ايماقتار • 28 اقپان، 2020

كوكتەم – 2020: قوستاناي وبلىسىندا سۋ تاسقىنىنا قارسى وقۋ-جاتتىعۋ شارالارى ءوتتى

18 رەتكورسەتىلدى

ءۇش كۇنگە سوزىلعان وقۋ-جاتتىعۋ وڭىردەگى سۋ تاسقىنى قاۋپى ءتونىپ تۇرعان اۋدانداردىڭ بارلىعىندا بىردەي  ءبىر ۋاقىتتا باستالدى. ءار وڭىردەگى تاسقىنعا توسقىن بولارلىق جەدەل قيمىل جاتتىعۋلارىن قوستانايدا ورنالاسقان باس شتاب باقىلاپ وتىردى. ءىس-شاراعا ازاماتتىق قورعانىس جۇيەسىنىڭ ورگاندارى، توتەنشە جاعدايلاردىڭ الدىن الۋ جانە جويۋ جونىندەگى كوميسسيالارى، اپاتتىق-قۇتقارۋ قۇرىلىمدارى قاتىستى.

جاتتىعۋ بارىسىندا قۇتقارۋشىلار سۋ تاسقىنى بولا قالعان جاعدايدا حالىقتى جەدەل قۇلاقتاندىرۋ جولدارىن پىسىقتادى. سونداي-اق بايلانىس جۇيەلەرى مەن ديسپەتچەرلىك قىزمەتتەردىڭ دايىندىعى، ماتەريالدىق-تەحنيكالىق، ازىق-ت ۇلىك جانە مەديتسينالىق رەزەرۆتەردىڭ قورى تەكسەرىلدى.

جەرگىلىكتى اتقارۋشى ورگاندار وزەن جاعالاۋلارىنداعى جىرىلۋ قاۋپى بار جەرلەردەگى بوگەتتەردى مىقتاپ، ەۆاكۋاتسيا بولا قالعان جاعدايدا تۇرعىنداردى توسەك-ورىنمەن جانە ىستىق تاماقپەن قامتاماسىز ەتۋ جايىن رەتتەدى. جەدەل قيمىل جاساقتارى سۋ باسۋ قاۋپى بار وتكەلدەردەگى كوپىرلەر مەن قۇبىر ارنالارىن تازالاپ، قۇم تولتىرىلعان قاپتار مەن ينەرتتى ماتەريالداردىڭ  جەتكىلىكتى مولشەردە ەكەندىگىنە كوز جەتكىزدى.

كەشەندى وقۋ-جاتتىعۋ كەزىندە جەدەل-قۇتقارۋ جاساعىنىڭ قۇتقارۋشىلارى توبىل وزەنىندە مۇز استىنا ءتۇسىپ كەتكەن 3 ازاماتتى قۇتقارۋ وپەراتسياسىن وتكىزدى. «زارداپ شەككەندەردى» قۇتقارۋ بارىسىندا ارنايى «پەگاس» قايىعى  پايدالانىلىپ، وزگە دە قۋاتتى تەحنيكا قۇرالدارىنىڭ مۇمكىندىگى سىنالدى.

سۋ تاسقىنىنا قارسى دايىندىق شارالارىنا «قازاق سۋ شارۋاشىلىعى» عىلىمي-زەرتتەۋ ينستيتۋتىنىڭ وكىلدەرى دە ات سالىستى. ولار قۇتقارۋشىلارمەن بىرگە جوعارعى-توبىل سۋ قويماسىنىڭ گيدروتەحنيكالىق قۇرىلعىسىنىڭ جاي-كۇيى مەن تاسقىن كەزەڭىندە سۋ قابىلداۋ مۇمكىندىگىن باعامدادى.

 

قوستاناي

سوڭعى جاڭالىقتار

ۇقساس جاڭالىقتار