الماتىعا «قاقپاقشالى جانە قاقپاقشالى ەمەس جۇرەكشە فيبريللياتسياسىن دياگنوستيكالاۋ مەن ەمدەۋدىڭ زاماناۋي ادىستەرى» تاقىرىبىنداعى شەبەرلىك دارىسىنە قاتىسۋ ءۇشىن قازاقستاننىڭ بارلىق وڭىرىنەن كارديولوگ دارىگەرلەر كەلدى.
«قازاقستان مەن ورتالىق ازيا اۋماعىندا جۇرەكشە فيبريللياتسياسىن كريوتەحنولوگيا كومەگىمەن ەمدەۋ جانە سول جاق قۇلاقشاسىن توراكوسكوپيالىق كليپتەۋ تۇڭعىش رەت قولدانىلىپ وتىر. وسى ادىسپەن ەمدەۋ ناۋقاستاردا كەزدەسەتىن كارديوگەندىك يشەميالى ءينسۋلتتىڭ جيىلىگىن جانە گەمورراگيالى اسقىنۋلاردى ازايتادى. بۇگىن وسىندا قازاقستاننىڭ بارلىق وڭىرىندە ينتەرۆەنتسيالىق كارديولوگتەر مەن اريتمولوگتەر, كارديوحيرۋرگتەر قاتىسىپ وتىر. ءبىزدىڭ ينستيتۋتتا بۇل ءادىس اپروباتسيادان وتكىزىلگەننەن كەيىن, ەلىمىزدىڭ بارلىق وڭىرلەرىندە تەحنولوگيالاردى تاراتۋ ارقىلى وسى ءادىستىڭ قولدانىلۋىنا مۇمكىندىك بەرەدى», دەيدى جاساندى قاناينالىم زەرتحاناسى مەن وپەراتسيا بلوگىنىڭ كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ.
قازاقستاندا العاش رەت گەرمانيانىڭ گامبۋرگ قالاسىنان كەلگەن جەتەكشى كارديوحيرۋرگ, پروفەسسور Tورستەن حانكە كريوبلاتسيا (ەكسترەمالدىق سۋىقتىڭ اسەرىنە نەگىزدەلگەن جۇرەك اريتمياسىن ەمدەۋ) جاساي وتىرىپ, ميترالدىق قاقپاقشاعا حيرۋرگيالىق تۇزەتۋ وپەراتسياسىن جۇرگىزدى.
پروفەسسور Tورستەن حانكەنىڭ ايتۋىنشا, جۇرەكشە فيبريللياتسياسىن ءساتتى ەمدەۋ پاتسيەنتتەردىڭ ءومىرىن جاقسارتىپ, عۇمىرىن ۇزارتىپ, ينسۋلت قاۋپىن ازايتۋعا مۇمكىندىك بەرەدى. سونىمەن قاتار دوكتور تورستەن حانكە مامانداردى وقىتۋدا حيرۋرگتىڭ العاشقى بەس وپەراتسياسى مىندەتتى تۇردە تاجىريبەلى ماماننىڭ جەتەكشىلىگىمەن جاسالۋى كەرەگىن اتاپ ءوتتى.
ينستيتۋتتىڭ كارديولوگيا كافەدراسىنىڭ پروفەسسورى كۇلزيدا قوشىمباەۆا جۇرەكشە فيبريللياتسياسىنا ابلياتسيا جاسالعاننان كەيىن پاتسيەنتتەردى وتاعا دەيىن جانە وتادان كەيىن ەمدەپ-قاراۋ تۋرالى, ال جۇرەك ىرعاعىنىڭ جانە وتكىزگىشتىگىنىڭ بۇزىلۋى بولىمشەسىنىڭ مەڭگەرۋشىسى روين رەكۆاۆا – جۇرەكشە فيبريللياتسياسىن كاتەتەر ارقىلى ەمدەۋدىڭ ادىستەرىن اتادى.
شەبەرلىك دارىسىندە دەرتى ناقتىلانعان ناۋقاستارعا وتا جاسالىپ, قاتىسۋشىلار كارديولوگيا جانە ىشكى اۋرۋلار عزي بولىمشە مەڭگەرۋشىلەرى رۇستەم تولەۋتاەۆ پەن روين رەكۆاۆانىڭ پروفەسسور Tورستەن حانكەمەن بىرلەسىپ جاساعان وپەراتسيالارىن كورىپ وتىردى. كەلەسى كۇنى رۇستەم تولەۋتاەۆ ەلىمىزدىڭ بارلىق وڭىرىنەن كەلگەن دارىگەرلەردى جۇرەكشە فيبريللياتسياسىن توراكوسكوپيالىق ەمدەۋدىڭ تاسىلدەرىمەن تانىستىردى. مۇنداي شەبەرلىك ءدارىسىن وتكىزۋ كارديوحيرۋرگياداعى وپەراتيۆتىك ارالاسۋلار تەحنيكاسىن مەڭگەرۋگە, مامانداردىڭ كاسىبي داعدىسىن جاڭا دەڭگەيگە كوتەرۋگە مۇمكىندىك بەرەدى.
ايتا كەتەلىك, پروفەسسور توستەن حانكە (Thorsten Hanke) الەمدىك تاجىريبەدە بەلگىلى كارديوحيرۋرگ, توراكالدى جانە جۇرەك-تامىر حيرۋرگياسى جونىندەگى نەمىس قوعامىنىڭ, ەۋروپالىق كارديوتوراكالدى حيرۋرگيا قاۋىمداستىعىنىڭ, نەمىس كارديولوگيا قوعامى اريتميا جۇمىس توبىنىڭ, سونداي-اق نەمىس كارديولوگتەر قوعامىنىڭ مۇشەسى. ول مەديتسينا سالاسىندا جاساعان ەڭبەگى مەن عىلىمي جاڭالىقتارى ءۇشىن كوپتەگەن سالالىق سىيلىق پەن گرانتقا يە بولعان.
الماتى
