ايماقتار • 30 قاڭتار, 2020

اۋقىمدى ساقتانۋ شارالارى بەلگىلەندى

350 رەت
كورسەتىلدى
2 مين
وقۋ ءۇشىن

قىتايمەن ىسكەرلىك قارىم-قاتنىستاردى دامىتۋعا كەڭ جول اشا بىلگەن رەسپۋبليكا وڭىرلەرىنىڭ ءبىرى – اقتوبە. قازىرگى كەزدە وبلىس اۋماعىندا قىتايلىق كومپانيالار كومىرسۋتەگى زاتىن ءوندىرۋ مەن جەراستى قازبا بايلىقتارىن يگەرۋ سالاسىندا قىزمەت جاسايدى.

اۋقىمدى ساقتانۋ شارالارى بەلگىلەندى

بۇل تۇرعىدا ۇلكەندى-كىشىلى قىتايلىق وندىرىسشىلەردىڭ جالپى سانى 56 بولسا, اتالعان ءوندىرىستىڭ قۇرىلىمداردا 837 قىتايلىق ازاماتتار تىركەلگەن. ءارى 2020 جىلدىڭ 6 قاڭتارىنان باستاپ, ءوڭىر اۋماعىنا كۇنشىعىس ەلىنەن 821 ادام كەلگەنى بەلگىلى بولىپ وتىر. ونىڭ دەنىن نەگىزىنەن قازاقستاندىقتار قۇرايدى.

كوروناۆيرۋس ينفەكتسياسىنىڭ تارالىپ كەتپەۋى ءۇشىن ولاردىڭ ءبارى دە قاتاڭ ەسەپكە الىنىپ, مەديتسينالىق تەكسەرۋلەر جۇرگىزىلدى دەپ حابارلادى گازەت تىلشىسىنە اقتوبە وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ. ونىڭ ايتۋىنشا كورشى مەملەكەتتە ەتەك العان جۇقپالى اۋرۋدىڭ الدىن الىپ ودان ساقتانا ءبىلۋ ءۇشىن بارلىق شارالار اتقارىلىپ كەلەدى.

دارىگەرلەر ءار كۇن سايىن مۇناي-گاز سەكتورى سالاسىندا جۇرگەن قىتايلىق وندىرىسشىلەرمەن قارىم-قاتىناسى بار جەرگىلىكتى ازاماتتارعا دا باقىلاۋ جاساۋدى نازاردا ۇستاۋدى ماقسات ەتىپ وتىر. قاۋىپتى ۆيرۋس ينفەكتسياسى بايقالعان جاعدايدا ونى شۇعىل تۇردە وقشاۋلايتىن ورىندار الدىن-الا بەلگىلەنگەن. بۇعان 160 كەرۋەرت قاراستىرىلعان. سونىمەن بىرگە تۇمشاۋلايتىن ماسكالار مەن كوروناۆيرۋسپەن الدىن-الا ساقتانۋعا جانە اۋرۋ بەلگىسى بايقالا قالعان جاعدايدا ونى ەمدەۋگە قاجەتتى قۇرال-جابدىقتاردىڭ جەتكىلىكتى قورى جاساقتالعان.

وبلىستا قىتاي ەلىنەن تارالىپ وتىرعان قاۋىپتى جۇقپالى دەرتتەن قورعانۋ شارالارىن جۇرگىزۋ ءۇشىن ارنايى شتاب قۇرىلعان وعان اقتوبە وبلىسى اكىمى ورىنباسارى مارات توعجانوۆ جەتەكشىلىك جاسايدى. شتاب قۇرامىنا سىرتقى ىستەر مينيسترلىگى مەن ىشكى ىستەر مينيسترلىكتەرىنە قاراستى ماماندار مەن كوشى-قون سالاسىنىڭ قىزمەتكەرلەرى, سانيتارلىق-ەپيلەميولوگيالىق ستانسا مەن توتەنشە جاعدايلار قۇرىلىمدارىنىڭ وكىلدەرى جانە مەملەكەتتىك شەكارا قىزمەتكەرلەرى ەنگىزىلگەن.

بۇگىنگى كۇنى شتاب مۇشەلەرى كەڭ اۋقىمدى ساقتانۋ شارالارىن بەلگىلەپ, ونىڭ ساقتالۋى مەن جۇزەگە اسىرىلۋىن ءجىتى قاداعالاپ وتىر.

 

 

 اقتوبە

سوڭعى جاڭالىقتار