القا ماجىلىسىنە قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپارباەۆ, پارلامەنت دەپۋتاتتارى, پرەزيدەنت اكىمشىلىگى جانە ۇكىمەت وكىلدەرى, قوعامدىق كەڭەس مۇشەلەرى قاتىستى.
جيىندا مادەنيەت جانە سپورت ءمينيسترى اقتوتى رايىمقۇلوۆا جانە ۆيتسە-مينيسترلەر نۇرعيسا داۋەشوۆ پەن ەلدوس رامازانوۆ, ءتىل ساياساتى كوميتەتىنىڭ توراعاسى عالىمجان مەلدەشوۆ مەملەكەت باسشىسى قاسىم-جومارت توقاەۆتىڭ «سىندارلى قوعامدىق ديالوگ–قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋى اياسىندا تۋريزم جانە ءتىل ساياساتىن دامىتۋ جانە ق.توقاەۆتىڭ «اباي جانە ءححى عاسىرداعى قازاقستان» ماقالاسى, ەلباسىنىڭ «رۋحاني جاڭعىرۋ» جانە « ۇلى دالانىڭ جەتى قىرى» باعدارلامالىق ماقالاسى اياسىندا مينيسترلىكتىڭ 2019 جىلى اتقارعان جۇمىستارى جانە الداعى جىلى اتقارىلاتىن جۇمىستار تۋرالى باياندادى.
سونىمەن قاتار 2020 جىلى ءال-ءفارابيدىڭ 1150, التىن وردانىڭ 750, اباي قۇنانباي ۇلىنىڭ 175 جىلدىق مەرەيتويى اياسىندا اتقارىلاتىن جۇمىستارمەن تانىستىردى. وسى رەتتە اقتوتى رايىمقۇلوۆا بيىل مەرەيتويى قارساڭىندا ىسىراپشىلدىق پەن ناۋقانشىلدىققا جول بەرىلمەيتىندىگىنە نازار اۋداردى.
«بيىلعى جىل مادەنيەت جانە ونەر سالاسى قىزمەتكەرلەرى ءۇشىن جاعىمدى جاڭالىقپەن باستالىپ وتىر. مەملەكەت باسشىسىنىڭ جولداۋىن ىسكە اسىرۋ شەڭبەرىندە 2020 جىلدىڭ 1 قاڭتارىنان باستاپ مادەنيەت جانە ونەر ۇيىمدارى قىزمەتكەرلەرىنىڭ جالاقىسى رەسپۋبليكالىق دەڭگەيدە 50%-عا دەيىن, وڭىرلەردە 35%-عا دەيىن ءوستى. جالپى, شامامەن 36,4 مىڭ ادامنىڭ, ونىڭ ىشىندە رەسپۋبليكالىق دەڭگەيدە 3 مىڭعا جۋىق, وڭىرلەردە 31 مىڭنان استام ادامنىڭ جالاقىسى ءوستى. سونداي-اق, «مادەنيەت تۋرالى» زاڭداعى سوڭعى وزگەرىسكە سايكەس ەندى بالەت بيشىلەرى 20 جىلدىق ەڭبەك وتىلىمەن جۇمىستان شىقسا, زەينەت جاسىنا دەيىن جالاقىسىنىڭ 60% كولەمىندە اي سايىن مەملەكەتتەن تولەماقى الىپ وتىرادى. بۇل قارجىنى سوڭعى جۇمىس ورنىنداعى 3 جىلدىق جالاقى مولشەرىنە قاراي ەسەپتەلەدى» دەدى مينيستر.
مادەنيەت جانە سپورت ۆيتسە-ءمينيسترى ەلدوس رامازانوۆ 2019 جىلدىڭ قورىتىندىسى بويىنشا سپورتپەن شۇعىلدانۋشىلار سانى ارتىپ 5,7 ميلليون ادامدى قۇراعانىن ايتتى.
«بۇل دەگەنىمىز قازاقستان حالقىنىڭ 30,6% سپورتپەن تۇراقتى شۇعىلدانادى دەگەن ءسوز. وتكەن جىلى ەلىمىزدە رەسپۋبليكالىق دەڭگەيدە 610 سپورتتىق باسەكە وتكىزىلسە, سپورتشىلارىمىز الەمدىك, حالىقارالىق دەڭگەيدەگى 877 سايىسقا قاتىستى. ونىڭ 58-ءى قازاقستاندا وتكەن. سونداي-اق 2019 جىلى پرەزيدەنتتىك ءنورماتيۆتى تاپسىرۋعا 4,3 ملن. ادام قاتىستى. ونىڭ 99,5 مىڭى پرەزيدەنتتىك دەڭگەيدەگى, 231,7 مىڭى ۇلتتىق, 482,2 مىڭى باستاپقى ءنورماتيۆتى ورىنداعان. 2019 جىلى 13 جەلتوقساندا مەملەكەتتىك دەڭگەيدە دوپينگكە قارسى شارالاردى كۇشەيتۋگە باعىتتالعان «دەنە شىنىقتىرۋ جانە سپورت ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى.
زاڭداعى وزگەرىستەر سپورتشىلارعا, جاتتىقتىرۋشىلارعا جانە باسشىلارعا قاتىستى ديسكۆاليفيكاتسيالاۋ, اقشالاي كوتەرمەلەۋدى قايتارۋ, وليمپيادا مەن باسقا دا جارىستاردىڭ جۇلدەگەرلەرىنە بەرىلگەن تۇرعىن ءۇيدى قايتارۋ, ءومىر بويى ماتەريالدىق قامسىزداندىرۋدى تولەۋدى توقتاتۋ, اي سايىنعى اقشالاي قاراجات تولەۋدى توقتاتۋ, سپورتتىق اتاقتان, رازريادتان ايىرۋ سىندى ناقتى شارالاردى كوزدەيدى. وسى باعىتتا وتكەن جىلى دوپينگكە قارسى 120 سەمينار, 52 لەكتسيا وتكىزىلدى. 2019 جىلى ديپينگكە قارسى 36 قۇقىق بۇزۋشىلىق انىقتالىپ, 29-ىنا شارا قولدانىلدى» دەدى.
