اتىراۋ وبلىسىنىڭ بۇرىنعى اكىمى, قازىر ىزدەۋدە جۇرگەن قاشقىن بەرگەي رىسقاليەۆتىڭ قارىنداسى گۇلجانار رىسقاليەۆاعا 2005 جىلى اقتوبەلىك بەلگىلى بيزنەسمەن تالعات قوجاحمەتوۆتى ولتىرۋگە تاپسىرىس بەردى, دەگەن ايىپ تاعىلىپ وتىر. بۇل تۋرالى «ەكسپرەسس-ك» گازەتى حابارلادى.
كاسىپكەر تالعات قوجاحمەتوۆ وتكەن عاسىردىڭ 90-شى جىلدارىنىڭ سوڭىندا بەرگەي رىسقاليەۆپەن بىرگە اقتوبەدە «اياجان» دەگەن اراق ءوندىرۋ فيرماسىن اشقان كورىنەدى. ول 2004 جىلى ءوزىنىڭ ايەلى ەلەنانى ءولتىرىپ, قاشىپ كەتەدى. بىراق قاشىپ ۇزاققا بارا الماسىن بىلگەسىن, قۇقىق قورعاۋ ورگاندارى قولىنا ءوزى كەلىپ بەرىلەدى. سوڭىنان بولعان سوت ونى قىلمىستى اففەكت جاعدايىندا جاسادى دەگەن جەڭىلدىكپەن شارتتى جازا عانا بەرىپ, قاماۋدا بوساتىپ جىبەرەدى.
ال بيزنەسمەننىڭ ءوزىن ءولتىرۋ 2005 جىلى ورىن الادى. پوليتسيا وسى وقيعانىڭ ارتىن كوپ سۋىتپاي, قىلمىستى جاساعان راحمەتۋللا ورىنباەۆ دەگەن ازاماتتى دا قولعا تۇسىرەدى. كەزىندە بۇل جىگىت قوجاحمەتوۆتىڭ قاراماعىندا كۇزەتشى بولىپ جۇمىس ىستەگەن ەكەن. ونىڭ ايتۋىنشا, 1999 جىلدىڭ قاراشاسىندا بيزنەسمەن مۇنى ۇرىپتى-مىس. وسىعان وكپەلەگەن ورىنباەۆ بىردەن جۇمىستان شىعىپ كەتكەن سەكىلدى. بىراق ىشىندە قان قاتىپ قالعان ول كەك قايتارۋدىڭ جولىن ىزدەپ جۇرە بەرىپتى. سونىڭ ىڭعايى 2005 جىلدىڭ 22 ماۋسىمى كۇنى كەلگەنگە ۇقسايدى. وسى كۇنى ول جولداستارىمەن بىرگە قوجاحمەتوۆتىڭ ىزىنە ءتۇسىپ اڭدىپ, وعان ءوز ءۇيىنىڭ اۋلاسىندا شابۋىل جاسايدى. مۇنىڭ سالعان جاراقاتى سالدارىنان تالعات اۋرۋحانادا كوز جۇمادى. ال سوت ورىنباەۆتى 16 جىلعا باس بوستاندىعىنان ايىرىپ, قاتاڭ رەجىمدى كولونيادا وتىرۋ جازاسىنا كەسەدى.
2013 جىلدىڭ باسىندا جوعارعى سوت راحمەتۋللا ورىنباەۆقا قاتىستى ۇكىمنىڭ كۇشىن جويادى. وسىنىڭ سوڭىن الا استانادان اقتوبەگە قۇرامىندا باس پروكۋراتۋرانىڭ, ىشكى ىستەر مينيسترلىگىنىڭ جانە ۇلتتىق قاۋىپسىزدىك كوميتەتىنىڭ قىزمەتكەرلەرى بار كۇشەيتىلگەن جەدەل توپ كەلىپ, بيزنەسمەننىڭ ولىمىنە قاتىستى قىلمىستىق ءىستى قايتا تەكسەرۋگە كىرىسەدى. وسى جۇمىستاردىڭ بارىسىندا تەرگەۋ قىزمەتكەرلەرىندە جاڭا ۆەرسيا پايدا بولادى. وعان سايكەس, كاسىپكەردى ءولتىرۋ ءۇشىن ورىنباەۆتى 15 مىڭ دوللار اقشاعا جالداعان گۇلجانار رىسقاليەۆا دەگەن جاڭا بولجام سۋدىڭ بەتىنە قالقىپ شىعا كەلەدى.
ازىرگە ر.ورىنباەۆتىڭ ءوزى كىسى ءولتىرۋدى تاپسىرىس نەگىزىندە جاساعانىن مويىنداماي وتىرعان سىڭايلى. الايدا, ىستە ونىڭ قوجاحمەتوۆكە رىسقاليەۆانىڭ تاپسىرماسى بويىنشا شابۋىل جاساۋ جوسپارىن جولداستارىمەن بىرگە جاساسقانىنا كۋالىك ەتكەن ادامنىڭ تۇسىندىرمەسى تىركەلىپ قويىپتى.
قىلمىستىق ىستە ءدال قازىرگى كەزدە گۇلجانار رىسقاليەۆانىڭ تەرگەۋدەن قاشىپ, ىزدەۋدە جۇرگەنى ايتىلادى. وعان قاتىستى ازىرگە سىرتتاي قىلمىستىق ءىس قوزعالىپ وتىر.
قۇرىش نۇرىمبەت.
