ۇيىم باسشىسى تەدروس ادحان گەبرەيەسۋستىڭ ايتۋىنشا, بۇل شەشىمنىڭ باستى سەبەبى - ۆيرۋستىڭ قىتايدى جاۋلاۋى ەمەس, الەمنىڭ وزگە ەلدەرىندە دە تارالۋى.
سوڭعى مالىمەتتەرگە سايكەس, قىتايدا ۆيرۋستان 213 ادام قازا تاپقان, ال ىندەتتى جۇقتىرعاندار سانى 10 مىڭعا جەتكەن. دۇنيەجۇزىلىك دەنساۋلىق ساقتاۋ ۇيىمى جاڭا كوروناۆيرۋستى الەمنىڭ 18 ەلىندە 98 ادامنىڭ جۇقتىرعانىن ايتىپ وتىر. ولاردىڭ كوبىسى قىتايدىڭ ۆيرۋس باستالعان ۋحان قالاسىندا بولعانى بەلگىلى.
دەگەنمەن, گەرمانيا, جاپونيا, ۆەتنام جانە قۇراما شتاتتاردا كوروناۆيرۋستى ادامنان ادامعا جۇقتىرۋدىڭ سەگىز جاعدايى تىركەلگەن.
دۇنيەجۇزىلىك دەنساۋلىق ساقتاۋ ۇيىمىنىڭ باسشىسى قىتاي بيلىگى قابىلداعان توتەنشە شارالاردى جوعارى باعالاپ, قىتايعا ساۋدا نەمەسە ساپاردى شەكتەۋگە ەشقانداي سەبەپ جوق ەكەنىن مالىمدەدى.
الايدا بىرقاتار مەملەكەتتەر قىتايمەن شەكارانى جاۋىپ, وندا قاتىنايتىن ۇشاقتار مەن كولىكتەردى ۋاقىتشا توقتاتىپ قويدى. قازاقستان ۇكىمەتى دە قىتايعا ەلىمىزدەن اۆتوبۋس, پويىز نەمەسە ۇشاقتاردىڭ قاتىنامايتىنىن جاريالادى, سونداي-اق قىتاي ازاماتتارىنا ۋاقىتشا ۆيزا بەرىلمەيتىن بولدى.
وعان قوسا, Google, Ikea, Starbucks جانە Tesla سەكىلدى كومپانيالار قىتاي قالالارىندا ورنالاسقان دۇكەندەرىن جابۋ تۋرالى شەشىم شىعارعان.
دۇنيەجۇزىلىك دەنساۋلىق ساقتاۋ ۇيىمىن بۇل جاعدايدا تومەن جانە ورتاشا تابىس دەڭگەيى بار كوپتەگەن ەلدەردىڭ ۆيرۋستى انىقتاۋعا جانە ەمدەۋگە قاجەتتى قۇرالدارىنىڭ بولماۋى الاڭداتادى.
2014 جىلعى ادامزات تاريحىنداعى ەڭ ءىرى ىندەت - ەبولانىڭ باتىس افريكادا ءورشۋى كەدەي ەلدەردىڭ مۇنداي قاۋىپكە قارسى تۇرا المايتىنىن كورسەتكەن ەدى.
ۇيىم ۆيرۋسقا قارسى شارالاردى جالعاستىرا بەرەتىنىن مالىمدەدى جانە وزگە ەلدەردىڭ ۆيرۋستى انىقتاعان جاعدايدا بارلىق مالىمەتتى دۇنيەجۇزىلىك دەنساۋلىق ساقتاۋ ۇيىمىمەن بولىسۋگە مىندەتتى ەكەنىن ەسكەرتتى.
