رۋحانيات • 17 اقپان، 2020

75 كۇيمەن رەكورد جاڭارتتى

233 رەتكورسەتىلدى

ەلوردا تورىندە نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ «قورقىت» ءداستۇرلى ساز توبى 75 شىعارما ورىنداپ، كۇمبىر كۇيدەن شاشۋ شاشتى. قازاقستاننىڭ گيننەسس رەكوردتار كىتابىنا ەنۋدى ماقسات تۇتقان ونەر ۇجىمى قازاق جانە شەتەل اۆتورلارىنىڭ 75 مۋزىكالىق شىعارماسىن نوتاعا قاراماي، ەش بوگەلىسسىز، قۇلاق قۇرىشىن قاندىرا ورىنداپ شىقتى.

«قورقىت» ءداستۇرلى ساز توبىنىڭ كوركەمدىك جەتەكشىسى شولپان قورعانبەك ساز توبىنىڭ ءاۋ باستا 50 شىعارما ورىنداماقشى بولعانىن ايتا كەلە: «بىراق 50 كۇيدى كەز كەلگەن انسامبل ساحناعا الىپ شىعا الادى. رەكورد جاڭارتايىق دەپ وسىنداي قادامعا باردىق. ءارى 75 دەگەن ساننىڭ ءوزى سيمۆوليكالىق مانگە يە. التىن وردا حاندىعىنىڭ 750 جىلدىعى اياسىندا وسى سانعا توقتادىق»، دەپ ءوز ويىن ءبىلدىردى.

اتالعان كۇي كەشىندە ونەرپازدار دومبىرا، سىرناي، قوبىز، قىلقوبىز، نارقوبىز، ت.ب. قازاقتىڭ ۇلتتىق اسپاپتارىندا وينادى. التىن وردانىڭ 750 جىلدىق مەرەيتويى قارساڭىندا وتكىزىلگەن مادەني شارادا كۇيشىلەر قازاقستاندا العاش رەت non-stop رەجىمىندە مۋزىكالىق شىعارمالاردى ءبىر دەممەن جاتقا ورىنداپ شىقتى. ونەرسۇيەر كورەرمەنگە قورقىت، سۇگىر، قازانعاپ، قۇرمانعازى، نۇرعيسا تىلەنديەۆ، ءابدىمومىن جەلدىباەۆ سىندى ءتۇرلى قازاق جانە شەتەل اۆتورلارىنىڭ 75 شىعارماسى ۇسىنىلىپ، استانا اسپانىن قۇيقىلجىتار كۇيگە بولەدى.

75-ءشى كۇي – باۋىرجان اقتاەۆتىڭ «عاسىرلار ءۇنى» ورىندالىپ بولعان سوڭ «قورقىت» ءداستۇرلى ساز توبىنا قازاقستاننىڭ گيننەس رەكوردتار كىتابىنىڭ رەسمي وكىلى قۋاندىق قۇدايبەرگەنوۆ ارنايى سەرتيفيكات تابىستادى.

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار