بىراق جول ەرەجەسىن ساقتاۋعا قاتىستى جۇرگىزگەن زەرتتەۋلەر, ەرلەرگە قاراعاندا ايەلدەردىڭ ەرەجەنى ءجيى بۇزاتىنىن انىقتاعان. اسىرەسە, قالا ىشىندەگى جولداردا ەرەجەگە باعىنبايتىن بويجەتكەندەر كوپ كەزدەسەدى ەكەن. بۇرىلۋعا بولمايتىن تۇستاردى كورىنەۋ قيىپ ءوتۋ, كولىكتەگى ەسكەرتۋ گاباريتتەرىن ىسكە قوسپاۋ, جارىق قۇرالى مەن ەسكەرتۋ بەلگىلەرىن اجىراتپاۋ سياقتى جۇرگىزۋشىلەر جىبەرمەۋى ءتيىس قاتەلىكتەردى ايتپاعاندا, نازىك جاندىلاردىڭ كەسىرىنەن بولعان اپاتتى جاعدايلار كوبەيگەن. بۇل تۋرالى بىزگە تالدىقورعان قالاسى پوليتسيا باسقارماسىنىڭ اعا تەرگەۋشىسى ديدار سەيىتجان ايتقان ەدى.
پوليتسيا دەرەكتەرىن سارالاپ وتىرىپ, كولىك ايداعان قىز-كەلىنشەكتەردىڭ كەسىرىنەن بولعان جول-كولىك وقيعالارىنا قاتىستى بىرنەشە وقيعاعا كەزىكتىك. مىسالى, وبلىس پوليتسەيلەرى ماس كۇيىندە كولىك جۇرگىزگەن ايەلدى ۇستاپتى. وقيعا بالقاش اۋدانىنىڭ ورتالىعى باقاناس اۋىلىندا بولعان. پاترۋل پوليتسياسى كۇدىك تۋعىزعان «تويوتا كارينا» كولىگىن تەكسەرۋ ءۇشىن توقتاتقان ەكەن. قۇجات تەكسەرۋ كەزىندە تىزگىندەگى ايەل ادامنىڭ الكوگولدى ىشىمدىك ىشكەنى انىقتالدى. وتىز توعىز جاستاعى كەلىنشەكتىڭ ماس كۇيىندە كولىك رۋلىنە وتىرعانىن مەديتسينالىق ساراپتاما دا ايقىنداعان.
ايتپاقشى, «تويوتا كارينا» كولىگىنىڭ يەسى بۇعان دەيىن دە «قىزىپ الىپ» كولىك باسقارعانى ءۇشىن ايىپ تولەپ, سوتتىڭ شەشىمىمەن 3 جىلعا دەيىن اۆتوكولىك قۇرالدارىن باسقارۋ قۇقىنان ايىرىلعان ەكەن. ەندى اۋىل تۇرعىنىن اسا ۇلكەن كولەمدەگى ايىپپۇل مەن قوعامدىق جۇمىسقا جەگۋ نەمەسە 5 جىلعا دەيىنگى باس بوستاندىعىنان ايىرۋ جازاسى كۇتىپ تۇر.
تاعى ءبىر وكىنىشتى جاعداي وبلىس ورتالىعىندا بولعان. تالدىقورعان قالاسىنىڭ سوتى جىلعا جۋىق ۋاقىتقا سوزىلعان اتىشۋلى ىسكە قاتىستى شەشىم شىعارىپتى. قاندى وقيعا 2019 جىلدىڭ ناۋرىز ايىندا بولعان ەدى. 64 جاستاعى جۇرگىزۋشى ايەل Infiniti كولىگىنىڭ تىزگىنىنە يە بولا الماي, اۆتوماشينا جول بويىنداعى اۆتوبۋس ايالداماسىنا سوعىلعان. جوعارى جىلدامدىقپەن كەلگەن كولىك ايالدامادا تۇرعان 2 ادامدى تاپتاپ ءوتىپ, 14 جاستاعى قىزدى اۋىر جاراقاتتاعان. سوققى سالدارىنان جاس جۇبايلار وقيعا ورنىندا ءتىل تارتپاي كەتكەن.
جىلعا جۋىق جۇرگەن تەرگەۋ كەزىندە ادام ولىمىنە سەبەپكەر بولعان جۇرگىزۋشى ايەلگە قاتىستى بۇلتارتپاۋ شاراسى بىرنەشە رەت وزگەرتىلگەن. بۇل وقيعادان حاباردار بولعان قالا تۇرعىندارى نارازىلىق بىلدىرگەن. سوت شەشىمى جاريالانعالى بەرى دە ادامدار جۇرگىزۋشىگە كەسىلگەن جازانى تىم جەڭىل دەگەن پىكىردە. ال تالدىقورعان قالالىق سوتى كىنالى ايەلدىڭ جاس ەگدەلىگىن جانە ىستەگەن قىلمىسىن مويىنداپ, وكىنىش بىلدىرگەنىن ەسەپكە الىپ, 5 جىلعا شارتتى مەرزىمگە باس بوستاندىعىن شەكتەۋدى ۇيعارىپتى. ايتپاقشى, شارتتى جازالانعان ايەل 7 جىلعا دەيىن كولىك باسقارۋ قۇقىعىنان دا ايىرىلىپتى.
كولىك دەمەكشى, الماتى وبلىسىندا رەسەي, قىرعىزستان جانە ارمەنيا ەلىنىڭ ەسەبىندە تۇراتىن كولىك سانى كوپ. وكىنىشكە قاراي, بۇل كولىك يەلەرى دە جول ەرەجەسىن بەلدەن باسىپ, ايىپپۇل تولەۋدەن جالتارىپ كەلگەن ەكەن. جولداعى وقيعالارعا دا سەبەپشى بولعاندارى جوق ەمەس. وتكەن جىلى شەتەلدىك ءنومىرلى 37 كولىك اپاتقا ۇشىراپتى. وبلىس پوليتسەيلەرىنىڭ دەرەگىنشە, ايماق جولدارىندا بولعان وسى اپاتتاردىڭ كەسىرىنەن 80 جولاۋشى جارالانىپ, 18 ادام قايتىس بولعان.
الماتى وبلىسى
