«شەكارادان باسقا ەلدىڭ ازاماتتارى وتپەيدى» وبلىس اكىمى دانيال احمەتوۆ زايسانعا باردى

ايماقتار • 20 اقپان، 2020

«شەكارادان باسقا ەلدىڭ ازاماتتارى وتپەيدى»: وبلىس اكىمى دانيال احمەتوۆ زايسانعا باردى

1078 رەت كورسەتىلدى

قازىرگى ۋاقىتتا قىتاي شەكاراسىنان بىردە-ءبىر كىسى وتكەن جوق.

كەشە زايسان اۋدانىنىڭ سارىتەرەك جانە اينابۇلاق اۋىلىنىڭ تۇرعىندارى «قىتايدان كەلگەندەردى كوروناۆيرۋسقا بايلانىستى وسى اۋىلدارداعى مەديتسينالىق پۋنكتتەرگە ورنالاستىرادى» دەگەن انىق-قانىعى بەلگىسىز حاباردى ءبىر-بىرىنەن ەستىپ، بۇعان ءوز نارازىلىقتارىن بىلدىرگەن بولاتىن. الەۋمەتتىك جەلىلەردە زايسان اۋدانىنىڭ باس دارىگەرى مەن ونىڭ ورىنباسارى سارىتەرەك اۋىلىنىڭ تۇرعىندارىنا الدەبىر بۇيرىقتى كورسەتىپ، وسى بۇيرىق نەگىزىندە اۋىلداعى امبۋلاتورياعا مايقاپشاعاي شەكارا بەكەتىنەن بەرى قاراي وتكەن ازاماتتاردى 14 كۇنگە جاتقىزىپ، باقىلاۋ جاسايتىنى، ءتىپتى اۋىلداعى امبۋلاتورياعا توسەكتەردى كىرگىزىپ قويعانى جايىندا ايتىلىپ، ۆيدەو ارقىلى كورسەتىلگەن-ءدى. اۋىل تۇرعىندارى «مۇنى اۋدان باسشىلىعى بىزگە نەگە الدىن الا ەسكەرتپەيدى؟ نەگە ءتۇسىندىرىپ ايتپايدى؟ ءبىز بۇعان قارسىمىز» دەپ كەشە ءوز نارازىلىقتارىن جەتكىزگەن-ءدى. سودان كەيىن تۇنگى 11-لەر شاماسىندا زايسان اۋدانى اكىمى باستاعان، اۋداندىق پروكۋرور، ىشكى ىستەر ءبولىمىنىڭ باسشىلارى، اۋداندىق اۋرۋحانانىڭ باس دارىگەرى اۋىل تۇرعىندارىمەن كەزدەسۋگە بارعان بولاتىن. بۇل تۋرالى كەشە تۇندە زايسان اۋداندىق ىشكى ساياسات، مادەنيەت جانە تىلدەردى دامىتۋ ءبولىمىنىڭ باسشىسى نۇرلىبەك قاليباەۆ: «حالىقپەن كەزدەستىك. تۇسىندىردىك. حالىق «توسەكتەردى الىپ كەتىڭدەر» دەپ تالاپ قويدى. كولىكتەردى اپارىپ، توسەكتەردى الىپ كەتتى. سارىتەرەكتە حالىق تارادى. ال اينابۇلاقتا حالىق قايتا جينالعاننان كەيىن باردىق. توسەكتەردىڭ ءبارىن تيەپ الىپ كەتتى. قازىر حالىق تاراپ جاتىر. حالىق «ەرتەڭ تاڭەرتەڭ ءتۇسىندىرۋ جۇمىستارىن جۇرگىڭىزدەر» دەپ تالاپ ەتىپ وتىر. ەرتەڭ بۇيىرسا، كەلەمىز» دەگەن-ءدى.

بۇگىن تاڭەرتەڭ جاعدايدىڭ ءمان-جايىن ءبىلۋ ءۇشىن زايسانعا وسكەمەننەن وبلىس اكىمى دانيال احمەتوۆ ارنايى كەلىپ، الاڭداعان جۇرتپەن كەزدەستى. «قازىرگى ۋاقىتتا قىتاي شەكاراسىنان بىردە-ءبىر كىسى وتكەن جوق. بىردەن ايتايىن، شەكارادان باسقا ەلدىڭ ازاماتتارى وتپەيدى. ەكىنشىدەن، ءبىز شەكارادان تەك قازاقستاندىقتاردى عانا وتكىزۋىمىز كەرەك. ويتكەنى، ولار ءبىزدىڭ ەلدىڭ ازاماتتارى. ولار 14 كۇن باقىلاۋدا بولۋى كەرەك» دەدى وبلىس اكىمى.

وسى جەردە وبلىس اكىمىنە اۋدان تۇرعىندارى تاراپىنان: «كەشە اۋدان اكىمىن ساعات 3-تەن باستاپ كۇتتىك. تۇنگى ساعات 11 جارىمدا كەلدى. جەرگىلىكتى بيلىك حالىقپەن ساناسپايدى»، «قىتايدان كەلەتىندەردى نەگە اۋداندىق اۋرۋحاناعا ەمەس، اۋىل اۋرۋحاناسىنا ورنالاستىرماق؟»، ء«بىز شەكارانىڭ جابىلۋىن تالاپ ەتەمىز» دەگەن پىكىرلەر ايتىلدى.

جەرگىلىكتى بەلسەندى ازاماتتار وبلىس اكىمىنە بۇگىن ساعات 12:00-دە اۋداندىق مادەنيەت ۇيىندە حالىققا جاعدايدى ءتۇسىندىرۋدى سۇرادى. ەگەر جيىن وتەتىن بولسا، بۇل تۋرالى اقپاراتتى الداعى ۋاقىتتا جاريالايمىز.

شىعىس قازاقستان وبلىسى

زايسان اۋدانى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز