پارلامەنت • 20 اقپان، 2020

د.نازارباەۆا كاسىبي-تەحنيكالىق ءبىلىم بەرۋ جۇيەسىنىڭ وكىلدەرىمەن كەزدەستى

46 رەتكورسەتىلدى

سەناتتا پارلامەنت جوعارعى پالاتاسىنىڭ توراعاسى داريعا نازارباەۆا پارلامەنتتىك تىڭداۋلارعا دايىندىق اياسىندا ءبىلىم جانە عىلىم مينيسترلىگىنىڭ باسشىلارىمەن جانە اگرارلىق كوللەدجدەردىڭ وكىلدەرىمەن كەزدەستى.

كەزدەسۋگە پارلامەنت سەناتىنىڭ دەپۋتاتتارى، ءبىلىم جانە عىلىم مينيسترلىگىنىڭ، «كاسىپقور» حولدينگىنىڭ وكىلدەرى جانە اگرارلىق كوللەدجدەردىڭ باسشىلارى قاتىستى.

شارادا اۋىل شارۋاشىلىعىنىڭ ماماندىقتارى مەن كاسىپ دارەجەلەرى بويىنشا ماماندار دايارلاۋ ماسەلەلەرى، سونداي-اق مامان دايارلاۋدا جاڭا جۇيەنىڭ قاجەتتىگى مەن ءبىلىم بەرۋ ۇدەرىسىنىڭ مازمۇنى تالقىلاندى.

اقتوبەگى جوعارى اۋىل شارۋاشىلىعى كوللەدجىنىڭ ديرەكتورى امانكەلدى ەسىركەپوۆ اۋىل شارۋاشىلىعى سالاسى ماماندارىن ازىرلەۋدە قۇزىرلى ورگانداردىڭ تاجىريبەدەن ءوتۋ ماسەلەسىنە سەلقوس قارايتىنىن العا تارتتى. «بىزگە تاجىريبە جاعى جەتىسپەيدى. ءبىزدىڭ كوللەدجدىڭ بازاسىندا ءتورت ت ۇلىك مالدىڭ ءبارى بار. ول ءۇشىن ءبىز مەملەكەت بيۋدجەتىنەن ەشتەڭە المايمىز. ستۋدەنتتەردىڭ تاجىريبەدەن ءوتۋىن ۇيىمداستىرۋ جاعىن قولداۋ كەرەك. سونداي-اق قازاقستاندا اۋىل شارۋاشىلىعى ماماندارىن دايىنداۋعا قاتىستى كىتاپ سوڭعى رەت 2010 جىلى شىققان. بىلىكتى ماماندار دايارلاۋ ءۇشىن سوڭعى شىققان سالالىق كىتاپتار قاجەت. ەكىنشى ماسەلە، ول پەداگوگتاردى قولداۋ ماسەلەسى تۇر»، - دەدى ا.ەسىركەپوۆ.

داريعا نازارباەۆا بۇل تاقىرىپقا قولداۋ بىلدىرە كەلىپ، كادرلاردى دايىنداۋ مەن مامانداردىڭ جەتىسپەۋشىلىگىنە بيزنەس سالاسى دا ءجيى شاعىمداناتىنىن اتاپ ءوتتى.

«كوللەدجدەن كەيىن جۇمىسقا الاتىن مامانداردىڭ دايىندىق دەڭگەيى تومەن، تاجىريبەلىك داعدىلارى جوق. بيۋدجەتتەن قارجى بولىنەدى، ەسەپتەردە ءبارى دۇرىس. ال ءىس جۇزىندە ماماندار تاپشى»، - دەپ اتاپ ءوتتى ول.

سەنات توراعاسى تاقىرىپتى جالعاستىرا كەلىپ، كوپ ماسەلە جەرگىلىكتى اتقارۋشى ورگانداردىڭ ۇستانىمىنا بايلانىستى ەكەنىن اتاپ ءوتتى. «ەگەر اكىم قولداۋ بىلدىرسە، مۇددەلى بولسا، وندا كوللەدج جاقسى ءومىر سۇرەدى. كوپ نارسە ادامداردىڭ وزىنە جانە قانداي دا ءبىر اۋىل شارۋاشىلىعى ماماندارىنا دەگەن قاجەتتىلىك ءدال قانشا ەكەنىنە جانە قاي مەكەمەگە كەرەك بولۋىنا بايلانىستى. ارينە، ءبىرىنشى كەزەكتە كاسىپكەرلەردەن كەلىپ جاتقان وتىنىمدەردەن باس تارتۋ كەرەك. ەكىنشىدەن – ءار وڭىردە اۋماقتىق دامۋدىڭ كەلەشەك جوسپارى بار. بۇل ءوز ءوڭىرىڭىزدىڭ بولاشاعىنا بولجاۋ جاسايتىن نۇسقاۋلىق قۇجات. بۇل تۇرعىدا ەكونوميكادا نە بولىپ جاتقانىن، دامۋ باعىتى قانداي ءارى بۇگىنگى كۇنى اۋىل شارۋاشىلىعىندا نە ماڭىزدى ەكەنىن، قانداي جاڭا كاسىپورىندار اشۋ جوسپارلانىپ وتىرعانىن، وندا قانداي شتات اشىلاتىنىن كورۋىڭىز كەرەك»، - دەدى د.نازارباەۆا.

كاسىپتىك-تەحنيكالىق ءبىلىم بەرۋ جۇيەسىنىڭ وكىلدەرى ءوز كەزەگىندە ءبىلىم بەرۋ ۇدەرىسىن ۇيىمداستىرۋدا كەزدەسەتىن قيىندىقتار تۋرالى ايتتى. اتاپ ايتقاندا، كوللەدجدەردىڭ قازىرگى زامانعى قۇرال-جابدىقتارمەن ناشار جابدىقتالاتىنى جانە سالالىق وقۋلىقتاردىڭ جوقتىعى نەگىزگى ماسەلە رەتىندە اتاپ ءوتىلدى. كەزدەسۋگە قاتىسۋشىلاردىڭ ايتۋىنشا، كوللەدج باسشىلارى ءوز قاراجاتىنا ءجيى مال ساتىپ الادى جانە ونى ستۋدەنتتەردىڭ مال شارۋاشىلىعىندا تاجىريبە الۋى ءۇشىن ۇستاپ وتىرادى. «ول ءۇشىن مەن 12 سيىر ۇستايمىن»، - دەدى ديرەكتورلاردىڭ ءبىرى.

كەزدەسۋدە ەلىمىزدەگى كوللەدجدەر سانىنىڭ كوپتىگى تۋرالى دا ايتىلدى. ستاتيستيكا بويىنشا، ولاردىڭ سانى 801، ايتسە دە تەك 17-ءسى عانا اگروونەركاسىپ كەشەنى ماماندارىن دايارلايدى. سەنات باسشىسى ءبىلىم جانە عىلىم مينيسترلىگىنىڭ وكىلدەرىنە: «ولاردى قىسقارتقان ءجون. ايماقتاعى سالالىق ماماندانۋعا بايلانىستى عانا قالدىرۋ كەرەك. ەگەر ايماق ەكونوميكاسى نەگىزىنەن اگرارلىق سالا ءارى وبلىس اۋىل شارۋاشىلىعىنا ماماندانعان بولسا، وندا مەملەكەتتىك كوللەدجدەر سانىن دا سوعان ىڭعايلاۋ قاجەت. ەگەر كوللەدجدەر كوپ بولسا ولاردىڭ سانىن قىسقارتۋ،  اقشانى قالعان كوللەدجدەرگە قايتا ءبولۋ جانە ماتەريالدىق-تەحنيكالىق جاراقتاندىرۋدىڭ بىرىڭعاي جوبالارىن قالىپتاستىرۋ جانە الداعى ءبىر-ەكى جىلدا ولاردى وقۋعا قاجەتتى بارلىق قۇرالدارمەن قامتاماسىز ەتىلۋىنە قول جەتكىزۋ قاجەت»، - دەدى.

كەزدەسۋ بارىسىندا اۋىل شارۋاشىلىعى سالاسىنداعى ءبىلىم ساپاسىن جاقسارتۋ ماقساتىندا «اتامەكەن» وڭىرلىك كاسىپكەرلەر پالاتالارى جانىنان بيزنەستىڭ، مەملەكەتتىك ورگاندار مەن كاسىپتىك-تەحنيكالىق وقۋ ورىندارىنىڭ ءوزارا ءىس-قيمىلىن ۇيلەستىرۋ جونىندەگى كوميسسيا قۇرۋ ۇسىنىلدى.

پارلامەنت سەناتىنىڭ توراعاسى كەزدەسۋدى قورىتىندىلاي كەلىپ، اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنە جۇزدەسۋگە قاتىسۋشىلار قوزعاعان پروبلەمالىق ماسەلەلەردى زەردەلەۋدى جانە ولاردى پارلامەنتتىك تىڭداۋلاردا تالقىلاۋعا دايىنداۋدى تاپسىردى.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار