ايماقتار • 27 اقپان، 2020

الماتىلىق سوعىس ارداگەرىنە پرەزيدەنتتەن حات كەلدى

166 رەتكورسەتىلدى

اقپان ايىنىڭ باسىندا ۇلتتىق ۇلاننىڭ جاۋىنگەرلەرى ۇلى وتان سوعىسىنداعى جەڭىستىڭ 75 جىلدىعىنا ارنالعان ء«بىز – جەڭىستىڭ مۇراگەرىمىز!» تاعزىم ەستافەتاسى اياسىندا ايگىلى پانفيلوۆ ديۆيزياسىنىڭ جاۋىنگەرى، الماتىلىق ۇلى وتان سوعىسىنىڭ ارداگەرى قايىرلى جونقاباەۆتىڭ ء ۇيىنىڭ اۋلاسىندا سالتاناتتى شەرۋ ۇيىمداستىرعان بولاتىن. ارداگەر وزىنە كورسەتىلگەن قۇرمەتكە ريزاشىلىق ءبىلدىرىپ، پرەزيدەنت قاسىم-جومارت توقاەۆقا العىس حات جولداعان ەدى. كوپ كەشىكپەي مەملەكەت باسشىسىنان جاۋاپ تا كەلدى.

ارداگەرگە ارنالعان حات  ۇلتتىق ۇلاننىڭ «وڭتۇستىك» وڭىرلىك قولباسشىلىعىنا كەلىپ تۇسكەندىكتەن، قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعى قولباسشىسىنىڭ ورىنباسارى پولكوۆنيك نيازتاي الكەشەۆ باستاعان اسكەريلەر قايىرلى ۋاتاي ۇلىنىڭ ۇيىنە بارىپ، ەل پرەزيدەنتىنىڭ حاتىن تابىس ەتتى.

جۇرەكجاردى حاتتا: «قۇرمەتتى قايىرلى ۋاتاي ۇلى! ىزگى تىلەكپەن جانە ىستىق ىقىلاسپەن جازعان حاتىڭىزدى الدىم. جىلى لەبىزىڭىز ءۇشىن شىن كوڭىلمەن العىسىمدى بىلدىرەمىن. بيىل ەلىمىزدە ۇلى جەڭىستىڭ 75 جىلدىعى كەڭ كولەمدە اتالىپ وتەدى. بۇل – ەڭ الدىمەن، ءوزىڭىز سياقتى ارداگەرلەرىمىزگە كورسەتكەن قۇرمەتىمىز. سىزدەردىڭ زۇلمات جىلدارداعى ەرلىكتەرىڭىز ەشقاشان ۇمىتىلمايدى.سوعىستان كەيىنگى ادال ەڭبەكتەرىڭىز دە وسكەلەڭ ۇرپاق ءۇشىن ءاردايىم ۇلگى-ونەگە. سىزدەر قازاقستاننىڭ تاۋەلسىز مەملەكەت رەتىندە قالىپتاسۋىنا زور ۇلەس قوستىڭىزدار. سوندىقتان وزدەرىڭىزدى ارداقتاپ، ەرلىكتەرىڭىزدى دارىپتەۋ – ازاماتتىق ءارى پەرزەنتتىك بورىشىمىز. سىزگە زور دەنساۋلىق، اۋلەتىڭىزگە اماندىق تىلەيمىن! جۇزگە جەتىپ، عاسىر تويىن تويلاڭىز! ۇرپاعىڭىزبەن مىڭ جاساڭىز!» دەپ جازىلعان.

مەملەكەت باسشىسىنان حات العان قاريانىڭ كوڭىلى شالقىپ، ريزا بولدى: «قۇرمەتتەرىڭە راقمەت، اينالايىندار! ەڭ الدىمەن ەلىمىز  امان بولسىن. ماعان ۋاقىتىن ءبولىپ لەبىزىن بىلدىرگەن پرەزيدەنتىمىزگە  ريزامىن! ەلىمىز ءۇشىن اتقارىپ جاتقان قىزمەتى باياندى بولىپ، ۇلكەن جەتىستىكتەرگە جەتەيىك.   مەملەكەتىمىز دامىپ، بولاشاعىمىز باياندى بولسىن. كەلەشەك جاستاردىڭ قولىندا. ولار سونى ءبىلۋى كەرەك»، - دەدى ارداگەر.

قايىرلى ۋاتاي ۇلى 1921 جىلى 10 قىركۇيەكتە شىعىس قازاقستان وبلىسى سامار اۋدانىندا دۇنيەگە كەلگەن. ەڭبەك جولىن 1940 جىلى شقو قۇلجا ورتا مەكتەبىندە مۇعالىم بولىپ باستاعان. 1941 جىلى قازان ايىندا پانفيلوۆ ديۆيزياسىنىڭ 23-ءشى گۆارديالىق پولكىنە قىزىل اسكەر جاۋىنگەرى بولىپ الىندى.  

ارداگەر سوعىسقا باسىنان اياعىنا دەيىن قاتىسقان. 8-ءشى گۆارديالىق اتقىشتار ديۆيزياسى قۇرامىندا پۋلەمەتشى بولا ءجۇرىپ،   كەڭەس وداعىنىڭ باتىرى مالىك عابدۋللينمەن ءبىر ساپتا شايقاسقان. بەلورۋسسيا، پولشا، ەستونيانى ازات ەتۋگە قاتىسقان.    1943 جىلى اقپاندا رجەۆتەگى قاندى مايداندا اۋىر جارالانعان جاۋىنگەر جەڭىستى درەزدەندە قارسى الىپتى.

سوڭعى جاڭالىقتار

ۇقساس جاڭالىقتار