قاتارىنان ەكى جىل قۋاڭشىلىق بولعان قوستانايدا جاڭبىر جاۋعاندا جۇرت قاتتى قۋانعان بولاتىن. بىراق شىلدەنىڭ اياعىن الا جانە تامىزدا تولاستاماعان جاۋىن ەگىنىنىڭ بەتىنە قاراپ وتىرعان ديقاندى ويلاندىرا باستادى. سونىمەن قاتار, شارۋانىڭ جەمشوپ دايىنداۋىنا دا قولايسىز ءتيدى.
قاتارىنان ەكى جىل قۋاڭشىلىق بولعان قوستانايدا جاڭبىر جاۋعاندا جۇرت قاتتى قۋانعان بولاتىن. بىراق شىلدەنىڭ اياعىن الا جانە تامىزدا تولاستاماعان جاۋىن ەگىنىنىڭ بەتىنە قاراپ وتىرعان ديقاندى ويلاندىرا باستادى. سونىمەن قاتار, شارۋانىڭ جەمشوپ دايىنداۋىنا دا قولايسىز ءتيدى.
سوڭعى تاۋلىكتەردە تىم تولاسسىز قۇيعان جاڭبىردان ەلدى مەكەندەردى سۋ الا باستادى. وبلىستا, اسىرەسە, اپتا اياعىندا بولعان سۋ تاسقىنىنان رەسەيمەن شەكاراعا جاقىن وزەندەر بويىندا ورنالاسقان تاران, قارابالىق جانە فەدوروۆ اۋداندارىنداعى ەلدى مەكەندەر زارداپ شەكتى. قارابالىق اۋدانىنداعى تومەنگى توعىزاق وزەنى ارناسىنان اسىپ, سونىڭ سالدارىنان پريرەچنوە, نادەجدينكا, ميحايلوۆكا سەلولارى مەن توعىزاق ستانساسىندا بارلىعى وتىزدىڭ سىرتىندا ءۇي سۋدىڭ استىندا قالدى. ولاردىڭ تۇرعىندارى قاۋىپسىز جەرگە كوشىرىلدى. تاران اۋدانىندا دا توتەنشە جاعداي قالىپتاستى. اۋدان اكىمى ب.وتەۋليننىڭ شەشىمىمەن سۋ باسادى-اۋ دەگەن 96 ءۇي كوشىرىلىپ, 240 ادام قاۋىپسىز جەرگە شىعارىلدى. تاران اۋدانىندا عانا سۋ تاسقىنىنا قارسى 58 تەحنيكا جانە 220 ادام جۇمىس ىستەدى. دەمالىس كۇندەرگى ارپالىستا وبلىس اكىمى نۇرالى ءسادۋاقاسوۆتان باستاپ, ءتيىستى ورىندار مەن ۆەدومستۆولار باسشىلارى توتەنشە جاعداي قالىپتاسقان اۋدانداردا بولدى. توتەنشە جاعدايلار مينيسترلىگىنەن دە وبلىس اۋداندارىنداعى قالىپتاسقان جاعدايعا كوڭىل ءبولىنىپ, تىكۇشاق جانە باسقا دا تەحنيكالىق كومەك پەن ادام كۇشى جىبەرىلدى. فەدوروۆ اۋدانىنداعى زاپاسنوە سەلوسىندا ەكى پاتەرلى ءبىر ءۇي سۋدا قالىپ, ولاردىڭ تۇرعىندارى كوشىرىلدى.
– توتەنشە جاعدايدىڭ تۋىنا بايلانىستى وبلىستا جەدەل شتاب قۇرىلدى. سۋ شايعان وڭىرلەردەگى تۇرعىنداردىڭ ماتەريالدىق قۇندىلىقتارىن جانە مالىن ساقتاۋ ءۇشىن قولدان كەلگەننىڭ بارلىعى جاسالدى. ادامداردى ساقتاۋ ءۇشىن اۋدانداردا بارلىق قىزمەت بويىنشا كەزەكشىلىك ۇيىمداستىرىلدى, – دەيدى وبلىس اكىمىنىڭ ورىنباسارى بازىل جاقىپوۆ.
وبلىس وڭىرىندەگى وزەندەر سۋىنىڭ كوتەرىلۋى رەسەي جەرىندە جاڭبىردىڭ تىم تولاسسىز جاۋعانىنا بايلانىستى بولىپ وتىر. رەسەيدەن كەلەتىن سۋ نوپىرىنە توتەپ بەرە الماي, چەليابى وبلىسىنداعى قارتالى-ايەت وزەنىندەگى توعان جانە ايەت وزەنىندەگى دامبى جىرىلىپ كەتكەن. وسىنىڭ سالدارىنان توبىل مەن ايەت وزەندەرىنىڭ ارناسى تولىپ, لىقسىپ كەتتى. مامانداردىڭ ايتۋىنشا, تاران اۋدانىنداعى ۆارۆارينكا سەلوسى ماڭىندا سۋدىڭ دەڭگەيى 380 سانتيمەترگە, قارابالىق اۋدانىندا 26 سانتيمەترگە دەيىن كوتەرىلگەن.
چەليابى وبلىسى گيدرومەتورتالىعىنىڭ مالىمەتىنشە, رەسەيدىڭ قوستانايمەن شەكارالاس ايماعىندا ايىنا تۇسەتىن ىلعالدىڭ نورماسى 42 ميلليمەتر بولۋى ءتيىس. ال سوڭعى ءۇش تاۋلىكتە 155 ميلليمەتر ىلعال تۇسكەن. رەسەي جاعىندا دا, قوستاناي وبلىسىندا دا تامىزدىڭ 9-ى كۇنى كۇرت كوتەرىلگەن وزەندەر سۋىنىڭ بەتى قايتتى.
ءنازيرا جارىمبەتوۆا,
«ەگەمەن قازاقستان».
قوستاناي.
