رۋحانيات • 22 اقپان، 2020

جازۋشى ديداحمەت ءاشىمحاننىڭ 70 جىلدىعى وسكەمەندە باستالدى

198 رەتكورسەتىلدى

بۇل كىسىنىڭ ويلارى، تولعامدارى وڭىرلىك شەڭبەردە ەمەس، ۇلتتىق، مەملەكەتتىك اۋقىمدا.

وسكەمەندەگى وبلىستىق بالالار جانە جاسوسپىرىمدەر كىتاپحاناسىندا بەلگىلى جازۋشى، پۋبليتسيست ديداحمەت ءاشىمحانوۆتىڭ 70 جىلدىعىنا وراي «جەر اڭساعان سارىاتان» اتتى كەش ءوتتى.

كەش

كەشكە الماتىدان ارنايى كەلگەن قالامگەردىڭ ۇلى داۋلەت ءاشىمحان كىتاپحانا ۇجىمىنا العىسىن ءبىلدىرىپ: «بيىل اكەمىز تۋىپ-وسكەن شىعىس وڭىرىندە بىرقاتار شارالار ۇيىمداستىرماق ويدامىز. تويدىڭ باسى وسكەمەننەن باستاۋ العانىنا قۋانىشتىمىن» دەپ ريزاشىلىعىن جەتكىزدى.

ال

كەش جۇرگىزۋشىسى التىنعادىس كۇنتۋعان ۇلىنىڭ «اكەڭىز نەسىمەن ەستە قالدى؟» دەگەن سۇراعىنا: «اكەمىز اۋەلدە قاتال ەدى. كەيىن 14-15 جاسقا كەلگەننەن سوڭ دوس بولىپ كەتتىك دەسەم ارتىق ايتپاسپىن. ازىلدەسىپ، قالجىڭداسىپ جۇرەتىنبىز. تەڭ دارەجەدە سويلەسەتىن. اكەمنىڭ ماعان بەرگەن تاربيەسى – مەنى جانىنان قالدىرمايتىن. اكەمنىڭ جانىندا ءجۇرىپ قاليحان ىسقاق، اكىم تارازي سەكىلدى تۇلعالاردىڭ اڭگىمەلەرىن ەستىدىم. ۇلكەندەردىڭ ءسوزىن تىڭداپ ءوستىم. مۇنىڭ ماعان كوپ پايداسى ءتيدى» دەپ جاۋاپ بەردى.

كۇن

قالامگەردى ەسكە الۋ كەشىنە قاتىسقان، ءسوز زەرگەرىمەن ارالاس-قۇرالاس بولعان، جەرلەسى الىبەك قاڭتارباەۆ زامانداسى جايىندا اسەرلى ەستەلىك ايتتى. «ديداحمەتتىڭ مەنەن ەكى-ءۇش جاس كىشىلىگى بار. شىڭعىستايدا ينتەرناتتا بىرگە تۇردىق. ءاشىمحان اقساقال قويدا بولعاندىقتان بارلىق بالالارى ينتەرناتتا تۇردى. ىشىندەگى ەرەسەگى ديداحمەت ەدى. تۋعان-تۋىسقانعا دەگەن سۇيىسپەنشىلىگى كەرەمەت ەدى. ينتەرناتتا اسكەردەگى سياقتى عوي. ۇلكەندەر زورلىق-زومبىلىقتى كوپ جاسايتىن. باۋىرلارىنا الاڭداپ، شىج-بىج بولىپ سولارعا ارا ءتۇسىپ جۇرەتىن. سودان كەيىن كومەككە مەنى شاقىراتىن. بالالىق كەز. ينتەرناتتا تاماقتى شاقتاپ بەرەتىن. الگىسىنەن جىرىپ، ماعان اكەلەدى. ول ەندى قازىرگىشە ايتساق، سىبايلاس جەمقورلىق. ءبىر-ەكى كامپيتىن جەپ العاننان كەيىن ديداحمەتتەرگە ەشكىمدى تيىسكىزبەيتىنمىن. مەن 11 سىنىپتا وقىعاندا ديداحمەت 8 وقىپ ءجۇردى. سول كەزدە اۋداندىق گازەتتىڭ ءبىر جاق جەتىم بۇرىشىنا «شىرقال، ءان» دەگەن ءۇش شۋماق ولەڭى باسىلدى. ويباي-اۋ، سوندا ۇلكەن ءبىر كلاسسيكالىق دۇنيە تۋعىزعانداي ايرىقشا قۋانىپ، جالعىز ءبىر اق كويلەگىن كيىپ الىپ، اندا دا، مىندا دا بەزەكتەپ جۇگىرگەنى ەسىمدە. تۇڭعىش شىعارماشىلىق جەمىسى ەدى بۇل» دەدى جازۋشى وتكەن كۇندەرگە ساعىنا ەسكە الىپ.  

كەشكە قاتىسقان بەلگىلى اقىن، وسكەمەن قالالىق ىشكى ساياسات، مادەنيەت جانە تىلدەردى دامىتۋ ءبولىمىنىڭ باسشىسى قالقامان سارين جازۋشى مەرەيتويى قالالىق، وبلىستىق دەڭگەيدە ەمەس، رەسپۋبليكا دەڭگەيىندە اتالىپ وتسە دە جاراسىمدى ەكەندىگىن اتاپ ءوتتى. «ويتكەنى، بۇل كىسىنىڭ ويلارى، تولعامدارى وڭىرلىك شەڭبەردە ەمەس، ۇلتتىق، مەملەكەتتىك اۋقىمدا. سوندىقتان بۇل مەرەيتوي تۇتاس حالىقتىڭ، ادەبيەتتىڭ مەرەكەسىنە اينالادى دەپ ويلايمىن» دەدى ول.

شارا بارىسىندا ءسوز سويلەگەن عالىم-زەرتتەۋشىلەر باقىتجان كەلگەنباەۆا مەن ايجان قارتاەۆا ديداحمەت ءاشىمحان شىعارماشىلىعى سان قاتپارلى، كوپ زەرتتەۋدى قاجەت ەتەتىندىگىن تىلگە تيەك ەتتى. اقىن اسكەرحان اقتاي قالامگەردىڭ «جىندى جەل» اڭگىمەسىنىڭ ساحنالىق نۇسقاسىن ازىرلەگەنىن سۇيىنشىلەپ: «بىرنەشە تەاترلارعا ۇسىندىم. بۇيىرسا، 2021 جىلى الماتىداعى اۋەزوۆ تەاترىندا قويىلۋى مۇمكىن. قىزىلوردا وبلىستىق دراما تەاترى دا قىزىعۋشىلىق تانىتىپ وتىر. بيىل ەڭ اۋەلى وسكەمەندەگى دراما تەاتردا قويىلسا جاقسى بولار ەدى» دەدى.

وسكەمەندىك جۋرناليست، سۋرەتشى مەرەي قايناروۆ جازۋشىنىڭ 70 جىلدىعىنا وراي رەسپۋبليكالىق سۋرەتشىلەر بايقاۋى ۇيىمداستىرىلىپ جاتقانىن حابارلاپ، وتىنىمدەر 25 ناۋرىزعا دەيىن قابىلداناتىنىن جەتكىزدى.     

كەش بارىسىندا ديداحمەت ءاشىمحاننىڭ ومىردەن وتكەن سوڭ جارىق كورگەن «كەش» اتتى كىتابىنىڭ دا تانىستىرىلىمى ءوتىپ، كىتاپحانا ۇجىمى مەن وقىرماندارعا تابىستالدى.

     وسكەمەن

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار