ايماقتار • 26 اقپان، 2020

«اسكەري ءونىم» باعدارلاماسىنىڭ كەلەسى كەزەڭى قاشان باستالادى؟

16 رەتكورسەتىلدى

«تۇرعىن ءۇي قۇرىلىس جيناق بانكىندە» بولاشاق باسپانالارىنا قاراجات جيناپ جۇرگەن جانە تۇرعىن ءۇي تولەمدەرىن الاتىن 3000 قازاقستاندىق اسكەريلەر مەن ارنايى ورگان قىزمەتكەرلەرىنە سمس-حابارلاما جىبەرىلدى. وندا «اسكەري ءونىم» باعدارلاماسىنىڭ كەلەسى كەزەڭىنىڭ باستالۋ مەرزىمى مەن ءوتىنىم بەرۋ ءۇشىن تۇرعىن ءۇي قۇرىلىس جيناق بانكىنە قاشان حابارلاسۋ كەرەكتىگى جايىندا اقپارات كورسەتىلگەن.

بانكتىڭ ءباسپاسوز مالىمەتتەرىنە سۇيەنسەك، 2020 جىلى «اسكەري ءونىم» باعدارلاماسى بويىنشا جەڭىلدەتىلگەن نەسيە بەرۋ ماقساتىندا 60 ملرد تەڭگە ءبولىندى. بانك ءاربىر كليەنت ءۇشىن ۋاقىتتىڭ قىمبات ەكەندىگىن جاقسى بىلەدى. وسىعان وراي، باعدارلاما بويىنشا زايم الاتىن ۇمىتكەرلەر ءتىزىمىن تۇرعىن ءۇي تولەمدەرىن الۋشىلاردىڭ جيناعان سوماسىنا جانە دە ءوتىنىمدى بەرۋ مەرزىمىنە ساي جاسادى.

بۇل تىزىمگە 2020 جىلدىڭ 1 قاڭتارىنا دەيىن ورتاشا نەسيە سوماسىنىڭ - نۇر-سۇلتان جانە الماتى قالالارى بويىنشا 25 ملن.تەڭگە، ال قالعان ايماقتار بويىنشا 15 ملن.تەڭگە - 10%-49%-ىن جيناعان ۇمىتكەرلەر كىرەدى.

جالپى العاندا تىزىمگە شامامەن 3 مىڭ ادام الىندى. ەڭ الدىمەن 49% كولەمىندە قاراجات جيناعاندار، ال ودان كەيىن قاراجات كولەمىنە ساي ەڭ كوبىنەن ەڭ تومەنگىسىنە دەيىنگى سالىمى بار ۇمىتكەرلەر ىرىكتەلدى. ءتىزىمنىڭ باسىندا تۇرعان ازاماتتار قازىردىڭ وزىندە نەسيە الۋ ءۇشىن ءوتىنىم بەرە الادى. سمس-حابارلامادا ولاردىڭ تۇرعىن ءۇي قۇرىلىس جيناق بانكىنە قاي مەرزىم ىشىندە بارۋ كەرەكتىگى كورسەتىلگەن. ال، مەرزىمى كەيىنگە قالدىرىلعان ۇمىتكەرلەرگە بانك بەلگىلەنگەن ۋاقىتقا دەيىن ءبىر اي قالعاندا قوسىمشا حابارلاما جىبەرەدى. بۇل اقپاراتتى ۇمىتكەر، سونداي-اق، ينتەرنەت-بانكينگتەگى جەكە كابينەتىندە دە قاراي الادى.

اسكەري قىزمەتكەرلەردىڭ ءوز ۋاقىتىن دۇرىس جوسپارلاپ، قاجەتتى قۇجاتتاردى دايىنداپ ۇلگەرۋى ءۇشىن، ءاربىر ۇمىتكەرگە نەسيە ءوتىنىمىن جولداۋ ماقساتىندا ەكى اي كولەمىندە ۋاقىت بەرىلەدى. ماسەلەن، ەگەر ءوتىنىم بەرۋ مەرزىمى رەتىندە ءساۋىر ايى كورسەتىلسە، وندا ۇمىتكەر نەسيە الۋ ءۇشىن ءوتىنىمىن 2020 جىلدىڭ 1 ساۋىرىنەن باستاپ 2020 جىلدىڭ 29 مامىرىنا دەيىن تاپسىرا الادى.

«اسكەري ءونىم» باعدارلاماسى بويىنشا زايم الۋ شارتتارى وزگەرتىلمەدى. زايم جاڭا نەمەسە قولدانىستاعى ۇيدەن پاتەر الۋعا جانە وعان جوندەۋ جۇمىستارىن جۇرگىزۋگە، سونداي-اق، ۇلەستىك قاتىسۋ كەلىسىمشارتى بويىنشا بەرىلەدى. باعدارلاما تالاپتارىنا ساي، باستاپقى جارنا مولشەرى 15%-دى، زايم بويىنشا سىياقى مولشەرلەمەسى – 8%-دى، ال نەسيەلەندىرۋ مەرزىمى – 25 جىلعا دەيىنگى ۋاقىتتى قۇرايدى.

ال ەندى ەڭ ۇنەمشىل سالىمشىلار ءۇشىن قاجەتتى زايم سوماسىنىڭ 50%-نا دەيىنگى مولشەردە قاراجات سالۋ مۇمكىندىگى بار اسكەري قىزمەتكەرلەر وزدەرى قالاعان ۋاقىت ىشىندە جىلدىق 6% مولشەرلەمەمەن زايم الا الادى. زايمنىڭ بۇل ءتۇرىن بانك بەلگىلەگەن تىزىمنەن تىس تۇرعىن ءۇي تولەمدەرىن الاتىن بارلىق سالىمشىلار راسىمدەي الادى

اتالعان ونىمگە دەگەن سۇرانىس پەن اسكەري قىزمەتكەرلەردىڭ وتىنىمدەرىنە بايلانىستى «تۇرعىن ءۇي قۇرىلىس جيناق بانكى» وسى جىلى اتالعان باعدارلامانى كەڭەيتۋ مۇمكىندىگىن قاراستىرۋعا دايىن.

الماتى

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار