كەشە ەلورداداعى وقۋشىلار سارايىندا «نۇر وتان» حالىقتىق-دەموكراتيالىق پارتياسى كوپبالالى, از قامتاماسىز ەتىلگەن وتباسىلاردان شىققان, سونداي-اق, اتا-انالارىنىڭ قامقورلىعىنسىز قالعان بالالاردى جاڭا وقۋ جىلىنا دايىنداۋ ماقساتىندا قايىرىمدىلىق اكتسياسىن وتكىزدى.
كەشە ەلورداداعى وقۋشىلار سارايىندا «نۇر وتان» حالىقتىق-دەموكراتيالىق پارتياسى كوپبالالى, از قامتاماسىز ەتىلگەن وتباسىلاردان شىققان, سونداي-اق, اتا-انالارىنىڭ قامقورلىعىنسىز قالعان بالالاردى جاڭا وقۋ جىلىنا دايىنداۋ ماقساتىندا قايىرىمدىلىق اكتسياسىن وتكىزدى.
اكتسيا بارىسىندا بالالارعا مەكتەپكە قاجەتتى جابدىقتار تابىستالدى. بۇل ءىس-شاراعا قاتىسقان «نۇر وتان» حدپ استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ اكتسيانىڭ جىل سايىن وتكىزىلىپ جۇرگەنىن تىلگە تيەك ەتتى. «1 قىركۇيەك – بالالار ءۇشىن ۇلكەن مەرەكە. بيىل استانادا ون ەكى مىڭنان استام بالا العاش رەت مەكتەپ تابالدىرىعىن اتتاماق. ءسويتىپ, 82 مەكتەپتەگى وقۋشىلار سانى 86 مىڭعا جەتەدى. بۇل ۇلكەن جەتىستىك. ايتسە دە, قوعامدا قالىپتاسقان ءتۇرلى الەۋمەتتىك جاعدايعا بايلانىستى كەيبىر اتا-انالار بالالارىن مەكتەپكە دايىنداي الماي وتىر. ءبىز وسى ورايدا مەكتەپ تابالدىرىعىن ەندى اتتاعالى وتىرعان بۇلدىرشىندەرگە كومەكتەسۋ نيەتىمەن جىل سايىن اكتسيا ۇيىمداستىرىپ ءجۇرمىز. بيىلعى اكتسيا «بولاشاقتى بىرگە قالايمىز» دەگەن ۇرانمەن وتۋدە. بۇگىن ءبىز وسى شاراعا 150 بالانى شاقىرىپ, كومەك كورسەتۋدەمىز. ال, قالا, اۋدان فيليالدارى باسشىلارىمەن, دەپۋتاتتارمەن, قالالىق ءبىلىم باسقارماسىمەن بىرلەسە وتىرىپ 1700 بالاعا كومەك كورسەتپەكپىز. مەكتەپكە ەندى باراتىن بالا ەشقانداي كەمشىلىك كورمەۋى ءتيىس. ولار مەكتەپكە بارعاندا ەڭ قاجەتتى قۇرالدارى بولۋى كەرەك. ءبىز وسى اكتسيانى قوعام بولىپ قولداۋىمىز كەرەك», دەدى «نۇر وتان» حدپ استانا قالالىق فيليالى توراعاسىنىڭ ورىنباسارى س.احمەتوۆ.
استانا قالالىق ءبىلىم باسقارماسىنىڭ باسشىسى ءاسيا بيمەندينا اكتسياعا قولۇشىن بەرۋشىلەردىڭ جىلدان-جىلعا كوبەيىپ كەلە جاتقانىن ايتتى. ودان بولەك بيىل جەرگىلىكتى بيۋدجەتتەن وسى ماقساتقا 40 ميلليون تەڭگە بولىنگەن. سونىڭ ەسەبىنەن ءبىلىم باسقارماسى بيىل 6 مىڭعا جۋىق بالاعا كومەك كورسەتكەلى وتىر. «ءبىزدىڭ وتانىمىزعا ءبىلىمدى, ونەرلى, دارىندى بالالار كەرەك. ويتكەنى, بولاشاعىمىز وسىنداي بالالاردىڭ قولىندا. سول ءۇشىن مەكتەپ بالالارىنىڭ بارلىعىنا دا تەڭ جاعداي جاسالۋى قاجەت», دەدى ءبىلىم باسقارماسىنىڭ باستىعى.
شارانىڭ سوڭى كونتسەرتكە ۇلاستى.
ايگۇل سەيىلوۆا,
«ەگەمەن قازاقستان».
استانا.
