ساياسات • 06 اقپان، 2020

سەنات ترامپتى اقتاپ شىقتى

80 رەتكورسەتىلدى

اقش پرەزيدەنتى دونالد ترامپ يمپيچمەنت كەزىندە اقتالىپ شىقتى.

ترامپتىڭ ارىپتەستەرى رەسپۋبليكالىق پارتيا وكىلدەرى توراعالىق ەتەتىن سەناتتا اقش پرەزيدەنتى تاعىلعان ەكى ايىپ بويىنشا دا اقتالىپ شىقتى.

ەسكە سالساق، دونالد ترامپتىڭ يمپيچمەنتىنە ەكى سەبەپ بولعان. ءبىرىنشىسى، ول وكىلەتتىگىن اسىرا قولدانىپ، ۋكراينا بيلىگىنە قارسىلاسى دەموكرات دجو بايدەنگە قاتىستى ءىس قوزعاۋ تۋرالى ۇسىنىس جاساعان. ونىڭ ايتۋىنشا، قارسىلاسى اقش-تىڭ ۆيتسە پرەزيدەنتى بولعان تۇستا جانە امەريكا-ۋكراينا قارىم-قاتىناسىنا جاۋاپتى كەزىندە ونىڭ ۇلى تۇسىنىكسىز سەبەپتەرمەن ۋكرايندىق گاز كومپانياسىنىڭ ديرەكتورلار كەڭەسىندە جوعارى لاۋازىمدى قىزمەت اتقارعان. وسىلايشا دەموكراتتار ترامپ مىرزانى ءوز وكىلەتتىگىن اسىرا قولدانا وتىرىپ، ۋكراينا پرەزيدەنتىنە قىسىم كورسەتكەن دەپ ايىپتادى.

سونداي-اق، اق ءۇي وكىلدەر پالاتاسىنىڭ يمپيچمەنت بويىنشا تەرگەۋشىلەرى ىزدەگەن ايعاقتار مەن قۇجاتتاردى بۇعاتتاعاننان كەيىن، ترامپ مىرزا كونگرەس جۇمىسىنا كەدەرگى كەلتىردى دەپ ايىپتالعان ەدى.

سەنات وتىرىسىندا دەموكراتتار ماقساتىنا جەتە المادى، سەبەبى ءبىرىنشى ايىپ بويىنشا 48 سەناتور قولداۋ بىلدىرسە، 52-ءسى قارسى بولدى. ەكىنشى ايىپ بويىنشا دا قارسى بولعاندار 6 داۋىسپەن جەڭىپ كەتتى. پرەزيدەنتتى قىزمەتىنەن بوساتۋ ءۇشىن سەناتورلاردىڭ ۇشتەن ەكىسىنىڭ قولداۋى قاجەت.

ترامپ – اقش تاريحىندا يمپيچمەنت جاريالانعان ءۇشىنشى پرەزيدەنت. جالپى، اقش كونستيتۋتسياسىنا سايكەس، كونگرەسس پرەزيدەنتتى كەيبىر زاڭ بۇزۋشىلىق ارەكەتتەرى ءۇشىن ورنىنان الىپ تاستاي الادى.

دەموكراتتار بۇل اقتالۋدان كەيىن دونالد ترامپتىڭ ارەكەتى بۇرىنعىدان دا باتىلىراق بولاتىنىن ايتىپ، الاڭداۋلى ەكەندەرىن جەتكىزدى.    

 

 

 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار