ونىڭ ايتۋىنشا, قالا ۆيرۋسقا قارسى پرەپاراتتارمەن قاجەتتى كولەمدە قامتاماسىز ەتىلگەن, سوندىقتان وعان قاتىستى دۇرلىگۋگە نەگىز جوق دەيدى. «مەنىڭ ويىمشا, تاپشىلىق قولدان جاسالىپ جاتىر. مۇمكىن باعاسىنا كەلىسكەندەر بار شىعار. كەيبىر الىپساتارلار بەتپەردەنى كوپتەپ الىپ, ونى قىمبات باعاعا ساتۋى مۇمكىن. ونى مەديتسينالىق مەكەمەلەر دە, ءدارىحانالار دا ساتىپ الماعان», — دەدى ا. مولداعاسىموۆا.
ا. مولداعاسىموۆا ءدارىحانا مەن فارمكومپانيالاردى قازىرگى جاعدايدى پايدالانىپ, حالىقتى ابىگەرگە تۇسىرمەۋگە, قولدان تاپشىلىق جاساماۋعا شاقىردى. «كاسىپكەرلىك سالاسىندا تاريفتىك جانە باعا بويىنشا كەلىسىم جاساعاندار جاۋاپكەرشىلىككە تارتىلاتىنىن ەسكە سالامىز. قالا باسشىلىعى باعا كەلىسىمىن جاساعاندارعا قىلمىستىق جاۋاپكەرشىلىكتەن باستاپ, ليتسەنزيانى قايتارىپ الۋعا دەيىن بارلىق ءتيىستى شارالاردى قولدانادى», - دەيدى ول.
دەپارتامەنت باسشىسى قالادا قورعانىس ماسكاسى جەتكىلىكتى ەكەنىن, مەديتسينالىق مەكەمەلەردە 2 ملن-نان استام, ال رەزەرۆتە 1,3 ملن بىررەتتىك بەتپەردە بارىن ايتتى. سونداي-اق, 3 ملن-نان استام بەتپەردە ساتىپ الۋ ءۇشىن دەنساۋلىق ساقتاۋ مينيسترلىگىنە ءوتىنىش بىلدىرگەن. ونىڭ ايتۋىنشا, قازىر قالادا ءبىر ادامعا 20-25 ماسكادان كەلەدى.
ايتا كەتۋ كەرەك, قىتاي رەسمي تۇردە ۆيرۋستىڭ ادامنان ادامعا جۇعۋى مۇمكىن ەكەنىن راستادى. سوڭعى مالىمەتتەرگە سايكەس, قىتايدا ىندەتتەن 131 ادام كوز جۇمعان, ال الەم بويىنشا ۆيرۋستى جۇقتىرعاندار سانى 6000-عا جەتتى. سونداي-اق قىتايدا تاراعان پنەۆمانيا تايلاندتان وزگە, وڭتۇستىك كورەيا مەن جاپونيادا تىركەلدى.
ەستەرىڭىزدە بولسا, كۇنى كەشە عانا ەلىمىزدىڭ دەنساۋلىق ساقتاۋ مينيسترلىگى كورونوۆيرۋسقا قارسى پرەپاراتتاردىڭ بار ەكەنىن مالىمدەگەن ەدى. ازىرگە ەل اۋماعىندا ۆيرۋستى جۇقتىرعان جان جوق.
دەگەنمەن ساق بولساق – ساقتاناتىنىمىزدى ۇمىتپايىقشى...
الماتى
