وقىرمان نازارىنا ۇسىنىلعان تاريحي ماڭىزى زور جۋرنالدار مەن كىتاپ مازمۇنى تاۋەلسىز قازاقستاننىڭ قالىپتاسۋىمەن قاتار كەلگەن ەلباسىنىڭ ساياسي ءومىرى مەن رولىنە ارنالعان. ەلباسى كىتاپحاناسىنىڭ ديرەكتورى, پروفەسسور ءامىرحان راحىمجانوۆتىڭ مودەراتورلىعىمەن وتكەن شاراعا تۇڭعىش پرەزيدەنت – ەلباسى ن.ءا.نازارباەۆتىڭ زامانداستارى مەن دەپۋتاتتار, كىتاپحاناشىلار مەن ەلوردا جاستارى قاتىستى.
– تاريحي مازمۇندىق تۇرعىدان قۇندى بولىپ تابىلاتىن بۇل كىتاپتاردىڭ بارلىعى دا ءبىر ارناعا توعىسادى. بۇل كىتاپتار قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ مەملەكەتتىڭ قالىپتاسۋى مەن نىعايۋى, كوپۇلتتى قازاقستان حالقىنىڭ ىنتىماق-بىرلىگى, قوعامداعى تۇراقتىلىق پەن ەلدىڭ رۋحاني گۇلدەنۋى, دۇنيە ءجۇزىنىڭ الدىڭعى قاتارلى دەرجاۆالارىمەن ارىپتەستىك پەن ىنتىماقتاستىق ورناتۋ جانە بەيبىت عالام جولىنداعى كوپقىرلى ساياسي قىزمەتىنىڭ اسا باي تاجىريبەسىن كورسەتۋگە ارنالعان. بۇل باسىلىمدار تۇڭعىش پرەزيدەنتتىڭ سەرىكتەسى, ەلباسى كەڭسەسىنىڭ باسشىسى, ساياسي عىلىمدار دوكتورى, پروفەسسور ماحمۇت بازارقۇل ۇلى قاسىمبەكوۆتىڭ يدەياسىمەن جانە جەتەكشىلىگىمەن «قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆ: مەملەكەتتىك باسقارۋ ستراتەگياسى جانە كوشباسشى فەنومەنى» عىلىمي باعدارلاماسى اياسىندا دايىندالدى, – دەپ اتاپ ءوتتى ءامىرحان مۇراتبەك ۇلى.
ءسوز كەزەگىن العان پارلامەنت ءماجىلىسىنىڭ دەپۋتاتى قۋانىش سۇلتانوۆ «نۇرسۇلتان نازارباەۆ: كوشباسشىلىق ستراتەگياسى» اتتى ەكى بولىمنەن تۇراتىن كىتاپ تۋرالى ءوز ويىن ورتاعا سالدى. «جاستاردىڭ الدىڭعى ۇرپاقتىڭ كورگەن قيىندىعىن باسىنان وتكىزۋى مىندەتتى ەمەس. كەڭەس وداعى قۇرامىندا ماسكەۋگە باعىنىشتى بولعان كەزەڭدى ەندىگى ۇرپاق كورمەسىن. جاستار تەك بوستاندىقتا ءومىر ءسۇرسىن. جاستارىمىزدىڭ مەملەكەتشىل بولىپ ءوسۋى, ەلىمىزدى قورعاۋ مەن ساقتاۋدىڭ, ۇلتتىق قاۋىپسىزدىكتىڭ ماعىناسىن ءتۇسىنۋى – مەملەكەتتىڭ تۇلعاسىنا بايلانىستى. بۇگىن وقىرماندارىنا جول تارتقالى وتىرعان كىتاپتارداعى دەرەكتەر تاۋەلسىزدىكتىڭ قاسيەتتىلىگىن كورسەتىپ, ونىڭ باعاسى مەن قادىرىن بىلدىرەدى. بۇل جيناقتارعا ەنگەن بارلىق شىعارمادا ەلباسىنىڭ ەستەلىكتەرى مەن سوزدەرى مەملەكەتشىلدىك قاسيەتتى جوعارى كوتەرەدى. سوندىقتان بۇگىن ءبىزدىڭ رۋحاني ومىرىمىزدە ۇلكەن جاڭالىق بولدى دەپ ەسەپتەيمىن. وسىنداي شىعارمالاردى كەڭىنەن ناسيحاتتاۋ – بارشامىزدىڭ مىندەتىمىز», دەدى ءماجىلىس دەپۋتاتى.
تۇساۋى كەسىلگەن جيناقتاردىڭ ءبىرى – «ن.ءا.نازارباەۆتىڭ ەۋرازيالىق باستامالارى: تاريحى, قازىرگى جاعدايى جانە بولاشاعى» – ەۋرازيالىق ينتەگراتسيا يدەياسىنىڭ 25 جىلدىعىنا جانە ەۋرازيالىق ەكونوميكالىق وداق تۋرالى شارتقا قول قويىلۋىنىڭ 5 جىلدىعىنا ارنالعان. ماسكەۋ مەملەكەتتىك ۋنيۆەرسيتەتىنىڭ قازاقستاندىق فيليالىنىڭ ديرەكتورى, ەكونوميكا عىلىمدارىنىڭ دوكتورى الەكساندر سيدوروۆيچ ەۋرازيالىق وداق شەڭبەرىندە بارلىق ەلدەردىڭ بەكىتىلگەن مىندەتتەمەسىنىڭ قۇندىلىعى كەلىسىلگەن ساياساتتا ەكەنىن ايتتى.
«ەۋرازيالىق قاعيداتتاردى جاريالاۋ, بۇل – تاۋەلسىز مەملەكەت قازاقستاننىڭ جاڭا الەمگە ەنۋ كونتسەپتسياسى. ن.ءا.نازارباەۆ كونفرونتاتسيا ەمەس, ءوزارا تۇسىنىستىكتىڭ جانە ءوز ەلىنىڭ ۇلتتىق قۇندىلىقتارىنا دەگەن قۇرمەتى مەن سىيلاستىقتىڭ جاڭا قاعيدالارى نەگىزىندە اشىقتىق جولىن تاڭدادى. ن.ءا.نازارباەۆتىڭ اسا كورنەكتى اقىلىمەن قۇرىلعان ەۋرازيالىق يدەيا ماعىناسى مەن مۇمكىندىگى جاعىنان وسىنداي تاسىلمەن ۇندەسەدى», دەپ اتاپ ءوتتى ا.سيدوروۆيچ.
ء«بىز بىلەتىن ەلباسى» – تاۋەلسىزدىكتىڭ العاشقى جىلدارىندا ەگەمەن مەملەكەتتى دامىتۋدىڭ جاڭا جولى مەن ۇلگىسىن ىزدەگەن تۇستا تۇڭعىش پرەزيدەنتتىڭ جانىنان تابىلعان, قول جەتكىزگەن ءار جەتىستىگىنە بىرگە قۋانىپ, قولداۋ كورسەتكەن ەلباسىنىڭ زامانداستارىنىڭ ەستەلىكتەر جيناعى. 1960 جىلدارى تەمىرتاۋ قالاسىندا قىزمەت ەتكەن ەلباسىنىڭ ەڭبەك جولى تۋرالى ەستەلىكتەرىمەن قازاقستاننىڭ العاشقى سىرتقى ىستەر ءمينيسترى, اكادەميك تولەۋتاي سۇلەيمەنوۆ وي ءبولىستى:
«بۇكىلوداقتىق «پراۆدا» گازەتىندە ەڭبەك جولىن مەتاللۋرگيالىق كومبيناتتا گورنوۆويدان باستاعان, پارتكوم حاتشىسى بولعان نۇرسۇلتان نازارباەۆتىڭ سىناپ ايتىلعان وتتى ماقالاسى جارىق كوردى. ول گازەت بەتىنەن كومبيناتتىڭ قىزمەتى, مەتاللۋرگتەردىڭ, تەمىرتاۋ قالاسى تۇرعىندارىنىڭ قاجەتتىلىكتەر تۋرالى ايتتى. كەڭەس كەزەڭىندە بۇلاي جاساۋ وتە قيىن ەدى, وسىنداي قادام جاساۋ ءۇشىن اسا باتىل بولۋ كەرەك ەدى».
سونىمەن قاتار جاڭا باسىلىمدار قاتارىندا «يادرولىق قارۋسىز الەمگە بەتبۇرىس: ەلباسى باستامالارى» – قازاقستاننىڭ تۇڭعىش پرەزيدەنتىنىڭ بىتىمگەرلىك باستامالارىنا جانە ونىڭ بارشا ادامزاتتىڭ مۇددەسى ءۇشىن يادرولىق قارۋدان ازات الەمدى قۇرۋ جونىندەگى ساياساتىنا ارنالعان جيناق جانە «ماڭگىلىك ەل» يدەياسى: كەشە, بۇگىن, ەرتەڭ» اتتى ۇجىمدىق مونوگرافيا بار.
