ياعني, بىلتىر بيكەن ريموۆا اتىنداعى وبلىستىق دراما تەاترى, ءسۇيىنباي اتىنداعى وبلىستىق فيلارمونيا, «الاتاۋ اۋەندەرى» كونتسەرتتىك بىرلەستىگى, حالىق شىعارماشىلىعى ورتالىعى, وبلىستىق تاريحي-مادەني مۇرانى قورعاۋ ورتالىعىنان بولەك 247 مادەنيەت ءۇيى مەن كلۋبتار, 278 كىتاپحانا, 25 مۋزەي مەن 2 گالەرەيا جانە 20 ارحيۆ مەملەكەتتىڭ قولداۋىن سەزىنگەنى انىق. ءبىز بۇل جولى وبلىستاعى كىتاپحانالارعا قاتىستى ءسوز قوزعاماقپىز. ويتكەنى, قازىر ايماقتا كىتاپ وقۋعا دەگەن سۇرانىس ارتىپ, ەلدى مەكەندەردە كىتاپحانالار جەتىسپەۋشىلىگى بايقالىپ وتىر ەكەن. مىسالعا, 2019 جىلى كەگەن اۋدانىندا بىردەن 9 كىتاپحانا اشىلعان. جالپى, اۋىلداعى اعايىننىڭ كىتاپ وقۋعا دەگەن سۇرانىس قاناعاتتاندىرۋ ءۇشىن قازىرگى زامانعا ساي قىزمەت كورسەتەتىن كىتاپحانالاردى اشۋ ازدىق ەتەتىنى ءسوزسىز. اسىرەسە, وقىرمان تالعامىنان شىعاتىن رۋحاني سۇرانىستى وتەۋ ءۇشىن مەرزىمدى باسىلىمدار مەن كىتاپتاردىڭ مول قورىن قالىپتاستىرۋ قاجەتتىگى كۇن تارتىبىندە تۇر.
وسى ورايدا الماتى وبلىسىنداعى كىتاپحانالاردىڭ قاجەت قورىن ولكەتانۋ ادەبيەتىمەن تولىقتىرۋ, وقىرمانداردىڭ تاقىرىپتىق سۇرانىسىن قاناعاتتاندىرۋ مەن ايماقتىڭ تاريحى مەن مادەنيەتىن ناسيحاتتاۋ ماقساتىندا جۇرگىزىلگەن جۇمىستارمەن تانىسۋ ءۇشىن ساكەن سەيفۋللين اتىنداعى وبلىستىق امبەباپ كىتاپحاناعا بارعان ەدىك.
- بىلتىر الماتى وبلىسى اكىمىنىڭ قولداۋىمەن «100 تومدىق جەتىسۋ كىتاپحاناسى» جوباسى اياسىندا 63 اۆتوردىڭ كىتاپتارى جارىق كورگەن بولاتىن. ونىڭ ىشىندە «جاستار» جىلىنا وراي وبلىستان تۇلەگەن 20 جاس اقىن-جازۋشىنىڭ جەكە جيناقتارىنىڭ باسپا بەتىن كورۋى ەرەكشە جاڭالىق دەپ بىلەمىز. ال ءىلياس جانسۇگىروۆتىڭ تۋعانىنا 125 جىل تولۋىنا وراي قالامگەردىڭ قالامىنان تۋعان شىعارمالاردىڭ تولىق جيناعى قۇراستىرىلىپ, 20 توم ەتىپ باسىلىپ, شىقتى. سونداي-اق قازاق قالامگەرلەرى ساكەن سەيفۋللين, بەيىمبەت مايلين, ءىلياس جانسۇگىروۆتىڭ 125 جىلدىق مەرەيتويىنا وراي ء«ۇش ارىس» كىتابى جارىققا شىقتى. بۇل كىتاپتىڭ تۇساۋكەسەرى الماتى قالاسىندا جانە تۇركيا مەملەكەتىندە كەسىلىپ, ناسيحاتتالدى. وسى كىتاپتار جەتىسۋدىڭ كىتاپقۇمار قاۋىمى ءۇشىن لايىقتى تارتۋ بولدى دەپ ويلايمىن. جارىق كورگەن كىتاپتار كوپشىلىك قاۋىمعا قول جەتىمدى بولۋى ءۇشىن وبلىستاعى بارلىق كىتاپحانالارعا جەتكىلىكتى دانادا تاراتىلدى, - دەيدى ساكەن سەيفۋللين اتىنداعى الماتى وبلىستىق امبەباپ كىتاپحانانىڭ ديرەكتورى عاليا توقاباەۆا.
جەكە قورىندا 5 ميلليون داناعا جۋىق كىتاپ ساقتاپ وتىرعان وبلىستىق كىتاپحانا وقىرمانعا جاڭاشا قىزمەت كورسەتۋگە بەت بۇرعان ەكەن. كىتاپحانادا كەلۋشىلەرگە قولايلى جاعداي بارىنشا جاسالعان. كىتاپ قورى مەن مەرزىمدى باسىلىمدارعا تاپسىرىس بەرۋشىلەردىڭ سۇرانىسىن جەدەل, ساپالى ورىنداۋ ءۇشىن ىشكى ىزدەۋ جۇيەسى تولىقتاي اۆتوماتتاندىرىلىپتى. بۇل وقىرماننىڭ ۋاقىتىن ۇنەمدەۋگە تاپتىرمايتىن امال. ءارى وقىرمان بيلەتتەرى دە تولىقتاي تسيفرلى جۇيەگە كوشىپتى. بۇرىنعىداي تىركەلگەن ءار وقىرمانعا بىرنەشە بەت قاعاز تولتىرىلىپ, تۇرعىلىقتى مەكەنجايى تۋرالى انىقتاما مەن جەكە كۋالىك تالاپ ەتۋ ءۇردىسى جويىلعان. ناتيجەسىندە, كىتاپحانا زالىنا كەلەتىن وقىرمان قاراسى ەداۋىر كوبەيدى.
سونداي-اق كىتاپحانا مۇراعاتىنداعى مول رۋحاني مۇرا دا تسيفرلى قالىپقا كوشىرىلگەن ەكەن. «تسيفرلى قازاقستان» باعدارلاماسى بويىنشا جۇزەگە اسقان جۇمىستىڭ ناتيجەسىندە 2 934 906 ەلەكتروندى كاتالوگ تىزىمدەلىپتى. ال كىتاپحانانىڭ ىشكى جۇمىسى ەلىمىزدەگى بيبيليوگرافيالىق جۇيەنى بىرىكتىرەتىن «Web-Rabis» باعدارلاماسىنا قوسىلعان. قازىر اۋداندارداعى 32 كىتاپحانانىڭ مۇراعاتى دا وسى جۇيەگە قوسىلۋ ۇستىندە. ياعني, وبلىس كىتاپحانالارىنا جاسالعان رەتروكونۆەرسيا جۇمىسى تولىق اياقتالسا, بۇكىل ىزدەۋ جۇيەسى ورتالىقتاندىرىلىپ, بيبليوگرافتاردىڭ جۇمىسى جەڭىلدەي تۇسەدى. وقىرماندارعا قاجەتتى اقپاراتتى تابۋ وڭاي بولىپ, سيرەك كىتاپتارمەن قامتۋ دا دۇرىس جولعا قويىلماقشى.
بۇدان بولەك, وبلىستىق كىتاپحانا مەن «كازنەب» ەلەكتروندى رەسۋرسى اراسىنداعى بايلانىس جاقسارىپ, تۇتاس قازاق وقىرماندارى جەتىسۋلىق 1026 اۆتوردىڭ شىعارماشىلىعىمەن عالامتور ارقىلى تانىسۋعا مۇمكىندىك الىپ وتىر. ال تسيفرلى قالىپقا كوشىرىلگەن 650 دانا كىتاپقا ارنايى شتريح-تاڭبا بەرىلىپ, سمارتفونعا جۇكتەپ الىپ وقۋعا قول جەتتى.
- «جاڭا زاماننىڭ كىتاپحاناسى قانداي بولۋى كەرەك؟» دەگەن ساۋال ءبىز ءۇشىن ءاردايىم ماڭىزدى. ول ءۇشىن زامان اعىمىنا ىلەسە ءبىلۋىمىز كەرەك. قازىرگى كىتاپحانالار تەك وقىرمانعا قاجەتتى ادەبيەتتى تاۋىپ بەرۋمەن عانا شەكتەلمەۋى ءتيىس. بۇل جەر, ەڭ الدىمەن ادامعا رۋحاني دەمالىس سىيلايتىن ورتا. قازىر ءبىز ءوز عيماراتتارىمىزعا قىزمەت كورسەتۋدىڭ ءتۇرلى تاسىلدەرىن ەنگىزۋدەمىز. مىسالعا, Nur Otan پارتياسى تاراپىنان باستالعان «قازاقستان كىتاپحانالارى» جوباسى اياسىندا وبلىستاعى كىتاپحانا ۇيلەرىنەن 51 كوۆوركينگ ورتالىعى اشىلدى. ورتالىق اشىلعالى بەرى جاستار قاتارى كوبەيدى. ولارعا تەگىن ينتەرنەت جەلىسىنە قوسىلۋعا مۇمكىندىك بەردىك. سونداي-اق جاستارعا ەمتيحانعا دايىندالۋعا, ديپلومدىق جۇمىستار جازۋعا, شىعارماشىلىق جوبالار قۇرۋعا, ءىس-شارالار وتكىزۋگە, جالپى عالامتوردان قاجەتتى اقپارات ىزدەۋگە بارلىق مۇمكىندىك جاسادىق, - دەيدى كىتاپحانانىڭ ديرەكتورى عاليا توقاباەۆا.
