ايماقتار • 18 اقپان، 2020

يرجي پاچينەكتىڭ شىنى باعى

14 رەتكورسەتىلدى

ءدال وسىلاي اتالعان ايرىقشا كورمە چەحيادان الماتىعا كەلدى. كوزدىڭ جاۋىن الاتىن سان الۋان كادەسىيلار كادىمگى شىنىدان جاسالدى دەگەنگە سەنۋ قيىن. ءتۇرلى فورمادا قالىپتالىپ، اينەكپەن اشەكەيلەنگەن اسەم تۋىندىلاردىڭ تاساسىندا شىنى شەبەرىنىڭ تولاعاي ەڭبەگى جاتىر.

ءا.قاستەەۆ اتىنداعى ونەر مۇراجايىندا ءوزىنىڭ وتىز تۋىندىسىنىڭ تاريحىن جىپكە تىزگەن يرجي پاچينەك كاسىبي بىلىگىمەن ءبولىستى. ەسىمى حالىقارالىق دەڭگەيدەگى زاماناۋي كوركەمدىك شىنى ءوندىرىسىنىڭ كوشباسشىسى رەتىندە اتالاتىن اۆتوردىڭ تسۆيكوۆ، لينداۆ، كۋنراتيتسە قالالارىندا شىنى زاۋىتتارى بار. ول ءوز قولتاڭباسىندا ىستىق اشەكەيلەرمەن ۇيلەسەتىن مەتالل ىسقىرىعى ارقىلى اينەكتى ۇرلەۋدىڭ ءداستۇرلى چەح ءادىسىن قولدانادى.

– پاچينەكتىڭ الماتىعا اكەلگەن كورمەسى فلورا مەن فاۋنانىڭ ەكزوتيكالىق مەكەندەۋشىلەرى بەينەلەنگەن اۆتورلىق تۋىندىلاردان تۇرادى. شىنى شەبەرى جەكە شىعارماشىلىق الەمىن جاساي وتىرىپ، وندا سۇلۋلىق پەن ۇيلەسىمدىلىكتى جاريالاۋ ارقىلى شىنايى ءارى ويدان شىعارىلعان مەكەندەۋشىلەردى بەدەرلەگەن. مۇندا – ساۆاننانىڭ تاكاپپار مەكەندەۋشىلەرى – زەبرا، بەگەموت، بۇقا قىزىقتى قيال گۇلدەرىمەن تابيعي تۇردە تولىقتىرىلعان.  ولاردىڭ ۇستىنەن جارقىراپ كورىنگەن اشىق ءتۇستى كوبەلەك،  اعاش دىڭىنە ورمەلەگەن كەسىرتكە، كوككە قاناتىن كەرگەن ايبىندى قىران، اسەم قوقيقاز، سۇلۋ توتىقۇس ونەر يەسىنىڭ قيالىنداعى تاڭعاجايىپ باقتىڭ كوركىن اشىپ تۇرعانداي. ولاردىڭ اراسىنداعى جالعىز ءمۇيىز بەينەسى شىنايى ارماننىڭ كورىنىسى رەتىندە پايدا بولادى، – دەيدى كورمە جەتەكشىسى ەكاتەرينا رەزنيكوۆا.

ءداستۇرلى چەح شىنى مەكتەبىنىڭ ايبىنىن تانىتاتىن ونەر جارمەڭكەسىن نۇر-سۇلتانداعى چەحيا رەسپۋبليكاسىنىڭ ەلشىلىگى مەن ءا. قاستەەۆ اتىنداعى مەملەكەتتىك ونەر مۋزەيى بىرلەسە ۇيىمداستىرىپ وتىر. تۋىندىگەردىڭ كوركەم شىنىدان جاساعان بۇيىمدارى حالىقارالىق دەڭگەيدەگى ءىرى قوناقۇيلەردە ءوزىنىڭ لايىقتى ورنىن العان. شىنى زاۋىتىندا ءار ەلدەن كەلگەن جاس شىنى جاساۋشىلاردى وسى ونەرگە ۇيرەتەتىن 12 شەبەر جۇمىس ىستەيدى، ولاردىڭ اراسىندا قازاقستاندىق ستۋدەنتتەر دە بار.

ەستە بولسا، «شىنى باعى» كورمەسىنىڭ ءبىرىنشى ءبولىمى وتكەن جىلدىڭ قازانىندا ەلوردادا شىمىلدىعىن تۇرگەن بولاتىن. شارانىڭ اشىلۋ راسىمىنە قاتىسقان چەحيا رەسپۋبليكاسىنىڭ ەلشىسى رۋدولف گيكل اتاپ وتكەندەي: «كورمە – قازاقستانداعى چەحيا ەلشىلىگىنىڭ العاشقى ءىرى مادەني جوباسى، ونىڭ ماقساتى چەحيا رەسپۋبليكاسىنان قۇندى دا ادەمى ونەر تۋىندىلارىن ۇسىنۋ ءارى قازاقستاندىقتارعا بۇرىننان تانىس چەح شىنى شەبەرلىگىن تەرەڭنەن ۇعىنۋعا مۇمكىندىك جاساۋ».

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار