فۋتبولدان قازاقستان قۇراماسى بۇرناعى كۇنى تۇندە ەلورداداعى «استانا-ارەنا» سپورت كەشەنىندە گرۋزيا كومانداسىمەن جولداستىق كەزدەسۋ وتكىزىپ, 1:0 ەسەبىمەن ۇتتى.
فۋتبولدان قازاقستان قۇراماسى بۇرناعى كۇنى تۇندە ەلورداداعى «استانا-ارەنا» سپورت كەشەنىندە گرۋزيا كومانداسىمەن جولداستىق كەزدەسۋ وتكىزىپ, 1:0 ەسەبىمەن ۇتتى.
جاسىراتىنى جوق, بۇعان دەيىنگى بىرنەشە ويىندى ءساتسىز اياقتاعان قازاقستان قۇراماسى ويىنشىلارىنىڭ بۇل جولى تابىستى ويناي قوياتىنىنا جانكۇيەرلەردىڭ كوپشىلىگى ونشالىقتى سەنە قويعان جوق. ماتچتا كوماندا تاعى جەڭىلىسكە ۇشىراسا, وزىنە دەگەن سەنىمنىڭ سەلكەۋى ءبىرجولاتا سەتىنەپ كەتەتىنىن باس جاتتىقتىرۋشى ميروسلاۆ بەرانەك تە جاقسى ءبىلدى. سوندىقتان, ول كەزدەسۋدە قالايدا بەتبۇرىس جاساۋعا بارىن سالدى.
ال ماتچتىڭ باستاپقى جاعى قازاقستاندىقتار ءۇشىن جاقسى ناتيجە كۇتىپ جاتۋدىڭ اۋرەشىلىك بولاتىنىن العا تارتقانداي كورىندى. كەزىندە «كەڭەستىك برازيليالىقتار» دەگەن ات العان گرۋزيندەر وزدەرىنىڭ ويناۋ تەحنيكاسىن جاقسى مەڭگەرگەندەرىن تانىتىپ, كوپكە دەيىن دوپتى ءبىزدىڭ جىگىتتەرگە ۇستاتا قويمادى. سول سەنىمدىلىكتىڭ سۇرلەۋىندە ولار بىرنەشە رەت قاقپاعا دوپ باعىتتاپ ۇلگەردى. سونىڭ ىشىندە الەكساندر كوباحيدزە ۇرعان دوپ قاقپاشى اندرەي سيدەلنيكوۆتى ءبىر سىلكىندىرىپ ءوتتى.
ءبىزدىڭ جەرلەستەرىمىز قارسى جاققا ءبىرىنشى شابۋىلدى تەك 15-مينۋتقا قاراي عانا جاساي الدى. ايىپ الاڭىنىڭ ىشىنە ەكپىندەي كىرگەن سەرگەي حيجنيچەنكو ۇرعان دوپ گولكيپەر نۋكري رەۆيشۆيليدىڭ قولىنان تابىلدى. الايدا, وسىنىڭ ارتىنشا قايتا جاسالعان شابۋىل تۇسىندا سەرگەي ءمۇلت كەتپەدى. ايىپ الاڭىندا دوپ قابىلداپ العان قاراعاندىلىق جىگىت كەنەت كىلت بۇرىلدى دا, قاقپاعا قاراي شىرەنە تارتتى. گول!
مىنا ساتسىزدىكتەن كەيىن مەيماندار تاعى ىشقىندى. ولاردىڭ جاپپاي العا ۇمتىلعان جويقىن جورىعى بارىسىندا كوباحيدزە ءبىر رەت باسىمەن قاقپاعا دوپ باعىتتادى. ال جانو انانيدزەنىڭ الىستان اتقىلاعان دوبى نىسانادان قيىس كەتتى. سونىڭ ارتىنشا بۇرىشتاما بەرىلىپ, ودان ۇشقان دوپتى زۋراب حيزانيشۆيلي قاقپاعا ءدوپ تۇسىرۋگە ۇمتىلدى. بىراق بۇل دا اندرەي تۇرعان شەڭبەردىڭ ۇستىنەن زۋ ەتە ءتۇستى.
وسىلايشا, كەزدەسۋدىڭ ءون بويى الما-كەزەك شابۋىلمەن ءوتىپ جاتتى. بۇل ويىندا قوناقتاردىڭ دوپقا كوبىرەك يەلىك ەتكەندەرىن دە, قاقپاعا ارتىعىراق ۇرعاندارىن دا, ستاندارتتى جاعدايعا مولىراق تاپ بولعاندارىن دا ايتا كەتۋىمىز كەرەك. وسىنداي تارتىستى كەزدەسۋدىڭ 1:0 ەسەبىمەن ءبىزدىڭ قۇراما پايداسىنا شەشىلگەنىنىڭ ءوزى داتكە قۋات.
ەندىگى ءبىر ايتا كەتەتىن جايت, بۇعان دەيىن ءسوز ەتىپ وتىرعان كوماندالار 2 رەت كەزدەسكەن ەدى. 2005 جىلعى 17 تامىزدا الماتىدا وتكەن ءبىرىنشى ويىندا قوناقتار 2:1 ەسەبىمەن جەڭىسكە جەتتى. ال 8 قازاندا تبيليسيدە وتكەن قارىمتا ويىن 0:0 ەسەبىمەن تەڭ اياقتالدى. مۇنىڭ ەكەۋى دە الەم چەمپيوناتىنا ىرىكتەۋ ءتۋرنيرى شەڭبەرىندە ءوتتى. سونىمەن, ءۇشىنشى ويىندا ءبىرىنشى رەت جەڭىسكە جەتكەن قازاقستاندىقتار بۇل قارسىلاسىمەن اراداعى ۇتىس سانىن دا, دوپ ايىرماشىلىعىن دا تەڭەستىرىپ وتىر.
رۋسلان يگىلىك.
