۇشەسى سابري اسانوۆ بارشا ۇلت پەن ۇلىستاردىڭ اتىنان قازاق حالقىنا العىسىن ءبىلدىردى.
مەرەكەلىك شارا بارىسىندا ءتۇرلى ەتنوستاردىڭ قازاق جەرىنە قونىستانۋى تۋراسىندا تەاترلاندىرىلعان قويىلىم قويىلىپ, سوڭى ونەر جۇلدىزدارىنىڭ كونتسەرتىنە ۇلاستى. سونداي-اق, قورداي اۋدانىنداعى ماسانچي اۋىلىندا 2000 ادامدى قامتيتىن «بىرلىگى جاراسقان, تۋعان جەرىم – قوردايىم» اتتى العىس ايتۋ فەستيۆالى ءوتتى. مەرەكەلىك شاراعا جينالعان كوپشىلىك اۋدان ورتالىعى قورداي اۋىلىنداعى نوعايباي بي ەسكەرتكىشىنە گۇل شوقتارىن قويدى. سونىمەن قاتار, العىس داستارحانى جايىلىپ, قورداي, قاراكەمەر, قاراسۋ اۋىلدارىنان كەلگەن تۇرعىندار داستارحاننان ءدام تاتتى. العىس ايتۋ كۇنىنە وراي وڭىردە باستاۋ العان شارالار ناۋرىز ايىنداعى مەرەكەلەردە جالعاساتىن بولادى.
جامبىل وبلىسى
