50 تومدىعى جارىق كوردى ماڭعىستاۋدا ۇلت رۋحانياتى ءۇشىن يگىلىكتى ءىس جۇزەگە اسىرىلدى. قايىرتپاي كەتكەن قاشاعان اقىننىڭ, «ءسوز دەگەنىڭ دە بۇيىم با, سويلەۋ دەگەن دە قيىن با؟!» دەپ اسقاق سويلەگەن اقتاننىڭ, ۇلى وتان سوعىسىنىڭ بولارىن ءتۇس كورىپ ءبىلىپ, سول ءۇشىن تۇرمەگە تۇسكەن تۇمەننىڭ, «قازاقتىڭ گومەرى» اتانعان مۇرىن جىراۋدىڭ, زاڭعار جازۋشى ءابىشتىڭ, ارقالى اقىندار سابىر مەن سۆەتقاليدىڭ ەلىندە بايىرعى جانە بۇگىنگى ءسوز ساپىرىپ, جىر اعىتقان شايىرلاردىڭ مۇرالارىن توپتاستىرىپ, ءوز الدىنا كولەمدى ەڭبەك ەتىپ قۇراستىرۋ كوپكە ارمان كۇيىندە قالىپ كەلە جاتقان بولاتىن.
50 تومدىعى جارىق كوردى ماڭعىستاۋدا ۇلت رۋحانياتى ءۇشىن يگىلىكتى ءىس جۇزەگە اسىرىلدى. قايىرتپاي كەتكەن قاشاعان اقىننىڭ, «ءسوز دەگەنىڭ دە بۇيىم با, سويلەۋ دەگەن دە قيىن با؟!» دەپ اسقاق سويلەگەن اقتاننىڭ, ۇلى وتان سوعىسىنىڭ بولارىن ءتۇس كورىپ ءبىلىپ, سول ءۇشىن تۇرمەگە تۇسكەن تۇمەننىڭ, «قازاقتىڭ گومەرى» اتانعان مۇرىن جىراۋدىڭ, زاڭعار جازۋشى ءابىشتىڭ, ارقالى اقىندار سابىر مەن سۆەتقاليدىڭ ەلىندە بايىرعى جانە بۇگىنگى ءسوز ساپىرىپ, جىر اعىتقان شايىرلاردىڭ مۇرالارىن توپتاستىرىپ, ءوز الدىنا كولەمدى ەڭبەك ەتىپ قۇراستىرۋ كوپكە ارمان كۇيىندە قالىپ كەلە جاتقان بولاتىن.
جۋىردا ماڭعىستاۋ وبلىسىندا «ماڭعىستاۋ اقىن-جازۋشىلارىنىڭ كىتاپحاناسى» سەرياسىمەن 50 تومدىق جارىق كوردى.
جيناققا اقىن-جىراۋ ابىل تىلەۋ ۇلىنان باستاپ, ماڭعىستاۋلىق 93 قالامگەردىڭ شىعارمالارى ەنگەن. كىتاپقا ءار كەزەڭدەردەگى اۆتورلاردىڭ ەجەلگى تاريحي وقيعالار مەن اڭىزداردى, سالت-ءداستۇردى, ءدىني نانىم-تانىمدى تەرەڭنەن تولعايتىن تۋىندىلارى, ەل قورعاۋ جولىنداعى ەرلىك ىستەردى ناسيحاتتايتىن داستاندارى, تاۋەلسىزدىكتى قاستەرلەپ, ونى قادىرلەي بىلۋگە شاقىراتىن بۇگىنگى زامان بيىگىنەن جازىلعان ولەڭدەرى مەن جىرلارى, تولعاۋلارى ەنگەن.
– بۇل جيناقتاردى قۇراستىرۋعا سەبەپ – ەلباسىمىز نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا «ءداستۇر مەن مادەنيەت – ۇلتتىڭ گەنەتيكالىق كودى... ءبىز ءوزىمىزدىڭ ۇلتتىق مادەنيەتىمىز بەن ءداستۇرىمىزدى وسى ارالۋاندىعىمەن جانە ۇلىلىعىمەن قوسىپ قورعاۋىمىز كەرەك, مادەني يگىلىگىمىزدى بولشەكتەپ بولسا دا جيناستىرۋىمىز كەرەك» دەگەن ءسوزى بولاتىن. ءبىز وتكەنىمىزدى كەلەشەككە جالعاستىرۋ ءۇشىن قازاقستاندىق ءپاتريوتيزمدى قالىپتاستىرۋعا, ونى قاستەرلەۋگە ادەبيەتىمىزدى دە, مادەنيەتىمىزدى دە پايدالانۋىمىز قاجەت, ونىڭ اسىلدارىن جيناپ, حالىقتىڭ ءوز يگىلىگىنە ۇسىنۋىمىز كەرەك. جۇرت جاقسى قابىلداپ جاتىر. وسىنداي ماڭىزدى ءىستى جۇزەگە اسىرۋعا قولداۋ كورسەتكەن وبلىس اكىمى اليك سەرىك ۇلىنا, جوبا جۇزەگە اسقانشا جارعاق قۇلاعى جاستىققا تيمەي جاناشىرلىق تانىتىپ, استانادان اقتاۋعا بىرنەشە رەت كەلىپ كەتكەن وبلىس اكىمىنىڭ بۇرىنعى كەڭەسشىسى, بەلگىلى ازامات, بىلىكتى زاڭگەر بەكەت تۇرعارا ۇلىنا, سونداي-اق «قازاقپارات» كورپوراتسياسى باسپاسىنىڭ پرەزيدەنتى قونىسبەك بوتبايعا العىس بىلدىرەمىز, دەيدى كوپتومدىقتىڭ قۇراستىرۋشىسى, شىعارۋشى-رەداكتور, اقىن ا.وتەگەنوۆ.
ماڭعىستاۋ وبلىسىنىڭ 40, ال اقتاۋ قالاسىنىڭ 50 جىلدىق مەرەيتويىنا ارناپ شىعارىلعان كوپتومدىققا بۇرىنعى اقىن-جىراۋلاردىڭ شىعارمالارى بۇدان بۇرىن جارىق كورگەن جىر جيناقتارىنان, جەكە مۇراعاتتاردان الىنعان. ەسىمى ەلگە بەلگىلى تۇلعالارمەن بىرگە ءارتۇرلى جاعدايلار يىنىندە تانىلىپ ۇلگەرمەي قالعان, بىراق ادەبي دۇنيەسى كوركەمدىك شەبەرلىك, تاريحي تانىمدىق, جاستاردى ادالدىققا باۋلۋ تۇرعىسىندا ايتۋعا تۇرارلىق قالامگەرلەردىڭ دە ەڭبەكتەرى ەلەۋسىز قالعان جوق.
ماڭعىستاۋدا قازىر جازۋشىلار وداعىنا مۇشە 15 قالامگەر بار. بىراق, بۇل جەرگىلىكتى قالامۇستارلاردىڭ سانى مەن ساپاسى وسىمەن شەكتەۋلى دەگەن ءسوز ەمەس, شىرايلى شىعارماشىلىعى بار اعا بۋىن وكىلدەرى دە, ولاردىڭ ورتا جاستاعى ءىزباسارلارى دا بار. جاستار دا جەتىلىپ كەلەدى. تەك, ادەبي ورتادان شالعايدا جاتقان ءوڭىردىڭ اقىن-جازۋشىلارى بەلدى ورتادان كورىنە بەرمەي وبلىس دەڭگەيىندە قالىپ قويادى. ال, ورتالىقتاعى اقىن-جازۋشىلاردان ىزدەپ كەلىپ, جاستارمەن جۇزدەسىپ, اقىل-كەڭەس بەرەتىندەر تاعى جوق. وسى جاعدايدا كوپتومدىقتىڭ جارىق كورۋى – قۇپتارلىق شارۋا.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
